Imisebenzi 20 - iBhayibhili Elingcwele 1978

UPawuli useMakedoniya

¹ Sesiphelile isiyaluyalu, uPawuli wabiza abafundi, esebakhuthazile wabavalelisa, wasuka waya eMakedoniya.

² Esedabule lezondawo, ebakhuthaza kakhulu, wafika elizweni lamaGriki,

³ wahlala khona inyanga ezintathu. AbaJuda sebenze icebo ngaye esezakusuka ngomkolo ukuya eSiriya, wazimisela ukubuyela emuva adabule eMakedoniya.

⁴ Waphelekezelwa nguSopatheri waseBeriya indodana kaPiru, labaseTesalonika uAristako loSekhundu, loGayu waseDerbe, loTimothi, labaseAsiya uTikiko loTrofimu.

⁵ Laba bahamba ngaphambi kwethu, basilindela eTrowasi.

⁶ Kodwa sasuka ngomkolo eFiliphi emva kwensuku zesinkwa esingelamvubelo, safika eTrowasi emva kwensuku ezinhlanu, sahlala khona insuku eziyisikhombisa.

UPawuli uvusa uYutiku ekufeni

⁷ Kwathi ngosuku lokuqala lweviki, sesibuthene ukuba sihlephule isinkwa, uPawuli wakhuluma labo eqonde ukuhamba kusasa, welula inkulumo yakhe kwaze kwaba phakathi kobusuku.

⁸ Kwakukhona izibane ezinengi endlini ephezulu esasibuthene kiyo.

⁹ Kwakuhlezi ngasewindini insizwa ethiwa nguYutiku, eyajunywa yibuthongo obukhulu. UPawuli esekhulume isikhathi eside isiyahlulwe yibuthongo, yawela phansi isuka esitezi sesithathu, yadojwa isifile.

¹⁰ Kodwa uPawuli wehla, waziphosela phezu kwayo, wayisingatha, wathi: Lingakhathazeki, ngoba umphefumulo wayo usekhona kiyo.

¹¹ Esenyukile uPawuli wahlephula isinkwa, wadla waxoxa labo isikhathi eside, wasehamba.

¹² Basebemthatha umfana esilile, bathokoza kakhulu.

UPawuli useMilethu; uvalelisa abaseEfesu

¹³ Thina sahamba ngaphambili ukuya emkolweni, sasuka ngomkolo saya eAsosi siqonde ukumkhwelisa uPawuli lapho; ngoba wayemisile ngokunjalo, yena ebezakuhamba ngenyawo.

¹⁴ Esehlangene lathi eAsosi, samkhwelisa, safika eMithilene.

¹⁵ Sasuka lapho ngomkolo kusasa safika maqondana leKiyosi; langomhlomunye sasondela eSamosi; ngosuku olulandelayo safika eMilethu.

¹⁶ Ngoba uPawuli wayezimisele ukuyiceza iEfesu ukuze angalibali eAsiya; wayephanga ukuba abe seJerusalema, uba kungenzeka, ngosuku lwePentekoste.

¹⁷ EseMilethu wathumela eEfesu, wabiza abadala bebandla.

¹⁸ Kwathi sebefikile kuye, wathi kubo: Liyazi lina ukuba kusukela osukwini lokuqala lokufika kwami eAsiya ukuthi ngangihlezi njani isikhathi sonke phakathi kwenu,

¹⁹ ngakhonza iNkosi ngakho konke ngokuthobeka, langezinyembezi, langokulingwa okwangehlela ngamacebo abaJuda,

²⁰ lokuthi kangigodlanga lutho olusizayo kini, ngalifundisa phambi kwabantu lakuzo izindlu ngezindlu,

²¹ ngifakaza kubaJuda lakumaGriki ukuphendukela kuNkulunkulu lokukholwa iNkosi yethu uJesu Kristu.

²² Khathesi, khangelani, ngenyukela eJerusalema ngiqhutshwa nguMoya ngingakwazi okuzakungehlela lapho,

²³ kuphela uMoya oNgcwele uyangifakazela emizini yonke ukuthi ukubotshwa lokuhlupheka kungilindele.

²⁴ Kodwa ukusila kwami angikutshayi into enkulu leligugu kimi, kuphela ukuba ngiphelelise uhambo lwami lenkonzo engayamukela eNkosini uJesu eyokufakaza ngevangeli lomusa kaNkulunkulu.

²⁵ Khathesi, ngiyazi ukuthi kalisayikubona ubuso bami lina lonke engihamba phakathi kwenu, ngitshumayela umbuso.

²⁶ Ngakhoke ngiyafakaza kini ngalolusuku lwalamuhla ukuthi ngimhlophe kulo igazi labantu bonke.

²⁷ Ngoba kangiyekelanga ukulitshela lonke icebo likaNkulunkulu.

²⁸ Ziqapheleni lina lawo wonke umhlambi alibeke kuwo uMoya oNgcwele ukuba libe ngababonisi bokwalusa ibandla leNkosi ezizuzele lona ngegazi layo.

²⁹ Ngiyazi ukuthi emva kokuhamba kwami kuzakungena impisi eziphangayo phakathi kwenu zingawuhawukeli umhlambi,

³⁰ laphakathi kwenu kuzakuvela amadoda akhuluma izinto eziduhisayo, ukuze ahuge abafundi ukuba bawalandele.

³¹ Ngakho lindani, likhumbule ukuthi okweminyaka emithathu ebusuku lemini kangiyekelanga ukuleluleka lonke ngenyembezi.

³² Ngakhoke sengilinikeza kuNkulunkulu laselizwini lomusa wakhe, elilamandla okulakha lokulabela ilifa phakathi kwabo bonke abamahlukaniselweyo.

³³ Kangihawukelanga isiliva legolide lezambatho zamuntu;

³⁴ lina uqobo lwenu liyazi ukuthi lezizandla zasebenzela inswelo zami lezalabo ababelami.

³⁵ Kukho konke ngilitshengisile ukuthi kumele ukuba sisize ababuthakathaka ngokusebenza okunjalo, sikhumbule amazwi eNkosi uJesu ukuthi yena wathi: Kubusisekile ukupha kulokwamukela.

³⁶ Esetshilo lokhu waguqa phansi labo bonke, wakhuleka.

³⁷ Bakhala bonke, bamgona uPawuli, bamanga,

³⁸ belosizi kakhulu ngelizwi alitshoyo elokuthi kabasayikubona ubuso bakhe futhi. Bamphelekezela, baya laye emkolweni.