Imisebenzi 5 - iBhayibhili Elingcwele 1978

UAnaniya loSafira

¹ Kodwa indoda ethile, uAnaniya ibizo layo, loSafira umkayo, bathengisa indawo;

² yagodla enye yemali, lomkayo ekwazi yaletha ingxenye ethile, yayibeka ngasenyaweni zabaphostili.

³ Kodwa uPetro wathi: Ananiya, kungani ukuba uSathane agcwalise inhliziyo yakho, uqambe amanga kuMoya oNgcwele, ugodle ingxenye yemali yelizwe na?

⁴ Lisekhona lalingesilo elakho na? Selithengisiwe belingekho emandleni akho na? Uyibekeleni leyonto enhliziyweni yakho? Kawuqambanga amanga ebantwini kodwa kuNkulunkulu.

⁵ Kwathi uAnaniya esizwa lamazwi, wawela phansi, wafa; ukwesaba okukhulu kwabehlela bonke abakuzwayo lokhu.

⁶ Insizwa zasuka, zamgoqela, zamthwalela ngaphandle, zamngcwaba.

⁷ Sekudlule izibanga ezintathu kwangena umkakhe engakwazi okwenzakeleyo.

⁸ UPetro wasesithi kuye: Ngitshele ukuba ilizwe lilithengise ngokungaka na? Wathi: Yebo, ngokungaka.

⁹ Kwang’khona uPetro wathi kuye: Kungani livumelene ngokulinga uMoya weNkosi na? Khangela, inyawo zabambele indoda yakho zisemnyango, lawe bazakukuthwalela ngaphandle.

¹⁰ Khonokho wasewela phansi ngasenyaweni zakhe, wafa; insizwa zangena, zamfumana esefile, zamthwalela ngaphandle, zammbela phansi kwendoda yakhe.

¹¹ Ukwesaba okukhulu kwalehlela lonke ibandla labo bonke abazizwayo lezizinto.

Izimangaliso zabaphostoli

¹² Kwenziwa izibonakaliso lezimangaliso ezinengi ebantwini ngezandla zabaphostoli; babenhliziyonye bonke ethulini likaSolomoni.

¹³ Kodwa kwabanye kwakungekho olesibindi sokuzihlanganisa labo, kodwa abantu babebahlonipha kakhulu.

¹⁴ Kwengezelelwa kakhulu abakholwayo eNkosini, abanengi abesilisa labesifazana,

¹⁵ baze bakhuphela phandle emigwaqweni abagulayo, bababeka emathaleni lemacansini, ukuze kuthi lapho uPetro esiza, isithunzi sakhe nje sibasithe abanye babo.

¹⁶ Abantu abanengi abavela emizini ezingelezele iJerusalema babuthana beletha abagulayo labangenwe ngomoya ababi; basiliswa bonke.

Ukubotshwa lokukhululwa kwabaphostoli

¹⁷ Kwasekusuka umpristi omkhulu labo bonke ababelaye abangabehlelo labaSadusi, bagcwala umona,

¹⁸ bababamba abaphostoli, babafaka entolongweni.

¹⁹ Kodwa ebusuku isithunywa seNkosi savula iminyango yentolongo, sabakhupha, sathi:

²⁰ Hambani, lime ethempelini likhulume ebantwini wonke amazwi alokhukuPhila.

²¹ Kwathi sebezwile lokhu, bangena ethempelini emadabukakusa, bafundisa. Kwasekufika umpristi omkhulu lalabo ababelaye, babizela ndawonye umphakathi wabo bonke abadala bakoIsrayeli, bathumela entolongweni ukuba balethwe.

²² Kodwa kwathi amanxusa efika kawabaficanga entolongweni; abuyela emuva, abika

²³ athi: Intolongo siyifumene ivaliwe, iqinile, labalindi bemi eminyango; kodwa sesivulile kasificanga muntu phakathi.

²⁴ Kwathi ukuba induna yethempeli labapristi abakhulu bezwe lamazwi, badideka kakhulu ngawo, bamangala ukuba lokhu kuzakucina ngani.

²⁵ Kwasekufika omunye, wabatshela wathi: Khangelani, amadoda ebeliwafake entolongweni emi ethempelini, ayafundisa abantu.

²⁶ Yasiphuma induna lamanxusa, baya, babathatha bengababambi ngamandla ngoba besaba ukukhandwa ngamatshe ngabantu.

²⁷ Sebebalethile babamisa phambi komphakathi; umpristi omkhulu wababuza

²⁸ wathi: Salilayisisa ukuba lingafundisi ngebizo leli, kodwa, khangelani, seligcwalise iJerusalema ngemfundiso yenu, liqonde ukwehlisela igazi lalumuntu phezu kwethu.

²⁹ Kodwa uPetro labaphostoli baphendula bathi: Simele ukulalela uNkulunkulu kulokulalela abantu.

³⁰ UNkulunkulu wabokhokho wamvusa uJesu elambulala ngokumphanyeka esiphambanweni;

³¹ yena uNkulunkulu wamphakamisela ngakwesokunene sakhe abe yiNkosi loMsilisi ukuba anike uIsrayeli ukuphenduka lokuthethelelwa kwezono.

³² Thina singofakazi balezizinto kanye loMoya oNgcwele uNkulunkulu amnike labo abamlalelayo.

Iseluleko sikaGamaliyeli

³³ Kwathi bona sebezwile lokhu bathukuthela, bafuna ukubabulala.

³⁴ Kwasekusukuma umFarisi othile emphakathini, uGamaliyeli ibizo lakhe, umfundisi womlayo, ohlonitshwa yibo bonke abantu, walaya ukuba amadoda akhutshelwe phandle okwesikhatshana.

³⁵ Wasesithi kubo: Madoda akoIsrayeli, qaphelani kulokho elizakukwenza kulababantu.

³⁶ Ngoba ngaphambi kwalezinsuku kwasuka uTewuda wazitshaya umuntu omkhulu; amlandela amadoda angaba ngamakhulu amane; kodwa wabulawa, kwathi labo ababemlandela bachitheka, baphela.

³⁷ Emva kwakhe kwasuka uJudasi waseGalili ensukwini zokubalwa; wahola abantu ukuba bamlandele; laye wafa, lalabo bonke ababemlandela bachitheka.

³⁸ Ngakhoke ngithi kini: Dedani kulababantu, libayekele, ngoba uba lelicebo lalumsebenzi ungowabantu, uzakuchitheka;

³⁹ kodwa uba ungokaNkulunkulu, kaliyikuba lamandla okuwuchitha, funa lifunyaniswe lingabalwayo loNkulunkulu. Basebemvumela.

⁴⁰ Sebebabizile abaphostoli babatshaya, babalaya ukuba bangakhulumi ngebizo likaJesu, babakhulula.

⁴¹ Ngakho basuka phambi komphakathi bethokoza, ngoba babefanele ukudunyazwa ngenxa yalelobizo.

⁴² Insuku zonke ethempelini lasekhaya kabayekelanga ukufundisa lokutshumayela ngoJesu ukuthi unguKristu.