Imisebenzi 27 - iBhayibhili Elingcwele 1978

UPawuli uya eRoma eyisibotshwa

¹ Kwathi sekuqunyiwe ukuba siye eItaliya ngomkolo, banikela uPawuli lezinye izibotshwa ezithile enduneni yekhulu eyesigaba sikaKesari ethiwa nguJuliyu.

² Sangena emkolweni waseAdramithiyu obusuzakuya endaweni zaseAsiya; uAristako umMakedoniya waseTesalonika wayelathi.

³ Kusasa safika eSidoni; uJuliyu wamphatha kuhle uPawuli, wamvumela ukuba aye kubangane bakhe ukuze bamsize bona.

⁴ Sasuka lapho, sagudla iKuprosi, ngoba umoya wawuphambene lathi.

⁵ Sesidabule ulwandle olungaseKilikhiya lasePamfiliya safika eMira elaseLikhiya.

⁶ Laphoke induna yekhulu yafumana umkolo waseAleksandriya oya eItaliya, yasikhwelisa kuwo.

⁷ Sahamba kancinyane insuku ezinengi, safika kanzima ngaseKinidu; umoya ungasivumeli, sagudla iKrete maqondana leSalamone,

⁸ saligudla ngokunzima, safika endaweni ethiwa yiMathekumahle; eduze layo kukhona umuzi waseLaseya.

⁹ Kwathi sekudlule isikhathi eside, sekuyingozi ukuhamba ngomkolo, ngoba isikhathi seZilo sasesedlule, uPawuli wabeluleka,

¹⁰ wathi: Madoda, ngiyabona ukuthi loluhambo luzakuba lengozi lomonakalo omkhulu, kungasiwo owempahla lomkolo kuphela kodwa lokusila kwabantu.

¹¹ Kodwa induna yekhulu yalalela induna yomkolo lomnikazi wawo kulalokho okutshiwo nguPawuli.

¹² Njengokuba itheku lalingalungelanga ukuhlala kulo ebusika, ubunengi babo baluleka ukuba kusukwe lapho, mhlawumbe kwenzeke ukuba bafinyelele eFenikisi, itheku laseKrete elikhangele intshonalanga yasenyakatho lentshonalanga yaseningizimu, bahlale khona ebusika.

¹³ Kuthe umoya waseningizimu usuphephetha kuhle, banakana ukuthi sebekuzuzile lokho ababekuqondile, bawukhulula umkolo, sasuka sagudla eKrete.

¹⁴ Kodwa ngemva kwesikhatshana kwavuka umoya othiwa iYurakilo oyisivunguzane, watshaya uvelela ngasemhlabeni;

¹⁵ umkolo wabanjwa yiwo, wehluleka ukukhangelana lomoya, sasesiwuyekela undenda.

¹⁶ Sathi sesigudla isihlengana esithiwa yiKlawuda, sawubamba umkodlwana womkolo kalukhuni;

¹⁷ sebewuphanyekile, basebenzisa amagoda ukuwubopha umkolo ukuze uqine; besesaba ukuthi bazakutshayeka emhlabathini othiwa yiSirti, behlisa isayili, basebendenda nje.

¹⁸ Kuthe ukuba siphoswe kakhulu yisiphepha, kusasa bachitha umthwalo;

¹⁹ kwathi ngolwesithathu balahla impahla zomkolo ngezandla zabo.

²⁰ Kwathi ilanga lenkanyezi kungasabonakali insuku ezinengi, lesiphepha esikhulu siqinisa njalo, laseliphela ithemba lonke lokuba sizakusila.

²¹ Sekuyisikhathi eside bengasadli, uPawuli wasukuma phakathi kwabo, wathi: Madoda, ngabe lalalela mina, kalaze lasuka eKrete, laphepha kulingozi lakulumonakalo.

²² Khathesike sengileluleka ukuba lime isibindi, ngoba kakuyikufa muntu kini, kodwa umkolo wodwa.

²³ Ngoba ngalobubusuku bekumi kimi isithunywa sikaNkulunkulu engingowakhe lengimkhonzayo,

²⁴ sathi: Ungesabi, Pawuli; ngoba umele ukuma phambi kukaKesari. Khangela, uNkulunkulu ukuphile bonke labo abahamba lawe.

²⁵ Ngakhoke manini isibindi, madoda; ngoba ngiyakholwa kuNkulunkulu ukuthi kuzakuba njengalokho engikutsheliweyo.

²⁶ Kodwa sizakutshayeka esihlengeni esithile.

²⁷ Kwathi sekufike ubusuku betshumi lane, sisandenda olwandle lwaseAdriya, phakathi kobusuku abomkolo bakhumbula ukuthi sebesondela emhlabathini.

²⁸ Basebephosa intambo yokulinganisa, bafumana kuyizingalo ezingamatshumi amane ukutshona; sebeqhubekile kancinyane bayiphosa futhi, bafumana kuyizingalo ezingamatshumi amathathu ukutshona;

²⁹ sesaba ukuthi mhlawumbe singatshayeka emadwaleni, basebesehlisa ingwegwe ezinkulu ezine ngemuva, basebelindela ukusa.

³⁰ Abomkolo sebefuna ukubaleka emkolweni, behlisela olwandle umkodlwana ngokungathi behlisa ingwegwe ngaphambi komkolo,

³¹ uPawuli wathi enduneni yekhulu lakwabebutho: Uba laba bengahlali emkolweni, lingesiliswe lina.

³² Abebutho basebequma amagoda omkodlwana, bawuyekela wawa.

³³ Kwathi sekuzakusa, uPawuli wabancenga bonke ukuba badle esithi: Lamuhla kulusuku lwetshumi lane lilindile lihlezi lingadli.

³⁴ Ngakhoke ngiyalincenga ukuba lidle, ngoba kuzakulinika amandla lokhu; kakuyikonakala lolulodwa unwele komunye wenu.

³⁵ Esetshilo lokhu wathatha isinkwa, esebongile uNkulunkulu phambi kwabo bonke, wasihlephula, waqala ukudla.

³⁶ Basebesima isibindi bonke, badla labo.

³⁷ Thina sonke esasisemkolweni sasingabantu abangamakhulu amabili lamatshumi ayisikhombisa lesithupha.

³⁸ Sebedlile basutha baphungula umkolo ngokuphosela olwandle amabele.

³⁹ Sekusile, kabalazanga ilizwe, kodwa babona itheku elilesihlabathi, bamisa ukuba baqhubele umkolo kulo, uba kungenzeka.

⁴⁰ Basebequma ingwegwe, baziyekela olwandle, bathukulula lamagoda abophe amaphini okuqondisa umkolo, baphakamisela emoyeni amasayili angaphambili, baqonda okhunjini.

⁴¹ Bafika endaweni lapho amanzi ahlangana khona, bawuqhubela umkolo esihlabathini, isihloko sawo sagxumekeka, sema singanyikinyeki, kodwa ingemva yomkolo yaphulwa ngamavinqo.

⁴² Abebutho babeqonde ukubulala izibotshwa, funa ezinye zibaleke ngokuhlamba;

⁴³ kodwa induna yekhulu ifisa ukusilisa uPawuli yabavimbela ukwenza lokho ababekuqondile, yalaya ukuba labo abakwaziyo ukuhlamba baziphosele kuqala olwandle, baye emhlabathini,

⁴⁴ abaseleyo balandele, abanye ngengodo, labanye ngencezu zomkolo. Ngokunjaloke kwenzeka ukuba bonke bafinyelele emhlabathini besilile.