Imisebenzi 8 - iBhayibhili Elingcwele 1978

USawuli uzingela amakholwa

¹ Ngalolosuku kwasuka ukuzingelwa okukhulu kwebandla laseJerusalema, bahlakazeka bonke ngaphandle kwabaphostoli emazweni aseJudiya laseSamariya.

² Amadoda akholwayo ambela uStefane amkhalela kakhulu.

³ Kodwa uSawuli walichitha ibandla, engena ezindlini ngezindlu, ehudula abesilisa labesifazana, ebafaka entolongweni.

UFiliphu utshumayela eSamariya

⁴ Abahlakazekileyo bahamba, betshumayela ivangeli.

⁵ UFiliphu wehlela emzini waseSamariya, watshumayela kubo ngoKristu.

⁶ Amaxuku alalela nganhliziyonye okwakhulunywa nguFiliphu, esizwa ebona izibonakaliso azenzayo.

⁷ Ngoba baphuma omoya ababi kwabanengi ababengenwe yibo, bememeza ngelizwi elikhulu; labanengi ababeyizilima lababeyiziqhuli basiliswa.

⁸ Kwaba khona ukuthokoza okukhulu kulowomuzi.

USimoni oyisanuse

⁹ Kwakukhona indoda ethiwa nguSimoni, eyayikade isenza imilingo kulowomuzi, yasimangalisa isizwe samaSamariya, izitshaya umuntu omkhulu.

¹⁰ Bamlalela bonke kusukela kwabancinyane kuze kube kwabakhulu, besithi: Lo uyilawo amandla kaNkulunkulu athiwa maKhulu.

¹¹ Bamlalela ngoba wabamangalisa isikhathi eside ngemilingo yakhe.

¹² Kodwa kwathi ukuba bakholwe uFiliphu etshumayela ivangeli ngombuso kaNkulunkulu langebizo likaJesu Kristu, babhaphathizwa abesilisa labesifazana.

¹³ LoSimoni laye wakholwa; esebhaphathiziwe, wanamathela kuFiliphu, wamangala ebona izibonakaliso lezimangaliso ezinkulu ezazisenziwa.

¹⁴ Kwathi ukuba abaphostoli abaseJerusalema bezwe ukuthi iSamariya lilamukele ilizwi likaNkulunkulu, bathumela kubo uPetro loJohane;

¹⁵ sebefikile khona babakhulekela ukuba bamamukele uMoya oNgcwele,

¹⁶ ngoba wayengakehleli lakoyedwa wabo, kodwa babesabhaphathizwe ebizweni leNkosi uJesu kuphela.

¹⁷ Basebebeka izandla zabo phezu kwabo; bamamukela uMoya oNgcwele.

¹⁸ USimoni esebonile ukuthi ngokubekwa kwezandla zabaphostoli uyaphiwa uMoya oNgcwele, waletha imali kubo,

¹⁹ esithi: Ngipheni lami lawomandla, ukuze kuthi lowo engibeka izandla zami phezu kwakhe amukele uMoya oNgcwele.

²⁰ Kodwa uPetro wathi kuye: Isiliva sakho kasibhubhe kanye lawe, ngoba uthi isiphiwo sikaNkulunkulu singathengwa ngemali.

²¹ Ngoba kawulasabelo lelifa kulelilizwi, ngoba inhliziyo yakho kayilunganga phambi kukaNkulunkulu.

²² Ngakhoke phenduka kulobububi bakho, ucele iNkosi ukuthi uba kungenzeka uthethelelwe iminakano yenhliziyo yakho,

²³ ngoba ngibona ukuthi ulomona omubi, ubotshiwe yisono.

²⁴ USimoni wasemphendula esithi: Ngikhulekelani lina eNkosini, ukuze ngingehlelwa ngolunye lwalezizinto elizitshiloyo.

²⁵ Kuthe sebefakazile, bekhulumile ilizwi leNkosi, babuyela eJerusalema, behamba betshumayela ivangeli emizini eminengi yamaSamariya.

Ukuphenduka kwenduna yaseEtiyopiya

²⁶ Isithunywa seNkosi sathi kuFiliphu: Suka uye ngaseningizimu endleleni esuka eJerusalema isiya eGaza; yona iyinkangala.

²⁷ Wasesuka ehamba. Wasebona umuntu waseEtiyopiya, umthenwa, induna enkulu kaKandake inkosikazi yaseEtiyopiya, eyayiphatha impahla yakhe yonke, yayifikile eJerusalema ukukhuleka;

²⁸ yayisibuyela, ihlezi enqoleni yayo, ifunda umprofethi uIsaya.

²⁹ UMoya wathi kuFiliphu: Sondela, uhambe lalinqola.

³⁰ Ngakho uFiliphu wasegijimela kuyo, wayizwa ifunda umprofethi uIsaya, wathi: Uyaqedisisa kambe lokhu okufundayo na?

³¹ Yathi: Ngingaqedisisa kanjani, kungekho ongiqondisayo na? Yamcela uFiliphu ukuba akhwele ahlale layo.

³² Isahlukwana sombhalo eyayisifunda yilesi esithi: Walethwa ekuhlatshweni njengemvu; njengewundlu lithule phambi komgundi walo kunjalo kawuvulanga umlomo wakhe.

³³ Ekuthobeni kwakhe ukuthonisiswa kwakhe kwasuswa. Ngubani ongalandisa isizukulwana sakhe na? Ngoba ukuphila kwakhe kuyasuswa emhlabeni.

³⁴ Induna yathi kuFiliphu: Ngiyakucela, umprofethi ukhuluma lokhu ngobani lapha na? Uyazitsho yena ingabe omunye na?

³⁵ UFiliphu wavula umlomo wakhe, eqala kulowombhalo wamtshumayeza ivangeli ngoJesu.

³⁶ Kwathi besahamba endleleni, bafika emanzini; induna yathi: Khangela, nanka amanzi; kwalani ukuba ngibhaphathizwe na?

³⁷ [UFiliphu wathi kuyo: Uba ukholwa ngenhliziyo yonke, kungenzeka. Yaphendula yathi: Ngiyakholwa ukuthi uJesu Kristu uyiNdodana kaNkulunkulu.]

³⁸ Walaya ukuba inqola ime. Behla bobabili bangena emanzini, uFiliphu lenduna; wayibhaphathiza.

³⁹ Kwathi sebekhuphukile emanzini, uMoya weNkosi wamsusa uFiliphu, kayabe isambona induna, kodwa yahamba ngendlela yayo ithokoza.

⁴⁰ Kodwa uFiliphu wafunyanwa eAzotu, wahamba etshumayela ivangeli kuyo yonke imizi, waze wafika eKesariya.