AmaHubo 94 - iBhayibhili Elingcwele 1978

UNkulunkulu wempindiselo

¹ Nkosi, wena Nkulukulu wempindiselo, wena Nkulunkulu wempindiselo, ziveze!

² Phakama, Mahluleli womhlaba, uphindisele kwabazigqajayo.

³ Nkosi, koze kube nini ababi, koze kube nini ababi bethokoza na?

⁴ Bonke ababi bayaphophotha bekhuluma amazwi okuzigqaja, bezikhukhumeza.

⁵ Bayabaphohloza abantu bakho, Nkosi, behlupha isizwe sakho.

⁶ Bayabulala abafelwakazi lezihambi, babulale lezintandane;

⁷ bathi: INkosi kayiboni, uNkulunkulu kaJakobe kananzi.

⁸ Qedisisani, lina zithutha phakathi kwabantu; ziphukuphuku, lizakuhlakanipha nini na?

⁹ Yena owenza indlebe kalakuzwa na? lowenza ilihlo kalakubona na?

¹⁰ Yena olaya izizwe kabalayi na? Yena ofundisa abantu kalakwazi na?

¹¹ INkosi iyayazi imicabango yabantu ukuthi ingumoya nje.

¹² Nkosi, ubusisiwe lowomuntu omlayayo, omfundisayo ngomlayo wakho,

¹³ ukuze umphumuze ensukwini zokuhlupheka, ukuze bambelwe umgodi ababi.

¹⁴ Ngoba iNkosi kayiyikubatshiya abantu bayo, kayiyikusilahla isizwe sayo;

¹⁵ ngoba ukulunga kuzakubuya kwabalungileyo, labo bonke abaqotho enhliziyweni bazakukulandela.

¹⁶ Ngubani ozakungimela kubo ababi na? Ngubani ozakungelekelela kubo abangalunganga na?

¹⁷ Uba iNkosi ibingesilo usizo lwami, umphefumulo wami ubuzakuphangisa ukuya elizweni labafileyo.

¹⁸ Lapho ngisathi unyawo lwami luyatshelela, uthando lwakho olungapheliyo luyangisekela, Nkosi.

¹⁹ Phakathi kobunengi bemicabango engikhathazayo ukududuza kwakho kuthokozisa umphefumulo wami.

²⁰ Kambe abahluleli ababi abamisa ububi ngomthetho, bangaphathisana kanye lawe na?

²¹ Bayahlangana ukuvukela ukuphila kolungileyo, bamqumele ukufa ongelacala.

²² Kodwa iNkosi iyinqaba yami, loNkulunkulu wami ulidwala lokuphephela kwami.

²³ Izakuphindisela kubo ububi babo, ibaqede ngenxa yokungalungi kwabo; iNkosi uNkulunkulu wethu izakubaqeda.