Imisebenzi 3 - iBhayibhili Elingcwele 1978

UPetro usilisa umuntu oyisiqhuli

¹ UPetro loJohane bakhuphukela ethempelini emini yantambama ngesikhathi sokukhuleka.

² Kwakulethwa indoda ethile eyisiqhuli kusukela ekuzalweni kwayo, ababeyibeka insuku ngensuku esangweni lethempeli elithiwa iSango eliHle ukuba icele iziphiwo kulabo abangenayo ethempelini.

³ Yabona uPetro loJohane bezakungena ethempelini, yacela ukuba iphiwe isiphiwo.

⁴ UPetro wayijolozela eloJohane, wathi: Sikhangele!

⁵ Yasibakhangela ithemba ukuba izakwamukeliswa ulutho yibo.

⁶ Kodwa uPetro wathi: Isiliva legolide kangilakho; kodwa ngizakukunika lokho engilakho; ebizweni likaJesu Kristu waseNazaretha, sukuma uhambe.

⁷ Wambamba ngesandla sokunene, wamlulamisa; kwaqina masinyane inyawo lenqagala zakhe,

⁸ wasukuma wathi lothu, wema, waqala ukuhamba, wangena labo ethempelini, ehamba, eseqa, edumisa uNkulunkulu.

⁹ Bonke abantu bambona ehamba, edumisa uNkulunkulu.

¹⁰ Bamazi ukuba nguye owayehlalela ukucela iziphiwo eSangweni eliHle lethempeli, behlelwa yikwesaba lokumangala ngalokho okwenzeka kuye.

UPetro ukhuluma ngoKristu ukuthi uyiNkosi yokuphila

¹¹ Esabambelele kuPetro loJohane, bonke abantu bagijimela kubo ndawonye ethulini elithiwa elikaSolomoni, bemangala kakhulu.

¹² Kwang’khona uPetro ebona lokho wathi ebantwini: Madoda akoIsrayeli, limangalelani ngalokhu na? Lisijolozelelani ngokungathi ngamandla ethu ingabe ngokukholwa kwethu simenze ukuba ahambe lumuntu na?

¹³ UNkulunkulu kaAbrahama lokaIsaka lokaJakobe, uNkulunkulu wabokhokho uyiphe udumo iNceku yakhe uJesu elayinikelayo, layiphika phambi kukaPilatu, yena esethanda ukuyikhulula;

¹⁴ kodwa lina lamphika oNgcwele loLungileyo, lacela ukuba liphiwe umbulali,

¹⁵ labulala iNkosi yokuphila ayivusayo uNkulunkulu kwabafileyo, esingofakazi bakho thina.

¹⁶ Ngokukholwa ebizweni layo lumuntu elimbonayo lelimaziyo wenziwe waqina, langokukholwa okungoJesu wamukeliswe ukuphila okupheleleyo phambi kwenu lonke.

¹⁷ Kodwa, bazalwane, ngiyazi ukuba lakwenza lokhu ngokungazi njengababusi benu.

¹⁸ Kodwa lokho uNkulunkulu akukhuluma ngaphambili ngomlomo wabaprofethi bonke ukuthi uKristu wakhe uzakuhlupheka, ukwenze kwagcwaliseka.

¹⁹ Ngakho phendukani, libuye futhi ukuze kuhlanjululwe izono zenu, ukuze kufike izikhathi zokuhlumelela ezivela ebusweni beNkosi,

²⁰ ukuze ithumele uKristu elimmiselweyo, uJesu,

²¹ okumele ukuba izulu limamukele, kuze kufike isikhathi sokubuyisela konke lokhu uNkulunkulu akutshoyo endulo ngomlomo wabaprofethi bakhe abangcwele.

²² UMose wathi: INkosi uNkulunkulu izakulivusela umprofethi kubazalwane benu onjengami; lizakumlalela kukho konke azakukukhuluma kini.

²³ Kuzakuthi wonke umuntu ongayikumlalela lowomprofethi achithwe ebantwini.

²⁴ Yebo, labaprofethi bonke, kusukela kuSamuweli labalandelayo, bonke batshumayela ngalezinsuku.

²⁵ Lina lingamadodana abaprofethi lawesivumelwano uNkulunkulu asenza labokhokho benu, esithi kuAbrahama: Ngenzalo yakho zizakubusiswa zonke izizukulwana zomhlaba.

²⁶ UNkulunkulu eseyivusile iNceku yakhe wayithumela kini kuqala ukulibusisa ngokuliphendula, ilowo lalowo ebubini bakhe.