AmaNani 2 - iBhayibhili Elingcwele 1978

Izihonqo lezikhulu zezizwe

¹ INkosi yathi kuMose loAroni:

² Abantu bakoIsrayeli bazakumisa amathente abo, kube yilabo lalabo ngaphansi kophawu lwabo, phansi kwezibonakaliso zezindlu zaboyise; bazakumisa bekhangelane lethente lokuhlangana inxa zonke.

³ Labo abazakumisa ngasempumalanga, bazakuba ngabesigaba sakoJuda ngaphansi kophawu lwezihonqo zesizwe sabo, isikhulu sabakoJuda sibe nguNashoni indodana kaAminadaba;

⁴ ibandla lakhe elabalwayo lalizinkulungwane ezingamatshumi ayisikhombisa lane, lamakhulu ayisithupha.

⁵ Labo abazakumisa eceleni kwabakoJuda ngabesizwe sakoIsakari, isikhulu saso sibe nguNethaneli indodana kaZuwari;

⁶ ibandla lakhe elabalwayo lalizinkulungwane ezingamatshumi amahlanu lane, lamakhulu amane.

⁷ Besekulandela isizwe sakoZebuluni, isikhulu saso sibe nguEliyabi indodana kaHeloni;

⁸ ibandla lakhe elabalwayo lalizinkulungwane ezingamatshumi amahlanu lesikhombisa, lamakhulu amane.

⁹ Bonke abezihonqo zakoJuda, ngamabandla abo, abayizinkulungwane ezilikhulu lamatshumi aficaminwembili, lamakhulu amane, bazasuka kuqala ekusukeni kwabantu.

¹⁰ Ngaseningizimu kuzakumisa isigaba sabakoRubeni ngaphansi kophawu lwezihonqo zesizwe sabo, isikhulu sabo sibe nguElizuri indodana kaShedewuri;

¹¹ ibandla lakhe elabalwayo lalizinkulungwane ezingamatshumi amane lesithupha, lamakhulu amahlanu.

¹² Labo abazakumisa eceleni kwabakoRubeni ngabesizwe sakoSimeyoni, isikhulu sabo sibe nguShelumiyeli indodana kaZurishadayi;

¹³ ibandla lakhe elabalwayo lalizinkulungwane ezingamatshumi amahlanu lesificamunwemunye, lamakhulu amathathu.

¹⁴ Besekulandela isizwe sakoGadi, isikhulu saso sibe nguEliyasafi indodana kaRehuweli;

¹⁵ ibandla lakhe elabalwayo lalizinkulungwane ezingamatshumi amane lanhlanu, lamakhulu ayisithupha, lamatshumi amahlanu.

¹⁶ Bonke abezihonqo zakoRubeni, ngamabandla abo, abayizinkulungwane ezilikhulu lamatshumi amahlanu lanye, lamakhulu amane, lamatshumi amahlanu, bazakuba ngabesibili ekusukeni kwabantu.

¹⁷ Emva kwalokhu kuzakusuka ithente lokuhlangana, lezihonqo zamaLevi zibe phakathi kwezihonqo; bonke abantu bazalandelana ekuhambeni kwabo njengokumisa kwabo, kube yilowo lalowo endaweni yakhe ngaphansi kophawu lwakhe.

¹⁸ Ngasentshonalanga kuzakumisa isigaba sabakoEfrayimi ngaphansi kophawu lwezihonqo zesizwe sabo, isikhulu sabo sibe nguElishama indodana kaAmihudi;

¹⁹ ibandla lakhe elabalwayo lalizinkulungwane ezingamatshumi amane, lamakhulu amahlanu.

²⁰ Labo abazamisa eceleni kwabakoEfrayimi ngabesizwe sakoManase, isikhulu sabo sibe nguGamaliyeli indodana kaPedazuri;

²¹ ibandla lakhe elabalwayo lalizinkulungwane ezingamatshumi amathathu lambili, lamakhulu amabili.

²² Besekulandela isizwe sakoBenjamini, isikhulu saso sibe nguAbidani indodana kaGideyoni;

²³ ibandla lakhe elabalwayo lalizinkulungwane ezingamatshumi amathathu lanhlanu, lamakhulu amane.

²⁴ Bonke abezihonqo zakoEfrayimi, ngamabandla abo, abayizinkulungwane ezilikhulu lesificaminwembili, lekhulu, bazakuba ngabesithathu ekusukeni kwabantu.

²⁵ Ngasenyakatho kuzakumisa isigaba sabakoDani ngaphansi kophawu lwezihonqo zesizwe sabo, isikhulu sabo sibe nguAhiyezeri indodana kaAmishadayi;

²⁶ ibandla lakhe elabalwayo lalizinkulungwane ezingamatshumi ayisithupha lambili, lamakhulu ayisikhombisa.

²⁷ Labo abazakumisa eceleni kwabakoDani bazakuba ngabesizwe sakoAsheri, isikhulu sabo sibe nguPagiyeli indodana kaOkirani;

²⁸ ibandla lakhe elabalwayo lalizinkulungwane ezingamatshumi amane lanye, lamakhulu amahlanu.

²⁹ Besekulandela isizwe sakoNafitali, isikhulu saso sibe nguAhira indodana kaEnani;

³⁰ ibandla lakhe elabalwayo lalizinkulungwane ezingamatshumi amahlanu lantathu, lamakhulu amane.

³¹ Bonke abezihonqo zakoDani abayizinkulungwane ezilikhulu lamatshumi amahlanu lesikhombisa, lamakhulu ayisithupha, bazakuba ngabokucina ekusukeni kwabantu bephethe izimpawu zabo.

³² Yibo labo abakoIsrayeli ababalwayo ngezindlu zaboyise; bonke ababalwayo ezihonqweni zabo ngamabandla abo babezinkulungwane ezingamakhulu ayisithupha lantathu, lamakhulu amahlanu, lamatshumi amahlanu.

³³ Kodwa amaLevi kawabalwanga phakathi kwabakoIsrayeli, njengokutsho kweNkosi kuMose.

³⁴ Benza njalo abantu bakoIsrayeli. Njengakho konke iNkosi eyayimlaye khona uMose, bamisa phansi kwezimpawu zabo; futhi basuka kanjalo, kwaba yilowo lalowo losendo lwakhe langendlu kayise.