Imisebenzi 12 - iBhayibhili Elingcwele 1978

Ukubotshwa lokukhululwa kukaPetro

¹ Ngalesosikhathi uHerodi inkosi welula izandla ukuba ahluphe abanye bebandla.

² Wabulala uJakobe umfowabo kaJohane ngomhedla.

³ Esebonile ukuba lokhu kuyabathokozisa abaJuda, waqhubeka wabamba uPetro laye. Kwakuzinsuku zesinkwa esingelamvubelo.

⁴ Wambamba, wamfaka entolongweni, wamnikela kwabebutho abalitshumi lesithupha ukuba bamlinde ngabane, eqonde ukumkhuphela ebantwini ngemva kwePhasika.

⁵ Ngakho uPetro wagcinwa entolongweni; kodwa ibandla lamkhulekela kakhulu kuNkulunkulu.

⁶ Kwathi ngobusuku uHerodi abezakumkhupha ngabo, uPetro wayelele phakathi kwabebutho ababili, ebotshiwe ngamaketane amabili, labalindi phambi komnyango babegcine intolongo.

⁷ Kwasekufika isithunywa seNkosi, lokukhanya kwakhanya entolongweni. Satshaya uPetro ohlangothini, samvusa sisithi: Sukuma masinyane. Asesiwa amaketane ezandleni zakhe.

⁸ Sathi kuye isithunywa: Gqoka, ufake amanyathelo akho. Wenze njalo. Sathi kuye: Yambatha ingubo yakho, ungilandele.

⁹ Waphuma wasilandela; wayengazi ukuba kuliqiniso okwenziwa yisithunywa, kodwa wayesithi ubona umbono.

¹⁰ Sebedlulile abalindi bokuqala labesibili bafika esangweni lensimbi elokuya emzini, lazivulekela ngokwalo, baphuma, bahamba umgwaqo wamunye; masinyane isithunywa samtshiya.

¹¹ UPetro eseqaqabukile wathi: Khathesi sengisazi ngeqiniso ukuthi iNkosi ithumile isithunywa sayo, yangikhulula esandleni sikaHerodi, lakukho konke obekulindelwe yisizwe sabaJuda.

¹² Sekumkhanyele lokho, wasuka waya endlini kaMariya unina kaJohane othiwa nguMarko, lapho kwakuhlangene khona abanengi bekhuleka.

¹³ Eseqoqodile esivalweni sesango, kwasabela intombazana ethiwa nguRoda, yeza;

¹⁴ isilizwile ilizwi likaPetro kayivulanga esangweni ngenxa yokuthokoza, kodwa yagijima yabika ukuthi uPetro umi esangweni.

¹⁵ Bathi kuye: Uyahlanya. Yona yaqinisa ukuthi kunjalo. Bathi: Yisithunywa sakhe.

¹⁶ Kodwa uPetro waqhubeka ukuqoqoda; sebevulile bambona, bamangala.

¹⁷ Wasebaqhweba ngesandla ukuba bathule, wabalandisela ukuba iNkosi imkhuphe kanjani entolongweni. Wasesithi: Bikelani uJakobe labazalwane. Wasuka waya kwenye indawo.

¹⁸ Sekusile, kwaba khona ukunyakazela okukhulu phakathi kwabebutho ngokuthi uPetro uye ngaphi.

¹⁹ UHerodi esemdingile engamfumani, wabuzisisa abalindi, walaya ukuba babulawe. Wasesuka eJudiya, wehlela eKesariya, wahlala khona.

Ukufa kukaHerodi

²⁰ UHerodi wayebathukuthelele abaseTire labaseSidoni; beza kuye nganhliziyonye; sebevumelene loBlastusi induna yendlu yenkosi, bacela ukuthula, ngoba ilizwe labo lalifunzwa ngelenkosi.

²¹ Ngosuku olumisiweyo uHerodi wambatha ingubo zakhe zobukhosi, wahlala esihlalweni sobukhosi, wenza inkulumo.

²² Abantu bamemeza bathi: Yilizwi likankulunkulu, kayisilo elomuntu.

²³ Masinyane isithunywa seNkosi samtshaya, ngoba kamdumisanga uNkulunkulu; wadliwa zimpethu, wafa.

²⁴ Kodwa ilizwi likaNkulunkulu lakhula, landa.

²⁵ UBarnabasi loSawuli babuya bevela eJerusalema sebeqedile umsebenzi wabo, babuya beloJohane othiwa nguMarko.