AmaNani 21 - iBhayibhili Elingcwele 1978

AbakoIsrayeli bahlaselwa ngamaKanani

¹ UmKanani, inkosi yaseAradi, owayehlala eNegebi, wezwa ukuthi uIsrayeli uyeza ngendlela yaseAtharimi; walwa loIsrayeli wathumba abanye kubo.

² UIsrayeli wafunga eNkosini wathi: Uba unikela lababantu esandleni sami, ngizakuchitha imizi yabo iphele nya.

³ INkosi yalilalela ilizwi labakoIsrayeli, yanikela amaKanani kubo, bawaqothula wona lemizi yawo; ngakho leyondawo kwathiwa yiHorma.

Inyoka ezilobuhlungu

⁴ Basuka entabeni yaseHori, bahamba ngendlela eya oLwandle oluBomvu ukuba baceze ilizwe laseEdoma. Abantu badinwa endleleni.

⁵ Bamsola uNkulunkulu loMose bathi: Lasikhuphelani eGibithe ukuba sife enkangala na? Ngoba kakulakudla lamanzi, futhi sekusitshiphele lokhukudla okubi.

⁶ INkosi yasithuma inyoka ezilobuhlungu obubi phakathi kwabantu, zabaluma, bafa abanengi bakoIsrayeli.

⁷ Abantu beza kuMose bathi: Sonile, ngoba siyisolile iNkosi lawe; sincengele eNkosini ukuba izisuse izinyoka kithi. UMose wasebancengela abantu eNkosini.

⁸ INkosi yathi kuMose: Yenza inyoka yethusi, uyiphanyeke esigodweni; kuzakuthi yilowo lalowo olunywayo, nxa eyikhangela, uzakuphila.

⁹ UMose wenza inyoka yethusi, wayiphanyeka esigodweni. Kwathi lapho inyoka imluma umuntu, uba ekhangele inyoka yethusi, asile.

AbakoIsrayeli babhoda ilizwe laseMowabi

¹⁰ AbakoIsrayeli basuka bayamisa eObothi.

¹¹ Basuka eObothi, bayamisa eIye‐Abarimi enkangala maqondana lelizwe laseMowabi ngasempumalanga.

¹² Basuka lapho, bayamisa esigodini saseZeredi.

¹³ Basuka lapho, bayamisa ngaphetsheya kweArinoni enkangala efika elizweni lamaAmori; ngoba iArinoni lingumkhawulo welaseMowabi, liphakathi kwelaseMowabi lamaAmori.

¹⁴ Yikhoke kuthiwa oGwalweni lweZimpi zeNkosi: IWahebi eliseSufa, lezihotsha zaseArinoni,

¹⁵ leliwa lezihotsha elehlela endaweni yaseAri, likhothamele emkhawulweni welaseMowabi.

¹⁶ Basuka lapho, baya eBeri; lo ngumthombo lapho iNkosi eyatsho khona kuMose yathi: Buthanisa abantu, ngizakubanika amanzi.

¹⁷ UIsrayeli wasehlabela lingoma ethi: Mpompoza, mthombo! Hlabelelani kuwo,

¹⁸ umthombo ezawumbayo izikhulu, abawumbayo abakhulu babantu, ngentonga yobukhosi langezindondolo zabo. Basuka eBeri, baya eMathana.

¹⁹ Basuka eMathana, baya eNahaliyeli; basuka eNahaliyeli, baya eBamothi;

²⁰ basuka eBamothi, baya esigodini esiselizweni laseMowabi, ngasentabeni yasePisiga ekhangelene lenkangala.

AbakoIsrayeli banqoba oSihoni loOgi

²¹ UIsrayeli wasethuma izigijimi kuSihoni inkosi yamaAmori, wathi:

²² Sivumele ukuba sidabule elizweni lakho; kasiyikuphambukela emasimini loba ezivinini; futhi kasiyikunatha amanzi emithonjeni yakho; sizahamba ngomgwaqo wenkosi, size siphume elizweni lakho.

²³ Kodwa uSihoni kamvumelanga uIsrayeli ukudabula elizweni lakhe. Wabuthanisa bonke abantu bakhe, waphuma ukuyahlasela uIsrayeli enkangala, wafika eJahazi, walwa loIsrayeli.

²⁴ UIsrayeli wababulala, wanqoba ilizwe labo kusukela eArinoni kuze kube seJaboki, elizweni lamaAmoni, ngoba ilizwe lakhona laliqinile.

²⁵ UIsrayeli wathatha yonke imizi yamaAmori, wahlala kiyo, iHeshiboni layo yonke imizana yalo.

²⁶ Ngoba iHeshiboni lalingumuzi kaSihoni inkosi yamaAmori, owayelwe lenkosi endala yaseMowabi, wanqoba lonke ilizwe layo kwaze kwafika eArinoni.

²⁷ Ngakhoke imbongi zithi: Wozani eHeshiboni! Umuzi kaSihoni kawakhiwe, umiswe.

²⁸ Ngoba umlilo wavutha eHeshiboni, lamalangabi abhebha emzini kaSihoni, latshisa iAri laseMowabi, lezintaba zaseArinoni.

²⁹ Maye kuwe, Mowabi! Lifile, lina bantu bakaKemoshi! Wenza amadodana akhe aba ngababaleki, lamadodakazi akhe aba ngabathunjiweyo bakaSihoni, inkosi yamaAmori.

³⁰ Babhubha labantwana babo kusukela eHeshiboni kuze kufike eDiboni; umlilo watshisa waze wafika eMedeba.

³¹ UIsrayeli wasehlala elizweni lamaAmori.

³² UMose wathumela abantu ukuhlola iJazeri; abakoIsrayeli basebethatha imizi yalo, banqoba amaAmori ayehlala khona.

³³ Basebephenduka, bahamba ngendlela eya eBashani. UOgi inkosi yaseBashani waphuma kanye labantu bakhe bonke, wabahlasela eEdreyi.

³⁴ Kodwa iNkosi yathi kuMose: Ungamesabi; ngoba ngiyamnikela esandleni sakho, kanye labantu bakhe bonke lelizwe lakhe; uzakwenza kuye njengokwenza kwakho kuSihoni inkosi yamaAmori owayehlala eHeshiboni.

³⁵ Basebembulala, lamadodana akhe, labantu bakhe bonke; kakuphunyukanga muntu. Bathumba ilizwe lakhe.