Imisebenzi 9 - iBhayibhili Elingcwele 1978

Ukuphenduka lokubhaphathizwa kukaSawuli

¹ USawuli esafutheka ngokusongela lokubulala abafundi beNkosi, waya kumpristi omkhulu,

² wacela incwadi zokuya eDamaseko emasinagogeni, ukuze kuthi uba efumana abantu baleyoNdlela, abesilisa labesifazana, abalethe eJerusalema bebotshiwe.

³ Kwathi ekuhambeni kwakhe, esesondele eDamaseko, kwaphazima masinyane inxa zonke ukukhanya okuvela ezulwini.

⁴ Wawela phansi, wezwa ilizwi lisithi kuye: Sawuli, Sawuli, ungizingelelani na?

⁵ Wathi: Ungubani, Nkosi? Yathi: NginguJesu omzingelayo;

⁶ kodwa sukuma ungene emzini, uzakutshelwa lokhu omele ukukwenza.

⁷ Amadoda ayehamba laye ayemi engelakukhuluma, ngoba ezwa ilizwi kodwa engaboni muntu.

⁸ USawuli wasevuka phansi; kwathi esevule amehlo akhe, kabe esabona. Ngakho basebembamba ngesandla, bamusa eDamaseko.

⁹ Kwaba zinsuku ezintathu engaboni, engadli, enganathi.

¹⁰ Kwakukhona eDamaseko umfundi othile, othiwa nguAnaniya; iNkosi yathi kuye ngombono: Ananiya! Yena wathi: Ngikhona, Nkosi.

¹¹ INkosi yathi kuye: Suka uye endleleni ethiwa iQondile, udinge endlini kaJudasi umuntu othiwa nguSawuli waseTarsusi; uzamfumana ekhuleka;

¹² ubonile ngombono umuntu, othiwa nguAnaniya, engena, ebeka izandla zakhe phezu kwakhe ukuba abone.

¹³ Kodwa uAnaniya wathi: Nkosi, ngizwile ngabanengi ngalowomuntu konke okubi akwenzileyo kwabangcwele bakho abaseJerusalema;

¹⁴ lalapha ulamandla avela kubapristi abakhulu okubopha bonke labo abakhuleka ebizweni lakho.

¹⁵ Kodwa iNkosi yathi kuye: Hamba, ngoba lowo uyisitsha sami esikhethiweyo sokuphatha ibizo lami phambi kwezizwe, lamakhosi, labakoIsrayeli;

¹⁶ ngoba mina ngizakumtshengisa konke amele ukuhlutshwa ngakho ngenxa yebizo lami.

¹⁷ Ngakho uAnaniya wasuka, wangena endlini, wabeka izandla zakhe phezu kwakhe esithi: Sawuli, mzalwane, iNkosi uJesu ebonakele kuwe endleleni oze ngayo, ungithumile ukuba ubuye ubone, ugcwaliswe ngoMoya oNgcwele.

¹⁸ Kwahle kwawa emehlweni akhe kwangathi zinkwethu, wabona, wasukuma, wabhaphathizwa;

¹⁹ esedlile wathola amandla. Wahlala labafundi baseDamaseko insuku ezithile.

USawuli utshumayela eDamaseko laseJerusalema

²⁰ Masinyane emasinagogeni abo watshumayela ngoJesu esithi uyiNdodana kaNkulunkulu.

²¹ Bonke abezwayo bamangala besithi: Lo kayisuye yini owachitha eJerusalema bonke labo abakhuleka kulelibizo, lalapha uzele khona lokho ukuba abathathe abase kubapristi abakhulu bebotshiwe na?

²² Kodwa uSawuli wakhula kakhulu emandleni, wabehlula abaJuda abakhileyo eDamaseko eqinisa ukuthi uJesu unguKristu.

²³ Sekudlule insuku ezinengi, abaJuda benza icebo ukuba bambulale.

²⁴ Kodwa icebo labo laziwa nguSawuli. Babemlindele emasangweni emini lebusuku ukuba bambulale.

²⁵ Kodwa abafundi bamthatha ebusuku, bamehlisela ngaphandle komthangala ngesilulu.

²⁶ Esefikile eJerusalema wazama ukuzihlanganisa labafundi; kodwa bonke bamesaba, bengakholwa ukuba ungumfundi.

²⁷ Kodwa uBarnabasi wamthatha, wamusa kubaphostoli, wabalandisela ukuthi uyibonile iNkosi endleleni, lokuthi ikhulumile kuye, lokuthi eDamaseko utshumayele ngesibindi ngebizo likaJesu.

²⁸ Wahlala labo eJerusalema, ephuma engena phakathi kwabo etshumayela ngesibindi ngebizo leNkosi,

²⁹ ekhuluma ephikisana labaJuda abakhuluma isiGriki; bona bazama ukumbulala.

³⁰ Abazalwane sebekwazi lokho bamehlisela eKesariya, bamthumela eTarsusi.

³¹ Ngakho ibandla laba lokuthula kulo lonke elaseJudiya, lelaseGalili, lelaseSamariya, lakheka, lihamba ngokwesaba kweNkosi, landa ngokuqiniswa nguMoya oNgcwele.

UPetro usilisa uEneya

³² Kwathi uPetro ehambela izindawo zonke, wafika lakwabangcwele abahlala eLida.

³³ Wafumana khona indoda ethiwa nguEneya, eyayiyisilima isilele ecansini iminyaka eficaminwembili.

³⁴ UPetro wathi kuye: Eneya, uJesu Kristu uyakusilisa; vuka, wendlule icansi lakho. Wasevuka masinyane.

³⁵ Bambona bonke abakhileyo eLida leSaroni, baphendukela eNkosini.

UPetro uvusa uTabitha kwabafileyo

³⁶ Kwakukhona eJopha umfundikazi othiwa nguTabitha okuyikuthi uDorkasi; wayelemisebenzi emihle lokusiza abayanga.

³⁷ Kulezonsuku wagula, wafa; sebemgezisile bamlalisa endlini ephezulu.

³⁸ Njengoba iLida laliseduze leJopha, abafundi sebezwile ukuthi uPetro ukhona lapho, bathumela amadoda amabili kuye bemncenga besithi: Ake uze kithi ungaphuzi.

³⁹ UPetro wasesuka, wahamba labo. Esefikile, bamthatha bamusa endlini ephezulu; bonke abafelwakazi bema laye bekhala, bemtshengisa izambatho lengubo uDorkasi ayezenzile eseselabo.

⁴⁰ UPetro wasebakhuphela phandle bonke, eguqa ngamadolo wakhuleka. Wasephendukela esidunjini esithi: Tabitha, vuka! Wasevula amehlo akhe, wabona uPetro, walulama.

⁴¹ Yena wambamba ngesandla, wamsukumisa, wasebiza abangcwele labafelwakazi, wambeka phambi kwabo esilile.

⁴² Kwezwakala kulo lonke iJopha; abanengi bakholwa eNkosini.

⁴³ Wahlala eJopha insuku ezinengi loSimoni umkhuhli.