Imisebenzi 11 - iBhayibhili Elingcwele 1978

UPetro ulandisa eJerusalema indaba kaKorneliya

¹ Abaphostoli labazalwane ababeseJudiya bezwa ukuthi abezizwe labo balamukele ilizwi likaNkulunkulu.

² Ngakho kwathi ukuba uPetro enyukele eJerusalema, abokusoka baphikisana laye,

³ besithi: Wena ungene ebantwini abangasokanga, wadla labo.

⁴ Kodwa uPetro waqala ukubalandisela ngokulandelana esithi:

⁵ Mina ngangisemzini weJopha ngikhuleka; ngehlelwa yisiyezi, ngabona embonweni ulutho lusehla lunjengengubo enkulu lusehliswa ngamasondo amane luvela ezulwini, lwafika kimi.

⁶ Kwathi ukuba ngilukhangelisisa, ngabona izidalwa zomhlaba, ezihambayo lezihuquzelayo leziphaphayo.

⁷ Ngezwa ilizwi lisithi kimi: Petro, sukuma, uhlabe, udle.

⁸ Kodwa ngathi: Atshi, Nkosi, ngoba okubi lokungcolileyo kakuzake kungene emlonyeni wami.

⁹ Kwasekuzwakala ilizwi livela ezulwini, laphendula ngokwesibili lathi: Lokho uNkulunkulu akuhlambululeyo, ungatsho wena ukuthi kubi.

¹⁰ Lokhu kwenzeka kathathu, konke kwabuye kwabuyiselwa ezulwini.

¹¹ Ngalesosikhathi kwasekufika amadoda amathathu endlini esasingenise kuyo, ethunyiwe kimi evela eKesariya.

¹² UMoya wangitshela ukuba ngihambe lawo ngingathandabuzi; lababazalwane abayisithupha labo bahamba lami, sangena endlini yaleyondoda.

¹³ Yasibikela ukuthi yayibone isithunywa simi endlini yayo sisithi: Thumela eJopha, ubize uSimoni othiwa nguPetro

¹⁴ ozakukhuluma kuwe amazwi ozasiliswa ngawo, wena lendlu yakho yonke.

¹⁵ Kwathi ngisaqala ukukhuluma, uMoya oNgcwele wehlela phezu kwabo njengakithi ekuqaleni.

¹⁶ Ngakhumbula ilizwi leNkosi ukuba yathi: UJohane wabhaphathiza ngamanzi, kodwa lina lizakubhaphathizwa ngoMoya oNgcwele.

¹⁷ Ngakhoke uba uNkulunkulu ebanikile isiphiwo njengalokhu asinika thina esakholwa eNkosini uJesu Kristu, ngingubani mina ukuba ngimvimbele uNkulunkulu na?

¹⁸ Bathi sebekuzwile lokhu, bathula, bamdumisa uNkulunkulu besithi: Kanti uNkulunkulu unikile abezizwe labo ukuphendukela ekuphileni.

Amakholwa aseAntiyoki abizwa ngokuthi ngamaKristu

¹⁹ Labo abahlakazeka ngokuhlupheka okwaqala ngokufa kukaStefane bahamba baze bafika eFenekiya laseKuprosi laseAntiyoki bengalikhulumi ilizwi lakoyedwa kodwa kubaJuda kuphela.

²⁰ Kodwa kwakukhona abanye kubo, amadoda aseKuprosi laseKurene abathi befika eAntiyoki bakhuluma lakumaGriki, betshumayela ngeNkosi uJesu.

²¹ Isandla seNkosi sasilabo; kwakholwa abanengi, baphendukela eNkosini.

²² Zezwakala indaba zabo endlebeni zebandla laseJerusalema; bathumela uBarnabasi eAntiyoki.

²³ Kwathi ukuba afike, wabona umusa kaNkulunkulu, wathokoza, wabalaya bonke ukuba babambelele eNkosini ngokuzimisela kwenhliziyo.

²⁴ Ngoba wayeyindoda elungileyo, egcwele uMoya oNgcwele lokukholwa; kwengezelelwa eNkosini abantu abanengi.

²⁵ UBarnabasi wasesiya eTarsusi ukuba adinge uSawuli;

²⁶ kwathi esemfumene, wamletha eAntiyoki. Kwaba ngumnyaka wonke behlangana lebandla, bafundisa abantu abanengi. Kwaqala eAntiyoki ukuba abafundi babizwe ngokuthiwa ngamaKristu.

AmaKristu athumela iziphiwo kubazalwane baseJudiya

²⁷ Kwathi ngalezonsuku kwafika eAntiyoki abaprofethi bevela eJerusalema.

²⁸ Kwasukuma omunye wabo othiwa nguAgabusi, watshengisa ngoMoya ukuthi kuzakuba khona indlala enkulu emhlabeni wonke, eyaba khona ensukwini zikaKlawudiya.

²⁹ Abafundi bazimisela ukuba ilowo lalowo wabo athumele njengamandla akhe okokusiza abazalwane abahlala eJudiya.

³⁰ Bakwenzake, bakuthumela kwabadala ngezandla zaboBarnabasi loSawuli.