AmaHubo 85 - iBhayibhili Elingcwele 1978

Umkhuleko wokucelela uIsrayeli ukuthula

¹ Nkosi, ube lomusa elizweni lakho. Umbuyisele uJakobe okuhle;

² wabathethelela ububi abantu bakho, wazithethelela zonke izono zabo.

³ Ukususile konke ukuthukuthela kwakho, wakudedisa ukuvutha kolaka lwakho.

⁴ Sibuyise futhi, Nkulunkulu wokukhululwa kwethu, ususe kithi isigcono sakho.

⁵ Uzakusithukuthelela kokuphela na? Uzakudlulisela ulaka lwakho ezizukulwaneni zonke na?

⁶ Kawuyikusivuselela, ukuze abantu bakho bathokoze ngawe na?

⁷ Sitshengise uthando lwakho olungapheliyo, Nkosi, usinike ukukhulula kwakho.

⁸ Ake ngizwe lokho uNkulunkulu iNkosi azakukukhuluma, ngoba uzakukhuluma ukuthula ebantwini bakhe, kubo abangcwele bakhe, abaphendukela kuye ngenhliziyo yabo yonke.

⁹ Impela ukukhulula kwakhe kuseduze kulabo abamesabayo, ukuze kuhlale udumo elizweni lakithi.

¹⁰ Kuzahlangabezana uthando olungapheliyo lobuqotho, ukulunga lokuthula kwangane.

¹¹ Ubuqotho buzakuvela emhlabeni, ukulunga kulunguze kusezulwini.

¹² Yebo, iNkosi izakuveza okuhle, lelizwe lakithi lizakuthela izithelo zalo.

¹³ Ukulunga kuzakuhamba phambi kwayo, kwenzele inyawo zayo indlela.