AmaNani 4 - iBhayibhili Elingcwele 1978

Imisebenzi yamaLevi

¹ INkosi yathi kuMose loAroni:

² Balani amadodana kaKohathi phakathi kwamadodana kaLevi, ngensendo zawo langezindlu zaboyise,

³ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

⁴ Yilo umsebenzi wamadodana kaKohathi ethenteni lokuhlangana, ukulondoloza izinto ezingcwele kakhulu.

⁵ Lapho kususwa izihonqo, uAroni lamadodana akhe bazakungena, behlise iveli elilikhetheni, basibekele umtshokotsho wobufakazi ngalo,

⁶ bawembese ngezinzwezwe, bendlale phezu kwaso ilembu eliluhlaza, bafake imijabo yawo.

⁷ Bazakwendlala phezu kwetafula yezinkwa ezahlukaniselwe iNkosi ilembu eliluhlaza, babeke phezu kwalo imiganu, lenkezo zempepha, lezitsha, lezinditshi zokuthela; lesinkwa sizakuba phezu kwayo insuku zonke.

⁸ Phezu kwalezizinto bazakwendlala ilembu elibomvu, balembese ngezinzwezwe, bafake imijabo yayo.

⁹ Bazathatha ilembu eliluhlaza, basibekele uluthi lwesibane, lezibane zalo, lendlawu zalo, lemiganu yalo, lezitsha zonke zamafutha ezisetshenziswa kulo.

¹⁰ Bazalufaka kanye lezinto zalo zonke ezinzwezweni, bakugaqe konke ogodweni.

¹¹ Phezu kwealtare legolide bazakwendlala ilembu eliluhlaza, balembese ngezinzwezwe, bafake imijabo yalo.

¹² Bazakuthatha yonke impahla esetshenziswa enkonzweni yendlu engcwele, bayifake phezu kwelembu eliluhlaza, bayembese ngezinzwezwe, bayigaqe ogodweni.

¹³ Bazakususa umlotha ealtareni, bendlale phezu kwalo ilembu eliyibubende,

¹⁴ babeke kulo zonke izinto zealtare ezisetshenziswa enkonzweni, izitsha zalo zokuthwala umlilo, lamafolokwe, lamafotsholo, lemiganu yokuchela, lazo zonke izinto zealtare, bendlale phezu kwalezizinto izinzwezwe, bafake imijabo yalo.

¹⁵ Lapho uAroni lamadodana akhe sebeqedile ukusibekela impahla engcwele lazo zonke izitsha zakhona, ekususweni kwezihonqo, amadodana kaKohathi azakuza ukukuthwala, kodwa kawayikuthinta izinto ezingcwele ukuba angafi. Yizo lezo izinto zethente lokuhlangana amadodana kaKohathi azakuzithwala.

¹⁶ UEleyazare indodana kaAroni umpristi uzakulondoloza amafutha esibane, lempepha elephunga elimnandi, lomnikelo wempuphu, lamagcobo okugcoba; uzalondoloza lonke iTabernakeli lakho konke okukilo, lendlu engcwele lezinto zayo.

¹⁷ INkosi yathi kuMose loAroni:

¹⁸ Kasingabhujiswa isizwe samaKohathi phakathi kwamaLevi.

¹⁹ Kodwa liwaphathe ngalindlela, ukuba aphile, angafi ekusondeleni kwawo ezintweni ezingcwele kakhulu; uAroni lamadodana akhe bazakungena, banike lowo lalowo wawo umsebenzi wakhe lomthwalo wakhe;

²⁰ kodwa kawayikungena ukukhangela izinto ezingcwele langomzuzwana nje, funa afe.

²¹ INkosi yathi kuMose:

²² Bala amadodana kaGerishoni ngensendo zawo langezindlu zaboyise,

²³ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

²⁴ Yilo umsebenzi wamaGerishoni ekukhonzeni lekuthwaleni kwabo imithwalo;

²⁵ bazathwala amaveli eTabernakeli, lethente lokuhlangana kanye lezinzwezwe zalo, lezinzwezwe eziphezu kwalo, leveli lomnyango wethente lokuhlangana,

²⁶ lamakhetheni eguma, leveli lomnyango weguma elizingelezele iTabernakeli lealtare, lezintambo zakhona, lempahla yonke yenkonzo yabo; bazakwenza konke okufanele kwenzelwe lezizinto.

²⁷ Wonke umsebenzi wamadodana kaGerishoni uzakwenziwa njengokulaya kukaAroni lamadodana akhe, konke ukuthwala kwawo lakho konke ukwenza kwawo. Uzawanika yonke imithwalo azayithwala.

²⁸ Yiwo lowo umsebenzi wamadodana amaGerishoni ethenteni lokuhlangana; umsebenzi wawo uzakuphathwa ngoIthamari indodana kaAroni umpristi.

²⁹ Amadodana kaMerari uzakuwabala ngensendo zawo langezindlu zaboyise,

³⁰ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

³¹ Wonke umsebenzi wabo ethenteni lokuhlangana uzakuba yikuthwala amapulanka eTabernakeli, lemithando yalo, lensika zalo, lenyawo zalo,

³² lensika zeguma inxa zonke, lenyawo zazo, lezikhonkwane, lezintambo, lempahla yazo yonke. Uzakubaqamba ngamabizo, utshele omunye lomunye ukuthi uzakuthwalani.

³³ Yiwo lowo umsebenzi wamadodana kaMerari; wonke umsebenzi wawo ethenteni lokuhlangana uzakuphathwa nguIthamari indodana kaAroni umpristi.

³⁴ UMose loAroni lezikhulu zebandla babala amadodana amaKohathi ngensendo zawo langezindlu zaboyise,

³⁵ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana;

³⁶ labo ababalwayo babezinkulungwane ezimbili, lamakhulu ayisikhombisa, lamatshumi amahlanu.

³⁷ Yilelo inani lamaKohathi wonke asebenza ethenteni lokuhlangana, ababalwa ngoMose loAroni njengomlayo weNkosi ngoMose.

³⁸ Kwabalwa amadodana kaGerishoni, ngensendo zawo langezindlu zaboyise,

³⁹ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

⁴⁰ Labo ababalwayo ngensendo zabo langezindlu zaboyise babezinkulungwane ezimbili, lamakhulu ayisithupha, lamatshumi amathathu.

⁴¹ Yilelo inani lamadodana kaGerishoni, wonke asebenza ethenteni lokuhlangana, ababalwa ngoMose loAroni njengokulaya kweNkosi.

⁴² Kwabalwa amadodana kaMerari ngensendo zawo langezindlu zaboyise,

⁴³ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

⁴⁴ Labo ababalwayo ngensendo zabo babezinkulungwane ezintathu lamakhulu amabili.

⁴⁵ Yibo labo ababalwayo ensendweni zamadodana kaMerari ngoMose loAroni njengomlayo weNkosi ngoMose.

⁴⁶ Bonke ababalwayo bamaLevi, ababalwa ngoMose loAroni lezikhulu zakoIsrayeli ngensendo zabo langezindlu zaboyise,

⁴⁷ kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza lokuthwala imithwalo ethenteni lokuhlangana,

⁴⁸ babezinkulungwane ezificaminwembili, lamakhulu amahlanu, lamatshumi aficaminwembili.

⁴⁹ Njengomlayo weNkosi ngoMose babalwa, ukuba yilowo lalowo anikwe umsebenzi wakhe lomthwalo wakhe; ngakhoke babalwa njengokutsho kweNkosi kuMose.