AmaHubo 9 - iBhayibhili Elingcwele 1978

Ukubonga ukwahlulela kukaNkulunkulu

¹ Ngizakubonga, Nkosi, ngenhliziyo yami yonke, ngilandise zonke izimangaliso zakho.

² Ngizakuthaba ngithokoze kuwe, ngidumise ibizo lakho wena oPhezukonke.

³ Lapho izitha zami zibuyela emuva, ziyawa, zibhubhe phambi kwakho.

⁴ Ngoba wena uyimele indaba yami lamalungelo ami, wahlulela ngokulungileyo uhlezi esihlalweni sakho sobukhosi.

⁵ Uzikhuzile izizwe, wabhubhisa ababi; walesula ibizo labo kwaze kwaba nininini.

⁶ Izitha zichitheke zaphela nya; imizi yazo uyidilizile; kazisayikukhunjulwa lakanye.

⁷ Kodwa iNkosi iyabusa kuze kube nini lanini, isihlalo sayo sobukhosi isimisele ukwahlulela;

⁸ umhlaba iyawahlulela ngokulunga, iyabahlulela abantu ngeqiniso.

⁹ INkosi iyinqaba yabacindezelweyo, iyinqaba ezikhathini zokuhlupheka.

¹⁰ Abalaziyo ibizo lakho bazakuthemba kuwe, ngoba wena Nkosi, kawubatshiyanga abakudingayo.

¹¹ Hlabelani lidumise iNkosi ehlezi eZiyone, limemezele phakathi kwabantu izenzo zayo.

¹² Ngoba yona ephindisela igazi iyabakhumbula, kayikhohlwa yikukhala kwabahluphekayo.

¹³ Woba lomusa kimi, Nkosi, ukubone ukuhlutshwa kwami ngabangizondayo, wena ongilulamisayo ngisemasangweni okufa,

¹⁴ ukuze ngihube udumo lwakho, ngithabe emasangweni eZiyone ngokungikhulula kwakho.

¹⁵ Izizwe ziwele emgodini ezawumbayo, lenyawo zazo zibanjwe limbule ezalithiyayo.

¹⁶ INkosi izibonakalisile, yahlulela; ababi bathiywe emsebenzini wezandla zabo.

¹⁷ Ababi bazakuya endaweni yabafileyo, zonke izizwe ezimkhohlwayo uNkulunkulu.

¹⁸ Ngoba abaswelayo kabayikukhohlakala kokuphela, lethemba labayanga kaliyikunyamalala kokuphela.

¹⁹ Vuka, Nkosi, ungavumi ukuba umuntu anqobe; izizwe kazahlulelwe phambi kwakho.

²⁰ Kazitshaywe luvalo, Nkosi, kazaziswe ukuthi zingabantu nje.