Imisebenzi 6 - iBhayibhili Elingcwele 1978

Ukukhethwa kwamadoda ayisikhombisa

¹ Kwathi ngalezonsuku abafundi sebandile, kwavela ukusola phakathi kwabaJuda abakhuluma isiGriki lamaHeberu, ngoba abafelwakazi babo babencitshwa ekwabelweni kwensuku ngensuku.

² Abalitshumi lambili basebebiza ibandla labafundi, bathi: Kakulunganga ukuba thina sitshiye ukutshumayela ilizwi likaNkulunkulu, sisebenze ematafuleni.

³ Ngakhoke, bazalwane, khethani phakathi kwenu amadoda ayisikhombisa alodumo oluhle, agcwele uMoya lokuhlakanipha, esizakuwamisela lumsebenzi.

⁴ Kodwa thina sizakhuthala ekukhulekeni lenkonzweni yelizwi.

⁵ Lelolizwi lathokozisa lonke ibandla; basebekhetha uStefane, indoda egcwele ukukholwa loMoya oNgcwele, loFiliphu, loProkoro, loNikanori, loTimoni, loParmena, loNikola, ikholwa labezizwe elivela eAntiyoki,

⁶ babamisa phambi kwabaphostoli; bakhuleka, babeka izandla zabo phezu kwabo.

⁷ Ilizwi likaNkulunkulu landa, lobunengi babafundi bakhula kakhulu eJerusalema, labapristi abanengi bakholwa.

UStefane umangalelwa emphakathini

⁸ UStefane egcwele umusa lamandla wenza izimangaliso lezibonakaliso ezinkulu phakathi kwabantu.

⁹ Kwasekusuka abanye abesinagoge elithiwa elabaLibertine, labaseKurene labaseAleksandriya, lababela eKilikhiya, labaseAsiya, baphikisana loStefane;

¹⁰ kodwa babengelamandla okumelana lokuhlakanipha loMoya ayekhuluma ngawo.

¹¹ Basebehlawula abantu abavuma ukuthi bathi: Simzwile ekhuluma amazwi ayinhlamba ngoMose langoNkulunkulu.

¹² Bavusa abantu labadala lababhali, bamfikela, bambamba, bamletha phambi komphakathi;

¹³ bamisa ofakazi bamanga abathi: Lumuntu kayekeli ukukhuluma amazwi ngalindawo engcwele langomlayo;

¹⁴ ngoba simzwile esithi uJesu lo waseNazaretha uzakudiliza lindawo, aphendule lemikhuba uMose asinika yona.

¹⁵ Bonke ababehlezi emphakathini bamjolozela, babona ubuso bakhe kungathi ngobesithunywa.