AmaHubo 91 - iBhayibhili Elingcwele 1978

UNkulunkulu ungumvikeli wethu

¹ Yena owakhileyo ekusithekeni koPhezukonke, ohlala emthunzini kaSomandla,

² uzakuthi eNkosini: Uyisiphephelo sami lenqaba yami, uNkulunkulu wami engithemba kuye.

³ Ngoba yena uzakukukhulula emjibileni womthiyi, lakuwo umkhuhlane obhubhisayo.

⁴ Uzakukusibekela ngensiba zakhe, uphephele ngaphansi kwamaphiko akhe; ubuqotho bakhe buyisihlangu lehawu.

⁵ Kawuyikwesaba ukwesabeka kwebusuku, lomtshoko ophaphayo emini,

⁶ lomkhuhlane ohambayo emnyameni, lokufa okubhubhisayo emini enkulu.

⁷ Bazakuwa abayinkulungwane ngaseceleni kwakho, labayizinkulungwane ezilitshumi ngakwesokunene sakho; kodwa wena kawuyikulimala.

⁸ Uzakukhangela nje ngamehlo ubone ukuphindiselwa kwababi.

⁹ Ngoba uyenzile iNkosi yaba yisiphephelo sakho, oPhezukonke waba yinqaba yakho,

¹⁰ kawuyikwehlelwa ngokubi, lesifo kasiyikusondela emzini wakho.

¹¹ Ngoba uzakulaya izithunywa zakhe ngawe, ukuba zikulondoloze endleleni zakho zonke.

¹² Zizakukuthwala ngezandla zazo, ukuze ungakhubeki elitsheni ngonyawo lwakho.

¹³ Uzakunyathela isilwane lebululu, izilwane lenyoka uzakuzinyathela phansi.

¹⁴ Ngenxa yokuba ungithanda, ngizakumkhulula; ngizakumvikela, ngoba uyalazi ibizo lami.

¹⁵ Lapho ekhuleka kimi, ngizakumphendula; ngizakuba laye ekuhluphekeni, ngimkhulule, ngimnike udumo.

¹⁶ Ngizakumnika insuku ezinengi ngimtshengise ukukhulula kwami.