AmaHubo 96 - iBhayibhili Elingcwele 1978

UNkulunkulu uyiNkosi

¹ Hlabelani eNkosini ihubo elitsha; hlabelani eNkosini, lina mhlaba wonke.

² Hlabelani eNkosini, lidumise ibizo layo, litshumayele ukukhulula kwayo insuku ngensuku.

³ Landisani udumo lwayo phakathi kwezizwe, lemisebenzi yayo emangalisayo phakathi kwabantu bonke.

⁴ Ngoba yinkulu iNkosi, ifanele ukudunyiswa kakhulu, iyesabeka ukwedlula onkulunkulu bonke.

⁵ Ngoba bonke onkulunkulu bezizwe bayizithombe; kodwa iNkosi yenza amazulu.

⁶ Inkazimulo lobukhosi kuphambi kwayo, amandla lobuhle kusendlini yayo engcwele.

⁷ Inikeni iNkosi, lina zizukulwana zezizwe, inikeni iNkosi udumo lamandla.

⁸ Inikeni iNkosi udumo olufanele ibizo layo; lethani umnikelo, lingene emagumeni ethempeli layo.

⁹ Ikhonzeni iNkosi lambethe ezingcwele; lithuthumele phambi kwayo, mhlaba wonke.

¹⁰ Tshonini phakathi kwezizwe ukuthi: INkosi iyabusa. Umhlaba umisiwe, kawuyikunyikinyeka; izakubahlulela abantu ngokulunga.

¹¹ Kawathokoze amazulu, lomhlaba ujabule; kaluhlokome ulwandle lakho konke okukulo;

¹² amaganga kawathabe lakho konke okukuwo. Ng’khonake zizahlabela ngokuthokoza izihlahla zonke zamahlathi

¹³ phambi kweNkosi, ngoba iyeza, iyeza ukwahlulela umhlaba; izakuwahlulela umhlaba ngokulunga, labantu ngeqiniso layo.