AmaHubo 84 - iBhayibhili Elingcwele 1978

Ukulangatha indlu kaNkulunkulu

¹ Nkosi yamabandla, yeka ubuhle bendlu yakho!

² Umphefumulo wami uyalangatha, yebo, uyomela amaguma ethempeli leNkosi. Inhliziyo yami lomzimba wami kuyahlabelela ngokuthaba kuNkulunkulu ophilayo.

³ Ngitsho lentaka iyafumanisa indlu, lenkonjane ilaso isidleke lapho ingazalela khona abantwana bayo, ema‐altareni akho, Nkosi yamabandla, Nkosi yami loNkulunkulu wami.

⁴ Babusisiwe abahlala endlini yakho, bazakuhlala bedumisa wena.

⁵ Babusisiwe abantu abamandla abo akuwe, okukhona enhliziyweni zabo isifiso sokuya eZiyone.

⁶ Lapho bedabula isihotsha saseBaka basenza sibe yindawo yemithombo; lezulu lokusewula liyasigcwalisa ngamachibi.

⁷ Bayakhula emandleni, baze babonakale phambi kukaNkulunkulu eZiyone.

⁸ Nkosi Nkulunkulu wamabandla, zwana umkhuleko wami, ulalele, wena Nkulunkulu kaJakobe.

⁹ Nkulunkulu, khangela inkosi yethu, ube lomusa kogcotshiweyo wakho.

¹⁰ Ngoba usuku olulodwa emagumeni akho luhle ukwedlula eziyinkulungwane ezikwenye indawo. Kungcono ukuba ngihlale emnyango wendlu kaNkulunkulu wami kulokuba ngihlale emathenteni ababi.

¹¹ Ngoba iNkosi uNkulunkulu ililanga lesihlangu, iyaphana ngomusa lodumo; kayibancitshi labo abahamba ngobuqotho.

¹² Nkosi yamabandla, ubusisiwe umuntu othemba kuwe!