AmaHubo 81 - iBhayibhili Elingcwele 1978

Ukungalaleli kukaIsrayeli

¹ Hubelani kuNkulunkulu ongamandla ethu, lihlokome ngokuthokoza kuNkulunkulu kaJakobe!

² Hlabelani ingoma, litshaye isigubhu, lomhubhe okhala mnandi kanye lechacho.

³ Vuthelani uphondo ekuthwaseni kwenyanga lasekugcwaleni kwayo esikhathini somkhosi wethu.

⁴ Ngoba lokho kuyisimiso kuIsrayeli lomthetho kaNkulunkulu kaJakobe.

⁵ Wakumisa kwaba yibufakazi kuJosefa, lapho uNkulunkulu evukela ilizwe laseGibithe. Ngezwa ilizwi lalowo engingamaziyo, lisithi:

⁶ Ngethula umthwalo ehlombe lakho, lesandla sakho sayekela ukuthwala isitsha.

⁷ Wakhuleka usekuhluphekeni, ngakukhulula; ngakuphendula ekusithekeni kokuduma; ngakuhlola ngasemanzini aseMeriba.

⁸ Zwanini, bantu bami, lapho ngiliqondisa. Wena Israyeli, kungathi lingalalela!

⁹ Kakungabi khona phakathi kwenu unkulunkulu ongaziwayo, lingamkhonzi unkulunkulu wezizweni.

¹⁰ Mina ngiyiNkosi, uNkulunkulu wenu, owalikhupha elizweni laseGibithe. Khamisani imilomo yenu, ngizakuyigcwalisa.

¹¹ Kodwa abantu bami kabalilalelanga ilizwi lami; uIsrayeli kazanga angazi.

¹² Ngasengibayekela enkanini yenhliziyo zabo, ukuba bahambe ngokuthanda kwabo.

¹³ Kungathi abantu bami bengangilalela, loIsrayeli ahambe endleleni zami!

¹⁴ Bengingazinqoba masinyane izitha zabo, ngiselule isandla sami ngakulabo abamelana labo.

¹⁵ Labo abayizondayo iNkosi bangatshotshobala phambi kwayo, ukuba ukutshaywa kwabo kume kuze kube nininini.

¹⁶ Bengingalipha amabele amahle, ngilisuthise ngenyosi ezivela edwaleni.