AmaHubo 79 - iBhayibhili Elingcwele 1978

Ukucela kuNkulunkulu ukuba asize abantu bakhe

¹ Nkulunkulu, abezizwe sebengenile elizweni lakho; balingcolisile ithempeli lakho elingcwele, balidilizile iJerusalema.

² Banikile izidumbu zenceku zakho zaba yikudla kwenyoni zaphezulu, lenyama yabangcwele bakho kuzo izilo zomhlaba.

³ Balichithile igazi labantu bakho njengamanzi ezindaweni zonke zaseJerusalema; kakubanga khona obangcwabayo.

⁴ Sesiphenduke inhlamba kwabakhelene lathi, siyahlekwa, siklolodelwe yilabo abasiphahlileyo.

⁵ Koze kube nini, Nkosi, uthukuthela, lolaka lwakho luvutha njengomlilo na?

⁶ Yehlisela ulaka lwakho phezu kwabezizwe abangakwaziyo, laphezu kwemibuso engakhuleki ebizweni lakho.

⁷ Ngoba bamchithile uJakobe, bawubhidlizile umuzi wakhe.

⁸ Ungasibaleli izono zabokhokho bethu; isihawu sakho kasize kithi masinyane, ngoba sehliselwe phansi kakhulu.

⁹ Sisize, Nkulunkulu wokusizwa kwethu, ngenxa yodumo lwebizo lakho; usikhulule, usithethelele izono zethu ngenxa yebizo lakho.

¹⁰ Bangakutsho ngani abezizwe ukuthi: Ungaphi uNkulunkulu wabo na? Ukuphindiselwa kwegazi elichithekileyo lenceku zakho kakwaziwe phakathi kwezizwe phambi kwethu.

¹¹ Ukukhala kwezibotshwa kakufinyelele kuwe; ngamandla akho amakhulu ubalondoloze labo abamiselwe ukufa.

¹² Ubaphindisele kasikhombisa abakhelene lathi ukuthuka abakuthuka ngakho, Nkosi.

¹³ Ng’khonake thina abantu bakho, umhlambi wedlelo lakho, sizakukubonga kuze kube nininini, sitshumayele udumo lwakho ezizukulwaneni ngezizukulwana.