AmaHubo 86 - iBhayibhili Elingcwele 1978

Umkhuleko wokucela isihawu sikaNkulunkulu

¹ Nkosi, beka indlebe yakho, ungiphendule, ngoba ngiyahlupheka, ngiyaswela.

² Londoloza ukuphila kwami, ngoba ngingoqotho; siza inceku yakho ekuthembayo, wena Nkulunkulu wami.

³ Woba lesihawu kimi, Nkosi, ngoba ngikhala kuwe usuku lonke.

⁴ Thokozisa umphefumulo wenceku yakho, ngoba kuwe, Nkosi, ngiyawuphakamisela umphefumulo wami.

⁵ Ngoba wena, Nkosi, ulungile, uyathethelela; uthando lwakho olungapheliyo lukhulu kubo bonke abakhuleka kuwe.

⁶ Nkosi, lalela umkhuleko wami, zwana ilizwi lokunxusa kwami.

⁷ Ngosuku lokuhlupheka kwami ngikhuleka kuwe, ngoba uzakungiphendula.

⁸ Phakathi kwabonkulunkulu kakho ofana lawe, Nkosi, kayikho lemisebenzi efana leyakho.

⁹ Izizwe zonke ozenzileyo zizakuza zikhothame phambi kwakho, Nkosi, zidumise ibizo lakho.

¹⁰ Ngoba wena umkhulu, wenza izinto ezimangalisayo, unguNkulunkulu wena wedwa.

¹¹ Nkosi, ngifundisa indlela yakho, ukuze ngihambe eqinisweni lakho; yenza inhliziyo yami iqonde ntonye, yesabe ibizo lakho.

¹² Ngiyakubonga, Nkosi Nkulunkulu wami, ngenhliziyo yami yonke; ngizakulidumisa ibizo lakho kuze kube nininini.

¹³ Ngoba lukhulu kimi uthando lwakho olungapheliyo; wakhulula umphefumulo wami enzikini yendawo yabafileyo.

¹⁴ Nkulunkulu, abazigqajayo bangivukele, ixuku labantu abalesihluku lifuna ukungibulala, abantu abangakukhatheleliyo wena.

¹⁵ Kodwa wena, Nkosi, unguNkulunkulu olesihawu, olomusa, ophuza ukuthukuthela, ogcwele uthando olungapheliyo lobuqotho.

¹⁶ Ngikhangela ungihawukele; uyiphe inceku yakho amandla akho, uyisize indodana yencekukazi yakho.

¹⁷ Ngitshengisa isibonakaliso somusa wakho; labo abangizondayo babone bayangeke, ukuthi wena, Nkosi, ungisizile wangiduduza.