Imisebenzi 13 - iBhayibhili Elingcwele 1978

Uhambo lokuqala lukaPawuli. Ukuthunywa kukaPawuli loBarnabasi

¹ Kwakukhona ebandleni laseAntiyoki abaprofethi labafundisi, oBarnabasi, loSimiyoni othiwa nguNigeri, loLukiyu waseKurene, loManayeni owayondliwe kanye loHerodi umbusi, loSawuli.

² Kwathi bekhonza iNkosi, bezila ukudla, uMoya oNgcwele wathi: Ngahlukaniselani oBarnabasi loSawuli ukuba baye emsebenzini engibabizele wona.

³ Sebezile ukudla bakhuleka, babeka izandla zabo phezu kwabo, babathuma.

UPawuli utshumayela eKuprosi

⁴ Bonake sebethunyiwe nguMoya oNgcwele behlela eSelukiya; basuka lapho, baya eKuprosi ngomkolo.

⁵ Sebefikile eSalamisi batshumayela ilizwi likaNkulunkulu emasinagogeni abaJuda; babeloJohane engumsizi wabo.

⁶ Kwathi sebedabule isihlenge sonke, bafika ePafosi, bafumana indoda ethile eyisanuse lomprofethi wamanga, umJuda othiwa nguBarjesu,

⁷ wayelombusi uSegiyu Pawuli, indoda ehlakaniphileyo. Yena wabiza uBarnabasi loSawuli efuna ukuzwa ilizwi likaNkulunkulu.

⁸ Lesisanuse, uEluma, ngoba litsho njalo ibizo lakhe, waphikisana labo efisa ukuphambukisa umbusi ekukholweni.

⁹ Kodwa uSawuli othiwa nguPawuli, egcwele uMoya oNgcwele, wamjolozela

¹⁰ wathi: Wena ndodana kaSathane, uyisitha sakho konke ukulunga, ugcwele inkohliso yonke lobubi bonke, kawuyekeli ukuphambukisa indlela eziqondileyo zeNkosi na?

¹¹ Khangela, isandla seNkosi siphezu kwakho; uzakuba yisiphofu okwesikhathi ungaliboni ilanga. Kwasekumfikela masinyane ukufiphala lomnyama, wahamba edinga abazamdonsa ngesandla.

¹² Kwang’khona umbusi esebonile okwenziweyo wakholwa, emangaliswa yimfundiso yeNkosi.

UPawuli utshumayela eAntiyoki lasePisidiya

¹³ UPawuli lababelaye basuka ePafosi ngomkolo, bafika ePerga elasePamfiliya; kodwa uJohane wehlukana labo, wabuyela eJerusalema.

¹⁴ Bona basuka ePerga baya eAntiyoki elasePisidiya; ngeSabatha bangena esinagogeni, bahlala phansi.

¹⁵ Sekufundiwe umlayo labaprofethi, abaphathi besinagoge bathumela kubo besithi: Bazalwane, uba lilelizwi lokulaya abantu, khulumani.

¹⁶ Ngakho uPawuli wasukuma, eqhweba ngesandla sakhe, wathi: Madoda akoIsrayeli, lani elesaba uNkulunkulu, lalelani.

¹⁷ UNkulunkulu walesisizwe sakoIsrayeli wakhetha okhokho, wabaphakamisa abantu bengabafokazana nje elizweni laseGibithe; wabakhupha kulo ngamandla amakhulu.

¹⁸ Wababekezelela okweminyaka engamatshumi amane enkangala.

¹⁹ Kodwa esechithile izizwe eziyisikhombisa elizweni laseKanani, wabanika ilizwe lazo libe ngelabo okweminyaka engamakhulu amane lamatshumi amahlanu;

²⁰ emva kwalokho wabanika abathonisisi kwaze kwavela uSamuweli umprofethi.

²¹ Basebecela inkosi; uNkulunkulu wabanika uSawuli indodana kaKishi, umuntu wesizwe sakoBenjamini, okweminyaka engamatshumi amane.

²² Esemkhuphile wabamisela uDavida abe yinkosi yabo, afakaza ngaye ngokuthi: Ngimfumene uDavida indodana kaJese, engumuntu engimthandayo, ozakwenza konke engikuthandayo.

²³ Enzalweni yalumuntu uNkulunkulu ulethele uIsrayeli uMsilisi uJesu njengokuthembisa kwakhe;

²⁴ engakafiki yena uJohane wayesetshumayele ubhaphathizo lokuphenduka kubo bonke abantu bakoIsrayeli.

²⁵ UJohane esezaqeda ukuhamba kwakhe wathi: Lowo elithi nginguye, kangisuye mina; kodwa emva kwami uyeza engingafanele ukukhumula amanyathelo enyawo zakhe.

²⁶ Bazalwane, madodana ohlanga lukaAbrahama, lalabo phakathi kwenu abesaba uNkulunkulu, lithunyelwe kithi ilizwi lokusiliswa.

²⁷ Ngoba labo abahlala eJerusalema lababusi babo kabamazanga yena, futhi kabaqedisisanga amazwi abaprofethi afundwayo amaSabatha wonke, kanti bawagcwalisa ngokumlahla;

²⁸ lanxa bengafumananga icala lokufa kuye kodwa bacela kuPilatu ukuba abulawe.

²⁹ Kwathi sebekugcwalisile konke okulotshiweyo ngaye, bamethula esiphambanweni, bambeka elibeni.

³⁰ Kodwa uNkulunkulu wamvusa kwabafileyo.

³¹ Wabonwa insuku ezinengi yilabo ababekhuphuke laye eGalili ukuya eJerusalema, asebengofakazi bakhe ebantwini.

³² Lathi sililethela ivangeli lesithembiso esenziwa kubokhokho

³³ ukuthi uNkulunkulu usigcwalisile sona kubantwana bethu ngokumvusa uJesu, njengokuba kulotshiwe futhi kulo ihubo lesibili ukuthi: Wena uyiNdodana yami, lamuhla ngikuzele.

³⁴ Mayelana lokumvusa kwakhe kwabafileyo lokuba engasayikubuyela ekuboleni wakhuluma ngokunje, wathi: Ngizakukunika izithembiso ezingcwele lezithembekileyo zikaDavida.

³⁵ Njalo kwelinye ihubo uthi: Kawuyikuvuma ukuba ongcwele wakho abone ukubola.

³⁶ Ngoba uDavida eselenzile icebo likaNkulunkulu esizukulwaneni sakhe, wafa, waya kwabaphansi, wabona ukubola.

³⁷ Kodwa lowo uNkulunkulu amvusayo kakubonanga ukubola.

³⁸ Ngakhoke yazini, bazalwane, ukuthi ngalowo kutshunyayelwa kini ukuthethelelwa kwezono;

³⁹ ngaye ilowo lalowo okholwayo uzalungisiswa kukho konke abengelungisiswe kukho ngomlayo kaMose.

⁴⁰ Ngakho qaphelani, funa lehlelwe yilokhu okwakhulunywa ngabaprofethi okokuthi:

⁴¹ Khangelani lina zideleli, limangale, libhubhe, ngoba mina ngenza imisebenzi ensukwini zenu, imisebenzi elingayikuyikholwa, lanxa umuntu elilandisela ngayo.

Ilizwi lamukelwa ngabezizwe liphikwa ngabaJuda

⁴² Ekuphumeni kwabo esinagogeni abantu bacela ukuba lawomazwi akhulunywe futhi ngeSabatha elilandelayo.

⁴³ Kwathi inkonzo yesinagoge isiphumile, abaJuda abanengi labezizwe abakholwayo balandela uPawuli loBarnabasi; bona bakhuluma labo, bebakhuthaza ukuba babambelele emuseni kaNkulunkulu.

⁴⁴ NgeSabatha elilandelayo babuthana, kwaphose kwaba ngumuzi wonke ukuzwa ilizwi likaNkulunkulu.

⁴⁵ Kodwa abaJuda bebona ixuku bagcwala umona, baphikisa lokho okwakhulunywa nguPawuli bemhlambaza.

⁴⁶ Kwang’khona uPawuli loBarnabasi bekhuluma ngesibindi besithi: Kwakudingeka ukuthi ilizwi likaNkulunkulu litshunyayelwe kini kuqala; kodwa njengoba lilala, lizenza libe ngabangafanele ukuphila okungapheliyo, khangelani, sesisiya kwabezizwe.

⁴⁷ Ngoba iNkosi isilayile yathi: Ngikumisile ube yikukhanya kwabezizwe, ube yikusiliswa kuze kube semikhawulweni yomhlaba.

⁴⁸ Kwathi abezizwe bekuzwa lokho, bathokoza, balidumisa ilizwi likaNkulunkulu; bakholwa bonke ababemiselwe ukuphila okungapheliyo.

⁴⁹ Ngokunjalo ilizwi leNkosi landa kulo ilizwe lonke.

⁵⁰ Kodwa abaJuda bavusa abesifazana abalesithunzi abakholwayo lezikhulu zomuzi, bavusela uPawuli loBarnabasi ukuzingelwa, babaxotsha endaweni yabo.

⁵¹ Bona babathintithela uthuli lwenyawo zabo, badlulela eIkoniyuma.

⁵² Abafundi bagcwala intokozo loMoya oNgcwele.