Imisebenzi 2 - iBhayibhili Elingcwele 1978

Ukufika kukaMoya oNgcwele

¹ Kwathi selufikile usuku lwePentekoste, babebuthene ndawonye bonke.

² Kwathi kungananzelelwe kwezwakala umdumo ovela ezulwini onjengowokuvunguza komoya olamandla; wagcwalisa indlu yonke ababehlezi kuyo.

³ Kwasekubonwa yibo inlimi ezehlukeneyo kungathi ngezomlilo; zehla zahlala phezu kwalowo lalowo wabo.

⁴ Basebegcwala uMoya oNgcwele, baqala ukukhuluma ngezinye indimi njengalokhu uMoya wabanika ukuphumisela.

⁵ Kwakuhlala eJerusalema abaJuda, amadoda akholwayo evela kuzo zonke izizwe ezingaphansi kwezulu;

⁶ kwathi kuzwakele lowomdumo, ixuku labuthana ndawonye, lamangala, ngoba ilowo lalowo wabezwa bekhuluma ngolimi lwakibo.

⁷ Bamangala, bababuza bathi: Khangelani, bonke laba abakhulumayo kayisibo abaseGalili na?

⁸ Kungani, pho, ukuba sonke sibezwe bekhuluma ngolimi lwakithi na?

⁹ AmaPathiya, lamaMede, lamaElamu, labakhe eMesopotamiya, laseJudiya, laseKaphadosiya, lasePontusi, laseAsiya,

¹⁰ laseFrigiya, lasePamfiliya, laseGibithe, lasemazweni aseLibiya eduze leKurene, lezihambi ezivela eRoma, labaJuda labezizwe abakholwayo,

¹¹ labaseKrete labaseArabiya, siyabezwa bekhuluma ngendimi zakithi ngemisebenzi emikhulu kaNkulunkulu.

¹² Bonke bamangala, badideka, bakhulumisana besithi: Yikuthini lokhu na?

¹³ Kodwa abanye behlekisana ngabo bathi: Basuthi iwayini elitsha.

Intshumayelo kaPetro

¹⁴ Kodwa uPetro wasesukuma labalitshumi lanye, waphakamisa ilizwi lakhe, wakhuluma wathi kibo: Madoda aseJudiya, lani lonke elihlala eJerusalema, yazini lokhu, lilalele amazwi ami.

¹⁵ Lababantu kabadakwanga njengokucabanga kwenu, ngoba kusesekuseni;

¹⁶ kodwa lokhu yikho okwakhulunywa ngumprofethi uJoweli okukuthi:

¹⁷ Kuzakuthi ensukwini zokuphela, utsho uNkulunkulu, ngizakuthela uMoya wami phezu kwabantu bonke; amadodana enu lamadodakazi enu azakwazisela, lensizwa zenu zibone imibono, labadala benu baphuphe amaphupho;

¹⁸ yebo, laphezu kwenceku zami lencekukazi zami ngizakuthela uMoya wami ngalezonsuku, zizakwazisela.

¹⁹ Ngizakuveza izimangaliso ezulwini phezulu, lezibonakaliso emhlabeni phansi, igazi, lomlilo, lokuthunqa kwentuthu.

²⁰ Ilanga lizakuphenduka umnyama, lenyanga ibe ligazi, lungakafiki usuku olukhulu loludumisekayo lweNkosi.

²¹ Kuzakuthi ilowo lalowo obiza ibizo leNkosi, uzakusiliswa.

²² Madoda akoIsrayeli, zwanini amazwi ami. UJesu waseNazaretha, umuntu ofakazelwe nguNkulunkulu phambi kwenu ngemisebenzi yamandla langezimangaliso langezibonakaliso uNkulunkulu azenza ngaye phakathi kwenu, njengalokhu lisazi lina uqobo lwenu,

²³ yena lo, esenikelwe ngecebo elimisiweyo langokwazi okuphambili kukaNkulunkulu, lambethela lina ngezandla zabangelamthetho, lambulala;

²⁴ yena uNkulunkulu wamvusa esethukulule ubuhlungu bokufa, ngoba kwakungelakwenzeka ukuba abanjwe yikho.

²⁵ Ngoba uDavida uthi ngaye: Ngayibona iNkosi phambi kwami njalonjalo, ngoba ingakwesokunene sami, ukuze nginganyikinyeki.

²⁶ Ngakhoke inhliziyo yami yajabula, lolimi lwami lwathokoza; ngitsho lomzimba wami uzakuhlala ngokuthemba.

²⁷ Ngoba kawuyikuwutshiya umphefumulo wami endaweni yabafileyo, njalo kawuyikuvuma ukuba ongcwele wakho abone ukubola.

²⁸ Wangazisa indlela zokuphila; uzakungigcwalisa ngokujabula ebusweni bakho.

²⁹ Bazalwane, ake ngikhulume kini ngokucacileyo ngokhokho uDavida ukuthi wafa, wambelwa, leliba lakhe lisekhona kithi kuze kube lamuhla.

³⁰ Yena engumprofethi, ekwazi ukuthi uNkulunkulu wafunga ngesifungo kuye ukuba enzalweni yakhe uzakubeka omunye esihlalweni sakhe sobukhosi,

³¹ ebonile ngaphambili, wakhuluma ngokuvuka kukaKristu ukuthi katshiywanga endaweni yabafileyo, lenyama yakhe kayikubonanga ukubola.

³² UJesu lo, uNkulunkulu wamvusa, singofakazi balokhu thina sonke.

³³ Ngakhoke ephakanyiselwe ngakwesokunene sikaNkulunkulu, esamukele kuYise isithembiso sikaMoya oNgcwele, uthelile lokhu elikubonayo lelikuzwayo.

³⁴ Ngoba uDavida kenyukelanga ezulwini, kodwa yena uqobo lwakhe uthi: INkosi yathi eNkosini yami: Hlala ngakwesokunene sami,

³⁵ ngize ngenze izitha zakho zibe yisigcabha senyawo zakho.

³⁶ Ngakho indlu kaIsrayeli yonke kayazi impela ukuthi uNkulunkulu umenzile iNkosi loKristu uJesu lo elambethelayo.

Ukuphenduka lokubhaphathizwa kwabazinkulungwane ezintathu

³⁷ Bathi ukuzwa lokhu bahlabeka enhliziyweni, bathi kuPetro lakwabanye abaphostoli: Bazalwane, senze njani na?

³⁸ UPetro wathi kubo: Phendukani, libhaphathizwe lonke ebizweni likaJesu Kristu ukuba lithethelelwe izono zenu; kung’khona lizakwamukela isiphiwo sikaMoya oNgcwele.

³⁹ Ngoba isithembiso ngesenu lesabantwana benu, lesabo bonke abakhatshana, bonke ezakubabizela kuyo iNkosi uNkulunkulu wethu.

⁴⁰ Wafakaza langamanye amazwi amanengi, wabalaya wathi: Zisiliseni kulesisizukulwana esiphambeneyo.

⁴¹ Ngakho abalamukelayo ilizwi lakhe babhaphathizwa, kwengezelelwa ngalolosuku abantu abangaba zinkulungwane ezintathu.

Ibandla laseJerusalema

⁴² Bakhuthalela ukufundisa kwabaphostoli, lokuhlangana lokuhlephula isinkwa, lokukhuleka.

⁴³ Wonke umuntu wehlelwa yikwesaba; kwenziwa ngabaphostoli izimangaliso lezibonakaliso ezinengi.

⁴⁴ Bonke abakholwayo babendawonye, behlanganyela izinto zonke;

⁴⁵ bathengisa izinto zabo lempahla zabo, babelana bonke njengokuswela kwabo.

⁴⁶ Insuku ngensuku bakhuthalela nganhliziyonye ukuhlangana ethempelini, behlephula isinkwa emakhaya abo, badla ukudla kwabo ngentokozo langenhliziyo emhlophe,

⁴⁷ bedumisa uNkulunkulu, bethandeka ebantwini bonke. INkosi yengezelela kubo insuku ngensuku labo abasiliswayo.