Imisebenzi 16 - iBhayibhili Elingcwele 1978

UPawuli useAsiya

¹ Waya wafika eDerbe laseListra. Kwakukhona lapho umfundi othiwa nguTimothi, indodana yowesifazana ongumJuda okholwayo, kodwa uyise wayengumGriki;

² wayenconywa ngabazalwane baseListra laseIkoniyuma.

³ UPawuli wathanda ukuba uTimothi ahambe laye; ngakho wamthatha, wamsoka ngenxa yabaJuda ababekhona kulezondawo; ngoba bonke babemazi ukuthi uyise ungumGriki.

⁴ Kwathi bedabula imizi, babanika izigqibo ezagqitshwa ngabaphostoli labadala eJerusalema ukuba bazilondoloze.

⁵ Ngakhoke amabandla aqiniswa ekukholweni, anda ngobunengi insuku ngensuku.

UPawuli uwelela eMakedoniya

⁶ Basebedabula ilizwe laseFrigiya lelaseGalathiya, balelwa nguMoya oNgcwele ukukhuluma ilizwi eAsiya.

⁷ Sebefikile maqondana leMisiya, balinga ukuya eBithiniya, kodwa uMoya kaJesu kabavumelanga.

⁸ Ngakho bayiceza iMisiya, behlela eTrowasi.

⁹ Kwabonakala kuPawuli umbono ebusuku; indoda yaseMakedoniya yayimi imncenga isithi: Welela eMakedoniya, usisize.

¹⁰ Esewubonile umbono, safuna masinyane ukuwelela eMakedoniya, sisithi uNkulunkulu usibizele ukutshumayela ivangeli kibo.

UPawuli utshumayela eFiliphi

¹¹ Ngakho sasuka eTrowasi ngomkolo, saqonda eSamotrake, ngosuku olulandelayo saya eNeyapholi.

¹² Sasuka lapho saya eFiliphi, umuzi omkhulu wesigaba saseMakedoniya; lapho kwakuhlala amabutho amaRoma. Kulowomuzi sahlala insuku ezithile.

¹³ Ngosuku lweSabatha saphumela ngaphandle kwesango lomuzi ngasemfuleni, lapho esasisithi kulendawo yokukhuleka khona; sahlala phansi, sakhuluma labesifazana ababebuthene lapho.

¹⁴ Owesifazana othile othiwa nguLidiya, ongumthengisi wamalembu ayibubende, owemzini othiwa yiTiyathira, okhonza uNkulunkulu, wasizwa, iNkosi yavula inhliziyo yakhe ukuba alalele okwakhulunywa nguPawuli.

¹⁵ Kuthe esebhaphathiziwe kanye lendlu yakhe, wasincenga esithi: Uba lingibona ukuthi ngithembekile eNkosini, wozani endlini yami lihlale khona. Wasicindezela.

Ukubotshwa kukaPawuli

¹⁶ Kwathi sisiya endaweni yokukhuleka, sahlangana lentombazana eyisigqili elomoya wokuhlahluba, eyayizuzela abaniniyo inzuzo enengi ngokuvumisa.

¹⁷ Yona yamlandela uPawuli lathi, isithi: Lababantu bazinceku zikaNkulunkulu oPhezukonke ezisitshumayeza indlela yokusiliswa.

¹⁸ Lokhu yakwenza insuku ezinengi. Kwathi uPawuli esenengiwe waphenduka, wathi kumoya: Ngiyakulaya ngebizo likaJesu Kristu, phuma kuyo. Wahle waphuma ngalesosikhathi.

¹⁹ Abaniniyo sebebonile ukuthi ithemba lenzuzo yabo liphelile, babamba uPawuli loSilasi, babadonsela emdangeni bababeka phambi kwababusi.

²⁰ Sebebalethile enduneni, bathi: Lababantu bengabaJuda badunga umuzi wethu;

²¹ bafundisa imikhuba esingavunyelwa ukuyamukela, siyenze thina esingamaRoma.

²² Lexuku labelekelela, lenduna zabadabulela ingubo zabo, zalaya ukuba batshaywe ngenduku;

²³ sebebatshayile imivimvinya eminengi, babaphosa entolongweni, balaya umlindintolongo ukuba abalondoloze.

²⁴ Yena elayiwe ngokunjalo wabafaka entolongweni ephakathi, wabophela inyawo zabo ezigodweni.

Ukuphenduka komlindintolongo

²⁵ Kodwa phakathi kobusuku uPawuli loSilasi babekhuleka bedumisa uNkulunkulu ngamahubo, lezibotshwa zazibalalele.

²⁶ Kwathi masinyane kwaba khona ukuzamazama okukhulu, kwaze kwanyikinyeka izisekelo zentolongo; kwavuleka masinyane iminyango yonke, kwathukuluka lezibopho zabo bonke.

²⁷ Kwathi umlindintolongo ephaphama, wabona iminyango yentolongo ivulekile; wakhokha umhedla wakhe efuna ukuzibulala, ngoba esithi izibotshwa zibalekile.

²⁸ Ngakho uPawuli wamemeza ngelizwi elikhulu, wathi: Ungazilimazi, ngoba sikhona sonke.

²⁹ Wasebiza ukuba kulethwe izibane, wagijimela phakathi ethuthumela ngokwesaba, wawela phansi phambi kukaPawuli loSilasi.

³⁰ Wasebakhuphela phandle, wathi: Madoda, ngenzeni ukuze ngisiliswe na?

³¹ Bona bathi kuye: Kholwa eNkosini uJesu, uzakusiliswa wena lendlu yakho.

³² Basebemtshumayeza ilizwi leNkosi, yena labo bonke ababesendlini yakhe.

³³ Wabathatha ngalesosikhathi sobusuku, wagezisa amanxeba abo, wabhaphathizwa khona lapho labo bonke abendlu yakhe.

³⁴ Wasebesa endlini yakhe, wabeka ukudla phambi kwabo, wathokoza kanye lendlu yakhe yonke ngokukholwa kuNkulunkulu.

³⁵ Kwathi sekusile, induna zathumela amanxusa zisithi: Khululani labobantu bahambe.

³⁶ Umlindintolongo wabikela uPawuli lawomazwi esithi: Induna zithumele ukuba likhululwe. Ngakhoke phumani, lihambe ngokuthula.

³⁷ Kodwa uPawuli wathi kubo: Basitshayile obala singalahlwanga licala, thina singamaRoma, basiphosela entolongweni; khathesi sebefuna ukusikhulula ngensitha na? Atshi, kabeze bona, basikhuphe.

³⁸ Amanxusa azibikela izinduna lawomazwi. Zona zesaba sezisizwa ukuba bangamaRoma.

³⁹ Ngakho zeza zabancenga; zabakhupha, zabacela ukuba baphume emzini.

⁴⁰ Ngakho basebephuma entolongweni, bangena koLidiya; kwathi sebebabonile abazalwane, bakhuluma amazwi okubaqinisa, basuka bahamba.