Imisebenzi 1 - iBhayibhili Elingcwele 1978

Isingeniso

¹ Encwadini yokuqala ngaloba, Teyofilu, ngakho konke uJesu aqala ukukwenza lokukufundisa,

² kwaze kwaba lusuku akhutshulwa ngalo, esebalayile ngoMoya oNgcwele abaphostoli ayebakhethile.

³ Wazibonakalisa kubo ephilile, emva kokuhlupheka kwakhe, ngobufakazi obunengi, wabonwa yibo insuku ezingamatshumi amane ekhuluma ngombuso kaNkulunkulu.

⁴ Kwathi ehlezi labo, wabalaya ngokuthi: Lingasuki eJerusalema, kodwa lilindele isithembiso sikaBaba elasizwa ngami;

⁵ ngoba uJohane wabhaphathiza ngamanzi, kodwa lina lizakubhaphathizwa ngoMoya oNgcwele kungakadluli insuku ezinengi.

Ukwenyuka kukaJesu

⁶ Kwathi sebebuthene laye bambuza bathi: Nkosi, uzabuyisela umbuso kuIsrayeli kulesisikhathi na?

⁷ Wathi kubo: Kakusikho okwenu ukwazi isikhathi lemizuzu ayimisileyo uBaba ngamandla akhe;

⁸ kodwa lina lizakwamukela amandla, esefikile phezu kwenu uMoya oNgcwele, libe ngofakazi bami eJerusalema, lakulo lonke elaseJudiya laseSamariya kuze kube semikhawulweni yomhlaba.

⁹ Kwathi esetshilo lokho, wakhutshulwa bemkhangele; iyezi lamsusa emehlweni abo.

¹⁰ Bathi besajolozele ezulwini esenyuka, amadoda amabili ema labo embethe ingubo ezimhlophe,

¹¹ athi: Madoda aseGalili, limeleni lijolozele ezulwini? UJesu lo, osuswe kini wenyuselwa ezulwini, uzakubuya njengalokho limbone esiya ezulwini.

¹² Basebebuyela eJerusalema bevela entabeni ethiwa iOliveti eseduze leJerusalema, ummango wohambo lweSabatha.

¹³ Kwathi sebengenile, bakhuphukela endlini ephezulu, lapho babehlala khona, oPetro, loJohane, loJakobe, loAndreya, loFiliphu, loTomasi, loBartolomewu, loMathewu, loJakobe indodana kaAlfewu, loSimoni umZelothi, loJudasi indodana kaJakobe.

¹⁴ Bonke laba bakhuthalela ukukhuleka nganhliziyonye kanye labesifazana, loMariya unina kaJesu, labafowabo.

Ukukhethwa kukaMathiyasi

¹⁵ Ngalezonsuku uPetro wasukuma phakathi kwabazalwane, ixuku labantu ababekhona lalingaba likhulu lamatshumi amabili, wathi:

¹⁶ Bazalwane, kwakumele ukuba umbhalo ugcwaliseke owakhulunywa ngaphambili nguMoya oNgcwele ngomlomo kaDavida mayelana loJudasi owayengumholi walabo abambambayo uJesu,

¹⁷ ngoba wayebalwe kanye lathi, wanikwa isabelo sakhe kulinkonzo.

¹⁸ Lumuntu wathenga isiqinti ngomvuzo wobubi bakhe, wawa ngekhanda, wadabuka phakathi, lemibilini yakhe yachitheka;

¹⁹ kwaziwa yibo bonke abakhileyo eJerusalema, saze sabizwa lesosiqinti ngolimi lwabo ukuthi “iAkeldama”, okuyikuthi iSiqinti seGazi.

²⁰ Ngoba kulotshiwe encwadini yamaHubo ukuthi: Umuzi wakhe kawube lunxiwa kungabi khona ohlala kuwo, lokuthi: Isikhundla sakhe kasithathwe ngomunye.

²¹ Ngakhoke omunye kulawomadoda ayehamba lathi kuso sonke isikhathi, lapho iNkosi uJesu yayihamba phakathi kwethu,

²² kusukela obhaphathizweni lukaJohane kwaze kwaba lusuku akhutshulwa ngalo kithi, omunye wabo umele abe ngufakazi kanye lathi wokuvuka kwakhe.

²³ Basebemisa ababili, uJosefa othiwa nguBarsaba, othiwa futhi nguJustusi, loMathiyasi.

²⁴ Basebekhuleka besithi: Nkosi, wena owaziyo inhliziyo zabo bonke abantu, ake utshengise ukuba nguwuphi kulaba ababili omkhethileyo

²⁵ ukuba athathe isikhundla kulinkonzo lobuphostoli uJudasi asitshiya waya endaweni yakhe.

²⁶ Basebebenzela inkatho; inkatho yadla uMathiyasi; wabalwa kanye labaphostoli abalitshumi lanye.