AmaNani 9 - iBhayibhili Elingcwele 1978

Ukugcina iPhasika

¹ INkosi yakhuluma loMose enkangala yaseSinayi, ngenyanga yokuqala yomnyaka wesibili emva kokuphuma kwabo eGibithe,

² yathi: Abantu bakoIsrayeli kabagcine iPhasika ngesikhathi salo esimisiweyo.

³ Ngosuku lwetshumi lane lwenyanga le, kusihlwa, lizakuligcina, ngoba kuyisikhathi salo esimisiweyo; uligcine ngokwezimiso zalo langokwemithetho yalo.

⁴ Ngakhoke uMose watshela abantu bakoIsrayeli ukuthi kumele ukuba bagcine iPhasika.

⁵ Bagcina iPhasika enkangala yaseSinayi, ngenyanga yokuqala, ngosuku lwetshumi lane lwenyanga, kusihlwa.

⁶ Kwakukhona amadoda athile ayengahlambulukanga ngoba ayethinte isidumbu, ayengelakugcina iPhasika ngalolosuku. Eza phambi kukaMose loAroni ngalolosuku,

⁷ athi kubo: Thina kasihlambulukanga ngoba sithinte isidumbu; sivinjelelwani ukunikela umnikelo weNkosi ngesikhathi sawo esimisiweyo phakathi kwabakoIsrayeli na?

⁸ UMose wathi kuwo: Manini, ukuze ngizwe ukuthi iNkosi izakuthini ngani.

⁹ INkosi yathi kuMose:

¹⁰ Tshono ebantwini bakoIsrayeli uthi: Uba kukhona phakathi kwenu umuntu loba owenzalo yenu ongcoliswe yikuthinta isidumbu, loba osekuhambeni, kumele ukuba agcine iPhasika leNkosi.

¹¹ Abanjalo bazakuligcina ngenyanga yesibili, ngosuku lwetshumi lane, kusihlwa; bazakulidla lesinkwa esingelamvubelo lemibhida ebabayo.

¹² Kabayikutshiya lutho kuze kube sekuseni, bangephuli thambo lalo; bazakuligcina ngokwezimiso zonke zePhasika.

¹³ Kodwa lowo ohlambulukileyo, ongekho ekuhambeni owala ukugcina iPhasika, uzakukhutshwa ebantwini bakibo, ngoba kanikelanga umnikelo weNkosi ngesikhathi sawo esimisiweyo; lowo uzakuthwala isono sakhe.

¹⁴ Uba kuhlala phakathi kwenu owemzini othanda ukugcina iPhasika leNkosi ngokwesimiso sePhasika langokomthetho walo, kenze njalo. Lizakuba lesimiso sibe sinye kowemzini lakowokuzalwa elizweni.

Iyezi elaliphezu kweTabernakeli

¹⁵ Ngosuku iTabernakeli elamiswa ngalo, iyezi lasibekela iTabernakeli, ithente lobufakazi; kusukela kusihlwa kwaze kwaba sekuseni laliphezu kweTabernakeli likhanya njengomlilo.

¹⁶ Ngakho iyezi lalisibekela ithente sonke isikhathi, libonakale linjengomlilo ebusuku.

¹⁷ Kwakuthi lapho iyezi lisuka phezu kwethente labantu bakoIsrayeli basuke; lasendaweni lapho iyezi lima khona, labo bamise khona.

¹⁸ Abantu bakoIsrayeli bahamba, njalo bamisa, njengokulaya kweNkosi. Bahlala ezihonqweni ngesikhathi sonke iyezi elalihlala ngaso phezu kweTabernakeli.

¹⁹ Lalapho iyezi lihlala phezu kweTabernakeli insuku ezinengi, abakoIsrayeli bayilalela iNkosi, kabahambanga.

²⁰ Kwakunjalo lalapho iyezi laliphezu kweTabernakeli insuku ezilutshwana nje; njengokulaya kweNkosi bahlala ezihonqweni; futhi bahamba njengokulaya kwayo.

²¹ Ngesinye isikhathi iyezi lahlala kusukela kusihlwa kwaze kwaba sekuseni kuphela; lapho iyezi lisuka ekuseni, babehamba. Futhi uba iyezi lalihlala emini lebusuku, ekusukeni kwalo babehamba.

²² Uba iyezi lalihlala phezu kweTabernakeli insuku ezimbili, loba inyanga, loba umnyaka, abakoIsrayeli bahlala ezihonqweni, kabahambanga. Kodwa lapho lisuka, babehamba.

²³ Ngokulaya kweNkosi bamisa, langokulaya kwayo bahamba; balalela ilizwi leNkosi eyabalaya lona ngoMose.