Imisebenzi 4 - iBhayibhili Elingcwele 1978

Ukubotshwa kukaPetro loJohane

¹ Kwathi besakhuluma ebantwini, abapristi lenduna yethempeli labaSadusi babafikela,

² benengekile ngoba babefundisa abantu betshumayela ukuvuka kwabafileyo ngoJesu,

³ bababamba, babafaka entolongweni kwaze kwaba kusasa, ngoba kwasekuhlwile.

⁴ Kodwa abanengi abalizwayo ilizwi bakholwa; ubunengi bamadoda babungaba zinkulungwane ezinhlanu.

⁵ Kwathi kusasa kwabuthana eJerusalema ababusi labadala lababhali,

⁶ kanye loAnasi umpristi omkhulu, loKayafasi, loJohane, loAleksandro, labo bonke abendlu yompristi omkhulu;

⁷ sebebamise phakathi kwabo, bababuza bathi: Lokhu likwenze ngawaphi amandla ingabe ngaliphi ibizo na?

⁸ Kwang’khona uPetro egcwele uMoya oNgcwele wathi kubo: Babusi babantu labadala,

⁹ nxa sibuzwa lamuhla ngomsebenzi omuhle owenziweyo emuntwini oyisilima ukuba yena usiliswe ngani,

¹⁰ yazini lonke kanye laso sonke isizwe sakoIsrayeli ukuthi ngebizo likaJesu Kristu waseNazaretha elambethelayo, amvusayo kwabafileyo uNkulunkulu, ngaye lumuntu umi phambi kwenu esesilile.

¹¹ UJesu lo uyilitshe elaliwa ngabakhi, kodwa eseliyinhloko yengonsi.

¹² Kakukho ukusiliswa ngomunye, ngoba kalikho elinye ibizo ngaphansi kwezulu elinikiweyo ebantwini, esingasiliswa ngalo.

¹³ Kwathi bebona isibindi sikaPetro loJohane, besazi ukuthi kabafundanga, bangabantu nje, bamangala; babazi ukuba babeloJesu;

¹⁴ kodwa bebona umuntu osilisiweyo emi labo, babengelakuphika ulutho.

¹⁵ Kodwa sebebalayile ukuba baphume emphakathini bakhulumisana bodwa,

¹⁶ besithi: Sizakubenza njani lababantu na? Ngoba kusobala kubo bonke abahlezi eJerusalema ukuthi isibonakaliso esidumisekayo senziwa yibo, singekuphike.

¹⁷ Kodwa ukuze kungabe kusanda phakathi kwabantu, asibaqonqosele ukuthi bangabe besakhuluma lamuntu ngalelibizo.

¹⁸ Basebebabiza, babalaya ukuthi bangakhulumi, bangafundisi lakanye ngebizo likaJesu.

¹⁹ Kodwa uPetro loJohane babaphendula bathi: Yahlukanisani lina ukuba kulungile yini phambi kukaNkulunkulu ukulalela lina kulokulalela uNkulunkulu,

²⁰ ngoba thina kasilakuyekela ukukhuluma ngalokho esikubonileyo lesikuzwileyo.

²¹ Kwathi sebebaqonqosele futhi, babayekela; kabafumananga indlela yokubatshaya, ngoba bonke abantu basebedumisa uNkulunkulu ngalokho okwenzekileyo;

²² ngoba umuntu esenziwa kuye lesisibonakaliso sokusilisa wayeleminyaka edlula amatshumi amane.

Ukukhuleka kwebandla

²³ Kwathi sebeyekelwe basuka baya kwabakibo, bababikela ngalokho abapristi abakhulu labadala abakutshiloyo kubo.

²⁴ Kwathi bona sebekuzwile baphakamisela ilizwi labo nganhliziyonye kuNkulunkulu, bathi: Nkosi, Somandla, wena owenza izulu lomhlaba lolwandle lakho konke okukukho,

²⁵ owatsho ngoMoya oNgcwele ngomlomo kakhokho uDavida inceku yakho wathi: Kungani ukuba abezizwe baxokozele, labantu banakane okuyize na?

²⁶ Amakhosi omhlaba azihlela, lababusi bahlangana ndawonye ukuhlanganyela iNkosi loGcotshiweyo wayo.

²⁷ Ngoba impela kulumuzi uHerodi loPontiyusi Pilatu, kanye labezizwe labantu bakoIsrayeli, bahlangana ndawonye ukuhlanganyela iNceku yakho engcwele uJesu owamgcobayo,

²⁸ ukwenza lokho okwamiswa phambili yisandla sakho lecebo lakho ukuba kwenzeke.

²⁹ Ngakhoke, Nkosi, khangela ukusonga kwabo, unike inceku zakho ukuba zikhulume ilizwi lakho ngesibindi sonke

³⁰ ngokwelula isandla sakho ukusilisa, kwenziwe izibonakaliso lezimangaliso ngebizo leNceku yakho engcwele uJesu.

³¹ Kwathi sebekhulekile, kwazanyazanyiswa indawo ababebuthene kuyo, bagcwaliswa ngoMoya oNgcwele bonke, bakhuluma ilizwi likaNkulunkulu ngesibindi.

Ukuhlanganyela kwebandla izinto zonke

³² Ixuku labakholwayo lalinhliziyonye lomoya munye; kungekho loyedwa owathi impahla zakhe zingezakhe, kodwa bahlanganyela izinto zonke.

³³ Abaphostoli baveza ngamandla amakhulu ubufakazi babo ngokuvuka kweNkosi uJesu; lomusa omkhulu waba phezu kwabo bonke.

³⁴ Kwakungekho oswelayo phakathi kwabo; ngoba bonke ababelemihlaba ingabe izindlu bazithengisa, baletha imali yalokho okuthengisiweyo,

³⁵ bayibeka ngasenyaweni zabaphostoli; kwaba yilowo lalowo wabelwa njengokuswela kwakhe.

³⁶ Kwathi uJosefa owabizwa ngabaphostoli ngokuthi nguBarnabasi, okuyikuthi indodana yokududuza, umLevi waseKuprosi ngokuzalwa,

³⁷ elesiqinti, wasithengisa, waletha imali, wayibeka ngasenyaweni zabaphostoli.