AmaHubo 92 - iBhayibhili Elingcwele 1978

Ukubonga iNkosi ngokulunga kwayo

¹ Kuhle ukukubonga, Nkosi, lokudumisa ibizo lakho, wena oPhezukonke;

² ukutshumayela uthando lwakho olungapheliyo ekuseni, lobuqotho bakho ebusuku,

³ ngokutshaya ichacho elilentambo ezilitshumi, langechacho elikhala kamnandi.

⁴ Ngoba wena, Nkosi, ungithokozisile ngomsebenzi wakho; ngomsebenzi wezandla zakho ngiyahlabela ngokujabula.

⁵ Yeka ubukhulu bemisebenzi yakho, Nkosi! Imicabango yakho izikile kakhulu.

⁶ Isiphukuphuku singeke sikwazi, lesithutha singeke sikuqedisise lokhu

⁷ ukuthi, loba ababi behluma njengotshani, labenza okubi bephumelela, bazakubhujiswa kokuphela;

⁸ kodwa wena, Nkosi, uphakeme kuze kube nininini.

⁹ Ngoba khangela, Nkosi, izitha zakho, zizakubhubha; bonke ababi bazakuchitheka.

¹⁰ Kodwa uphakamisile uphondo lwami njengolwenyathi, ungigcobile ngamagcobo amatsha.

¹¹ Amehlo ami akubonile ukuwa kwezitha zami, lendlebe zami zakuzwa ukuchitheka kwabangivukelayo.

¹² Abalungileyo bayakhahlela njengelala, bakhule njengezihlahla zeLebanoni.

¹³ Bagxunyekiwe endlini yeNkosi, bayakhahlela emagumeni ethempeli likaNkulunkulu wethu.

¹⁴ Basathela izithelo lasebudaleni babo, bayahluma babe luhlaza,

¹⁵ ukuze batshengise ukuthi iNkosi iqondile; yona ilidwala lami, kakukho ukungalungi kiyo.