Imisebenzi 22 - iBhayibhili Elingcwele 1978

UPawuli ulandisa abaJuda ngokuphenduka kwakhe

¹ Bobaba, labazalwane, zwanini ukuziphendulela kwami engikwenza phambi kwenu.

² Kwathi sebezwile ukuba ukhuluma labo ngolimi lwamaHeberu, bathula kakhulu, wasesithi:

³ Mina ngingumJuda owazalelwa eTarsusi elaseKilikhiya, kodwa ngakhulela kulumuzi, ngasenyaweni zikaGamaliyeli ngafundiswa ngokuqinileyo umlayo wabokhokho ngitshisekela uNkulunkulu njengani lonke lamhlanje.

⁴ Ngazingela abantu baleyoNdlela kwaze kwaba sekufeni, ngibabopha, ngibanikela entolongweni abesilisa labesifazana,

⁵ njengokuba umpristi omkhulu lomphakathi wonke wabadala ungangifakazela, ngazuza kubo incwadi eziya kubazalwane, ngaya eDamaseko ukuba lababekhona lapho ngibalethe eJerusalema bebotshiwe, ukuze batshaywe.

⁶ Kwathi ngisahamba sengisondela eDamaseko phakathi kwemini, kwahle kwangizingelezela ukukhanya okukhulu okuvela ezulwini.

⁷ Ngawela phansi, ngezwa ilizwi lisithi kimi: Sawuli, Sawuli, ungizingelelani na?

⁸ Ngaphendula ngathi: Ungubani, Nkosi, na? Wathi kimi: NginguJesu waseNazaretha omzingelayo.

⁹ Labo ababelami bakubona ukukhanya, kodwa kabalizwanga ilizwi lalowo owakhuluma lami.

¹⁰ Ngathi: Ngenzeni, Nkosi, na? INkosi yathi kimi: Sukuma, uye eDamaseko, uzakutshelwa khona konke okumiselwe ukuba ukwenze.

¹¹ Njengokuba ngangingasaboni ngenxa yenkazimulo yalokhokukhanya, ngadonswa ngesandla yilabo ababelami, ngafika eDamaseko.

¹² UAnaniya othile, indoda ekholwayo ngokomlayo, eyayinconywa yibo bonke abaJuda abahlala khona,

¹³ weza kimi, wema phansi kwami, wathi kimi: Sawuli, mzalwane, buya ubone futhi. Mina ngasengibona ngalesosikhathi, ngamkhangela.

¹⁴ Wasesithi: UNkulunkulu wabokhokho ukumisile ukuba uyazi intando yakhe, lokuba ubone oLungileyo, uzwe ilizwi eliphuma emlonyeni wakhe,

¹⁵ ngoba uzakuba ngufakazi wakhe kubo bonke abantu walokho okubonileyo lokuzwileyo.

¹⁶ Pho, usalindeleni na? Sukuma, ubhaphathizwe, uhlanjululwe ezonweni zakho ngokukhuleka ebizweni lakhe.

¹⁷ Kwathi sengibuyele eJerusalema ngikhuleka ethempelini, ngafikelwa yisiyezi,

¹⁸ ngambona; wathi kimi: Phangisa uphume eJerusalema, ngoba kabazukubamukela ubufakazi bakho ngami.

¹⁹ Ngasengisithi: Nkosi, bayazi bona ukuthi yimi engangibabopha ngibatshaya emasinagogeni wonke labo abakholwa kuwe;

²⁰ lamuhla kuchithwa igazi likaStefane ufakazi wakho, ngangimi khona mina, ngivuma, ngilondoloze ingubo zalabo abambulalayo.

²¹ Wasesithi: Hamba, ngoba ngizakukuthumela khatshana kwabezizwe.

AbaJuda bafuna ukumbulala uPawuli

²² Bamlalela kwaze kwafika kulelolizwi; basebephakamisa ilizwi labo, bathi: Msuseni umuntu onje emhlabeni! Ngoba kakufanele ukuba asile.

²³ Kwathi besamemeza, bezunguza ingubo zabo, bephosa uthuli emoyeni,

²⁴ induna enkulu yalaya ukuba angeniswe endlini yamabutho, yathi kahlolwe ngokutshaywa, ukuze ibone ukuthi kungani bememeza kangaka ngaye.

²⁵ Kwathi sebembophile ngemichilo, uPawuli wathi enduneni yekhulu eyayimi khona: Kuvunyelwe yini ukutshaya umuntu ongumRoma engalahlwanga licala na?

²⁶ Induna yekhulu isikuzwile lokhu yaya enduneni enkulu, yathi kuyo: Uzakwenza njani na? Ngoba lumuntu ungumRoma.

²⁷ Ngakho induna enkulu yafika, yathi kuye: Ngitshele, wena ungumRoma na? Yena wathi: Yebo.

²⁸ Induna enkulu yaphendula yathi: Mina ngalithenga lelolungelo ngemali enkulu. UPawuli wathi: Kodwa mina ngazalwa lalo.

²⁹ Ngakho labo ababezakumhlola basuka kuye masinyane; lenduna enkulu layo yesaba isisazi ukuthi uPawuli ungumRoma lokuthi ibimbophile.

³⁰ Kwathi kusasa ifuna ukwazi iqiniso lalokhu abaJuda abammangalela ngakho, yamkhulula, yalaya ukuba abapristi abakhulu lomphakathi wonke ubuthane, yamletha uPawuli yammisa phambi kwabo.