Imisebenzi 10 - iBhayibhili Elingcwele 1978

Umbono kaKorneliya

¹ Kwakukhona eKesariya indoda ethiwa nguKorneliya, eyinduna yekhulu yebutho elithiwa elaseItaliya;

² wayeyindoda ekholwayo lemesabayo uNkulunkulu kanye lendlu yayo yonke, inika abaJuda abangabayanga iziphiwo ezinengi, ikhuleka futhifuthi kuNkulunkulu.

³ Kwathi ngesikhathi semini yantambama, yabona embonweni isithunywa sikaNkulunkulu singena kuyo sisithi: Korneliya!

⁴ Wasijolozela esesaba, wathi: Kuyini, Nkosi? Sathi kuye: Imikhuleko yakho leziphiwo zakho kufinyelele kuNkulunkulu kwaba yisikhumbuzo phambi kwakhe.

⁵ Ngakhoke thuma amadoda eJopha alande uSimoni othiwa nguPetro;

⁶ yena ungenisile kuSimoni, umkhuhli, ondlu yakhe ingasolwandle.

⁷ Sesihambile isithunywa ebesikhuluma laye, wabiza ababili kwabendlu yakhe lowebutho okholwayo kulabo ababehlala laye,

⁸ walandisa konke, wabathuma eJopha.

UPetro wehlelwa yisiyezi

⁹ Kusasa besahamba sebesondela emzini, uPetro wenyukela phezu kwendlu ukuyakhuleka; kwakusemini.

¹⁰ Walamba, wafuna ukudla; kwathi besamlungisela wehlelwa yisiyezi,

¹¹ wabona izulu livulekile lolutho olunjengengubo enkulu, lusehliselwa ngamasondo amane emhlabeni.

¹² Kwakukhona kulo zonke inhlobo zezidalwa, ezihambayo lezihuquzelayo leziphaphayo.

¹³ Kwezwakala ilizwi, lisithi kuye: Petro, vuka, uhlabe, udle.

¹⁴ Kodwa uPetro wathi: Atshi, Nkosi, ngoba kangizake ngidle into embi lengcolileyo.

¹⁵ Ilizwi laphinda ngokwesibili lathi kuye: Lokho uNkulunkulu akuhlambululeyo, ungatsho wena ukuthi kubi.

¹⁶ Lokhu kwaphindwa kathathu; ulutho lolo lwabuyiselwa ezulwini.

¹⁷ UPetro esadidekile engqondweni yakhe ngokuthi ngabe uyini lowombono awubonileyo, kwafika amadoda ayethunywe nguKorneliya, esebuzile indlu kaSimoni, ema ngasesangweni,

¹⁸ amemeza ebuza ukuthi uSimoni othiwa nguPetro ungenisile lapho yini.

¹⁹ Kwathi uPetro esanakana ngombono, uMoya wathi kuye: Khangela, amadoda amabili ayakufuna;

²⁰ sukuma, wehle, uhambe lawo, ungathandabuzi, ngoba yimi engiwathumileyo.

²¹ UPetro wasesehlela kuwo, wathi: Yimi elimfunayo; yindaba bani eliza ngayo na?

²² Bathi: UKorneliya induna yekhulu, indoda elungileyo lemesabayo uNkulunkulu, ehlonitshwa yiso sonke isizwe sabaJuda, walayelwa yisithunywa esingcwele ukuba akubizele endlini yakhe, ezwe amazwi kuwe.

²³ Wasebangenisa endlini, bahlala laye. Kusasa wasuka wahamba labo, labazalwane abathile baseJopha bamphelekezela.

Ukufika kukaPetro endlini kaKorneliya

²⁴ Ngosuku olulandelayo bangena eKesariya. UKorneliya wayebalindele esebizile izihlobo zakhe labangane bakhe.

²⁵ Kwathi ukuba uPetro angene, uKorneliya wamhlangabeza, wawela phansi ngasenyaweni zakhe, wamkhonza.

²⁶ Kodwa uPetro emphakamisa wathi: Sukuma, lami ngingumuntu nje.

²⁷ Esakhuluma layo wangena, wafumana abantu abanengi bebuthene.

²⁸ Wathi kubo: Liyazi ukuba kakuvunyelwa ukuba umuntu ongumJuda ahlangane, ahambelane lomuntu wesinye isizwe; kodwa uNkulunkulu ungitshengisile ukuthi ngingatsho ukuba omunye umuntu mubi ingabe ungcolile.

²⁹ Yikho lokhu ngizile nxa ngibizwa, kangalanga. Ngakho sengibuza ukuba ungibizeleni na?

³⁰ UKorneliya wathi: Ngensuku ezine ezidlulileyo ngalesisikhathi ngangikhuleka endlini yami ngesikhathi semini yantambama; ngasengibona indoda imi phambi kwami yambethe ingubo ezikhazimulayo,

³¹ yathi kimi: Korneliya, ukukhuleka kwakho kuzwakele, lokupha kwakho iziphiwo kukhunjulwe phambi kukaNkulunkulu.

³² Ngakho thumela eJopha, ubize uSimoni othiwa nguPetro; yena ungenisile endlini kaSimoni umkhuhli, ngasolwandle.

³³ Ngasengithumela kuwe ngalesosikhathi; wenze kuhle ufike. Ngakho sesikhona lapha sonke phambi kukaNkulunkulu ukuba sizwe konke okulayelwe yiNkosi.

Intshumayelo kaPetro

³⁴ Kwang’khona uPetro wavula umlomo wakhe, wathi: Impela ngiyabona ukuthi uNkulunkulu kakhangeli ubuso bomuntu,

³⁵ kodwa ezizweni zonke omesabayo lowenza ukulunga uyamukeleka kuye.

³⁶ Yilo ilizwi alithumela kuIsrayeli, etshumayela ivangeli lokuthula ngoJesu Kristu; yena uyiNkosi yabo bonke.

³⁷ Liyalazi ilizwi elamenyezelwa eJudiya lonke, kusukela eGalili emva kobhaphathizo olwatshunyayelwa nguJohane

³⁸ lokuthi: UNkulunkulu wammisa uJesu waseNazaretha ngoMoya oNgcwele langamandla, lokuthi wahamba esenza okulungileyo, esilisa bonke labo ababesemandleni kaSathane, ngoba uNkulunkulu wayelaye.

³⁹ Lathi singofakazi bezinto zonke azenzayo elizweni labaJuda laseJerusalema, bambulala ngokumphanyeka esiphambanweni.

⁴⁰ Kodwa uNkulunkulu wamvusa ngosuku lwesithathu, wambonakalisa,

⁴¹ kungesikho kubo bonke abantu kodwa kithi esasikhethwe ngaphambili nguNkulunkulu ukuba ngofakazi, thina esadla sanatha kanye laye emva kokuvuka kwakhe kwabafileyo.

⁴² Wasilayela ukuba sitshumayele ebantwini, sifakaze ukuthi nguye omiswe nguNkulunkulu ukuba nguMthonisisi wabasilayo labafileyo.

⁴³ Ngaye bonke abaprofethi bafakaza ukuthi ngebizo lakhe bonke abakholwa kuye bazakwamukela ukuthethelelwa kwezono.

Ukubhaphathizwa kukaKorneliya labendlu yakhe

⁴⁴ Kwathi uPetro esakhuluma lawomazwi, uMoya oNgcwele wehlela phezu kwabo bonke abalizwayo ilizwi.

⁴⁵ AbaJuda abakholwayo ababefike loPetro bamangala, ngoba isiphiwo sikaMoya oNgcwele sathelwa laphezu kwabezizwe.

⁴⁶ Ngoba babezwa bekhuluma ngendimi, bedumisa uNkulunkulu. Kwang’khona uPetro wathi:

⁴⁷ Ukhona yini ongala lamanzi ukuba lababantu bangabhaphathizwa abamukele uMoya oNgcwele njengathi na?

⁴⁸ Waselayela ukuba babhaphathizwe ebizweni likaJesu Kristu. Bamcela ukuba ahlale labo insukwana.