AmaHubo 89 - iBhayibhili Elingcwele 1978

Izithembiso zikaNkulunkulu

¹ Ngizakuhlabela ngothando lwakho olungapheliyo, Nkosi, kuze kube nininini; ngomlomo wami ngizakwazisa ubuqotho bakho kuzo zonke izizukulwana.

² Ngoba uthando lwakho olungapheliyo lumi kuze kube nini lanini, lobuqotho bakho buqinile njengamazulu.

³ Wena uthe: Ngenzile isivumelwano laye engimkhethileyo, ngifungile kuDavida inceku yami,

⁴ ngathi: Ngizakuqinisa inzalo yakho kuze kube nininini, ngimise isihlalo sakho sobukhosi ezizukulwaneni zonke.

⁵ Izimangaliso zakho, Nkosi, zidunyiswa ngamazulu, ubuqotho bakho emhlanganweni wabangcwele.

⁶ Ngoba ngubani ongafaniswa lawe ezulwini, Nkosi, na? Ngubani phakathi kwezidalwa zasezulwini ofana leNkosi,

⁷ uNkulunkulu owesabekayo emhlanganweni wabangcwele, omkhulu lowesabekayo kubo bonke abahlala laye na?

⁸ Nkosi Nkulunkulu wamabandla, ngubani ongafaniswa lawe, Nkosi, ngamandla langobuqotho bakho bonke na?

⁹ Wena uyabusa ukukhukhumala kolwandle; lapho amavinqo alo evuka uyawathulisa.

¹⁰ Wamchoboza uRahabi waba yisidumbu, wazichitha izitha zakho ngamandla akho.

¹¹ Amazulu ngawakho, lomhlaba ngowakho, ilizwe lakho konke okukulo, konke wakwenza.

¹² Inyakatho leningizimu wakudala wena, iTabori leHermoni kuyadumisa ibizo lakho ngentokozo.

¹³ Ingalo yakho ilamandla, isandla sakho siqinile, isandla sakho sokunene siphakeme.

¹⁴ Ukulunga lokwahlulela kuyisisekelo sombuso wakho; uthando olungapheliyo lobuqotho kuhamba phambi kwakho.

¹⁵ Babusisiwe abakwaziyo ukuhlabela ngentokozo, abahambayo, Nkosi, ekukhanyeni kobuso bakho,

¹⁶ abathokozayo ebizweni lakho usuku lonke, bekubonga ngokulunga kwakho.

¹⁷ Ngoba wena uludumo lwabo lamandla abo; ngomusa wakho sizakuba lokunqoba.

¹⁸ Ngoba isihlangu sethu singeseNkosi, inkosi yethu ingeyoNgcwele kaIsrayeli.

¹⁹ Endulo wakhuluma ngombono kubo abathembekileyo bakho, wathi: Ngibekile umqhele phezu kwakhe olamandla, ngimphakamisile okhethiweyo phakathi kwabantu.

²⁰ Ngifumene uDavida inceku yami, ngamgcoba ngamafutha angcwele;

²¹ isandla sami sizakuba laye kokuphela, lengalo yami izakumqinisa.

²² Isitha kasiyikumjuma, lomubi kayikumahlula.

²³ Ngizazichoboza izitha zakhe phambi kwakhe, ngibadilizele phansi abamzondayo.

²⁴ Ubuqotho bami lothando lwami olungapheliyo kuzakuba laye, lasebizweni lami uzakuba lokunqoba.

²⁵ Ngizaqhelisa umbuso wakhe ukuba usukele olwandle uze ufike emfuleni iYufrathi.

²⁶ Uzakungibiza ngokuthi: Wena unguBaba loNkulunkulu wami, idwala lami, lomkhululi wami.

²⁷ Ngizakumenza abe lizibulo, abe mkhulu kulamakhosi wonke omhlaba.

²⁸ Uthando lwami olungapheliyo ngizalugcinela yena kuze kube nininini, lesivumelwano sami sizakuqina kuye.

²⁹ Ngizakumisa inzalo yakhe kuze kube nininini, lesihlalo sakhe sobukhosi sime kokuphela.

³⁰ Uba abantwana bakhe bewutshiya umlayo wami, bangahambi ngokwezimiso zami,

³¹ uba bezaphula izimiso zami, bengayigcini imithetho yami,

³² ngizakubatshayela iziphambeko zabo ngenduku, lezono zabo ngemichilo.

³³ Kodwa kangiyikulususa kuye uthando lwami olungapheliyo, ngingaphikisi ukuthembeka kwami.

³⁴ Kangiyikusaphula isivumelwano sami, loba ngiguqule ilizwi eliphuma emlonyeni wami.

³⁵ Ngafunga kwaba kanye ngobungcwele bami, kangiyikuqamba amanga kuDavida.

³⁶ Inzalo yakhe izakuma kuze kube nininini, isihlalo sakhe sobukhosi sime njengelanga phambi kwami;

³⁷ sizakuma njengenyanga kuze kube nininini, sizakuma siqine kusekhona izulu.

³⁸ Kodwa khathesi usumlahlile wamala, wamthukuthelela ogcotshiweyo wakho.

³⁹ Usiphikile isivumelwano sakho lenceku yakho; wawudumaza umqhele wakhe, wawuphosela phansi.

⁴⁰ Uyibhobozile yonke imithangala yakhe, wazibhidliza inqaba zakhe.

⁴¹ Bonke abadlulayo bayamphanga; useyinhlekisa kwabakhelene laye.

⁴² Uziphakamisile izandla zokunene zezitha zakhe, wazithokozisa zonke izitha zakhe.

⁴³ Futhi ubuyisele emuva umhedla wakhe obukhali, kawumvumelanga ukuma ekulweni.

⁴⁴ Intonga yobukhosi uyisusile esandleni sakhe, wadilizela phansi isihlalo sakhe sobukhosi.

⁴⁵ Ufinyezile insuku zobutsha bakhe, wamthela ihlazo.

⁴⁶ Koze kube nini, Nkosi, ucatsha na? Koze kube nini ulaka lwakho luvutha njengomlilo na?

⁴⁷ Khumbula, Nkosi, ukuthi isikhathi sokuphila singakanani, lokuthi wabadalela ize bonke abantu.

⁴⁸ Ngubani ongaphila kokuphela angaboni ukufa na? Ngubani olamandla okukhulula umphefumulo wakhe endaweni yabafileyo na?

⁴⁹ Nkosi, lungaphi uthando lwakho olungapheliyo olwakuqala owalufunga kuDavida ngobuqotho bakho na?

⁵⁰ Khumbula, Nkosi, ukuklolodelwa kwenceku yakho, lokuthi ngithwele esifubeni sami inhlamba yabantu,

⁵¹ engithukwa ngayo yizitha zakho, Nkosi, eziklolodela ngayo izinyathelo zogcotshiweyo wakho.

⁵² Kayibongwe iNkosi kuze kube nini lanini. Ameni, Ameni.