Imisebenzi 28 - iBhayibhili Elingcwele 1978

UPawuli labanye bamukelwa kuhle ngabaseMelitha

¹ Kwathi sesisilile, sezwa ukuthi isihlenge sithiwa yiMelitha.

² Abantu bakhona basiphatha ngomusa ongandanga, ngoba babasa umlilo, basamukela sonke, ngoba laseliqalisile ukuna izulu sekuqanda.

³ UPawuli watheza ilixha lenkuni, walibeka emlilweni, kwaphuma inyoka ngenxa yokutshisa, yanamathela esandleni sakhe.

⁴ Abantu bakhona bebona isilo silenga esandleni sakhe, bakhulumisana besithi: Impela lumuntu ungumbulali; ngoba lanxa ephephile olwandle, ukuLunga kakuvumi ukuba asile.

⁵ Kodwa yena wasithintithela emlilweni isilo, akaze alimala.

⁶ Balindela ukuthi uzakuvuvuka, lokuba awele phansi afe masinyane. Kodwa sebelinde isikhathi eside, bebona ukuthi kafikelwa lutho, baphendula imicabango yabo bathi ungunkulunkulu.

UPawuli usilisa isiguli

⁷ Kwakukhona kuleyondawo amasimu esikhulu sesihlenge esithiwa nguPubliyo; yena wasamukela, wasiphatha kuhle insuku ezintathu.

⁸ Uyise kaPubliyo wayelele egula ebulawa ngumkhuhlane lembo; uPawuli waya kuye, wamkhulekela, wabeka izandla zakhe phezu kwakhe, wamsilisa.

⁹ Kwathi lokho sekwenzakele, beza labanye abakulesisihlenge ababelezifo, basiliswa labo.

¹⁰ Basinika iziphiwo ezinengi; mhla sisukayo ngomkolo, basinika esikufunayo.

UPawuli ufika eRoma

¹¹ Ngemva kwenyanga ezintathu sasuka ngomkolo waseAleksandriya owawukhululele ubusika esihlengeni, uphawu lwawo lwaluthiwa Maphahla.

¹² Sangena eSirakhuse, sahlala khona insuku ezintathu;

¹³ sasuka lapho, sahamba ngokubhoda, sayafika eRegiyuma. Sekudlule usuku, kwafika umoya waseningizimu, safika ePuthiyoli ngosuku lwesibili.

¹⁴ Safumana khona abazalwane, sacelwa ukuhlala labo insuku eziyisikhombisa; safikake eRoma.

¹⁵ Abazalwane sebezwile ngathi basuka khona, beza ukusihlangabeza baze bafika eApiyi Foruma laseTresi Taberne; uPawuli ebabona wabonga uNkulunkulu wema isibindi.

¹⁶ Esefikile eRoma, uPawuli wavunyelwa ukuhlala yedwa kanye lowebutho omlindayo.

¹⁷ Kwathi ngemva kwensuku ezintathu wabiza abakhulu babaJuda; sebebuthene wathi kubo: Bazalwane, loba mina ngingenzanga lutho oluphambene lesizwe lamasiko abokhokho, nganikelwa ezandleni zamaRoma eJerusalema;

¹⁸ wona esengihlolile afuna ukungikhulula, ngoba kungekho cala kimi lokuba ngife;

¹⁹ kodwa abaJuda bala, ngacindezeleka ukulidlulisela kuKesari, kungesikho ukuthi ngiyasimangalela isizwe sakithi.

²⁰ Ngakho ngenxa yalokhu ngilibizele lapha ukuba ngilibone, ngikhulume lani; ngoba ngenxa yethemba likaIsrayeli ngibotshiwe ngaleliketane.

²¹ Basebesithi kuye: Kasamukelanga ncwadi ngawe ezivela eJudiya, futhi kakufikanga muntu wabazalwane ukubika kumbe ukukhuluma okubi ngawe.

²² Kodwa sifisa ukuzwa okunakanayo wena, ngoba mayelana lalelihlelo siyazi ukuthi liyaphikiswa endaweni zonke.

²³ Kwathi sebemmisele usuku beza kuye endlini yakhe bebanengi, wabachasisela indaba kusukela ekuseni kwaze kwaba kusihlwa, wafakaza ngombuso kaNkulunkulu ezama ukubaphendula ngoJesu, ethathela emlayweni kaMose labaprofethi.

²⁴ Abanye baneliswa yilokho akutshoyo, kodwa abanye kabakholwanga.

²⁵ Kwathi ukuba bengezwanani bodwa, basuka bahamba, uPawuli esekhulume ilizwi laba linye lokuthi: Wayeqinisile uMoya oNgcwele owakhuluma ngoIsaya umprofethi kubokhokho benu esithi:

²⁶ Hamba uye kulesisizwe, uthi: Ukuzwa lizakuzwa, lingaze laqedisisa, lokubona lizakubona, lingaze labonisisa,

²⁷ ngoba inhliziyo yalesisizwe seyaba lukhuni, bezwa ngokulukhuni ngendlebe, lamehlo abo bawacimezile, funa babone ngamehlo abo, bezwe ngendlebe zabo, baqedisise ngenhliziyo zabo, baphenduke, ngibasilise.

²⁸ Yazini lokhu ukuthi lokhukusilisa kukaNkulunkulu kuyathunyelwa kwabezizwe; bonake bazakulalela. [

²⁹ Kwathi esetshilo lokhu, abaJuda bahamba, belokuphikisana okukhulu phakathi kwabo].

³⁰ UPawuli wahlala iminyaka emibili egcweleyo endlini yakhe ayeyiqatshile; wamukela bonke abeza kuye,

³¹ watshumayela umbuso kaNkulunkulu, wafundisa ngeNkosi uJesu Kristu obala, engavinjelwa muntu.