AmaHubo 78 - iBhayibhili Elingcwele 1978

Ukuthembeka kukaNkulunkulu lokungathembeki kwabakoIsrayeli

¹ Bantu bami, zwanini ukufundisa kwami, lilalele amazwi omlomo wami.

² Ngizakuvula omlomo wami ngomfanikiso, ngikhulume imfihlakalo yasendulo,

³ izinto esizizwileyo lesizaziyo okhokho abasitshela zona.

⁴ Kasiyikuzifihlela abantwana babo, kodwa sizakutshela isizukulwana esizayo izenzo ezimangalisayo zeNkosi, lamandla ayo, lezimangaliso ezenzileyo.

⁵ Wamisa umthetho koJakobe, wabeka umlayo koIsrayeli, alaya ngawo okhokho ukuba bafundise abantwana babo,

⁶ ukuze isizukulwana esizayo sazi, abantwana abangakazalwa basuke batshele abantwana babo,

⁷ ukuze bamise ithemba labo kuNkulunkulu, bangayikhohlwa imisebenzi kaNkulunkulu, kodwa bagcine imithetho yakhe;

⁸ bangabi njengokhokho babo, ababeyisizukulwana esimakhanda alukhuni lesilenkani, isizukulwana esinhliziyo engaqinanga, lesimoya waso wawungathembekanga kuNkulunkulu.

⁹ AbakoEfrayimi sebehlomile ngemitshoko, babaleka mhla wempi.

¹⁰ Kabasilondolozanga isivumelwano sikaNkulunkulu, bala ukuhamba ngokomlayo wakhe.

¹¹ Bakhohlwa imisebenzi yakhe lezimangaliso ayebatshengisa zona.

¹² Wazenza izimangaliso phambi kwabokhokho babo elizweni laseGibithe, emagangeni aseZowani.

¹³ Wahlukanisa ulwandle, wabawelisa, wamisa amanzi aba zinqwaba.

¹⁴ Wabakhokhela ngeyezi emini, lasebusuku bonke ngokukhanya komlilo.

¹⁵ Waqhekeza amadwala enkangala, wabanathisa amanzi amanengi kungathi avela ezinzikini.

¹⁶ Wenza imifula yagobhoza edwaleni, lamanzi ageleza njengemifula.

¹⁷ Kodwa baqhubeka ekoneni kwabo, bamvukela oPhezukonke enkangala.

¹⁸ Bamlinga uNkulunkulu enhliziyweni zabo ngokucela ukudla abakufisayo.

¹⁹ Bakhuluma kubi ngoNkulunkulu besithi: UNkulunkulu angasinika ukudla enkangala na?

²⁰ Yena owatshaya idwala, kwaphuma amanzi, lemifula yagobhoza; kambe angabanika ukudla lenyama abantu bakhe na?

²¹ Ngakho lapho iNkosi isizwa lokho yathukuthela; kwavutha umlilo ngakuJakobe, lolaka lwayo lwakhula kuIsrayeli,

²² ngoba kabamkholwanga uNkulunkulu, kabathembanga amandla akhe okukhulula.

²³ Kanti walaya isibhakabhaka phezulu, wavula iminyango yezula,

²⁴ wabanisela imana ukuba badle, wabapha amabele avela phezulu.

²⁵ Abantu badla ukudla kwezithunywa; wabanika ukudla okunengi.

²⁶ Wenza umoya wasempumalanga wavunguza emazulwini; ngamandla akhe waqhuba umoya waseningizimu.

²⁷ Wanisela phezu kwabo inyama njengothuli, lenyoni eziphaphayo njengesihlabathi solwandle;

²⁸ wazehlisela phakathi kwezihonqo zabo, kuyo yonke indawo ababehlezi kuyo.

²⁹ Badla basutha kakhulu, ngoba wabapha abakufisayo.

³⁰ Kodwa bengakanelisi ukufisa kwabo, ukudla kusesemilonyeni yabo,

³¹ ulaka lukaNkulunkulu lwavutha kubo, wabulala amaqhawe abo, insizwa zekhethelo zakoIsrayeli waziwisela phansi.

³² Kanti bajinge besona njalo; kabakholwanga ngenxa yezimangaliso zakhe.

³³ Ngakho waziqeda insuku zabo ngeze, leminyaka yabo ngenhlupheko enkulu.

³⁴ Lapho ebabulala abanye, abaseleyo bamdinga, baphenduka, bamfunisisa;

³⁵ bakhumbula ukuthi uNkulunkulu ulidwala labo, oPhezukonke ungumhlengi wabo.

³⁶ Kodwa bamkhohlisa ngemilomo yabo, baqamba amanga kuye ngenlimi zabo.

³⁷ Inhliziyo yabo yayingabambelelanga kuye, bengathembekanga esivumelwanweni sakhe.

³⁸ Kodwa yena elesihawu wabathethelela ukona kwabo, kababhubhisanga; walunqanda kanengi ulaka lwakhe, kakuvusanga konke ukuthukuthela kwakhe.

³⁹ Wakhumbula ukuthi bangabantu nje, bangumoya odlulayo ongabuyiyo.

⁴⁰ Kwaba kanengi kangakanani bephambana laye enkangala, bemdabukisa enkangala.

⁴¹ Bamlinga futhifuthi, bamthukuthelisa oNgcwele kaIsrayeli.

⁴² Kabawakhumbulanga amandla akhe, losuku abahlengwa ngalo ezitheni,

⁴³ esezenza izibonakaliso zakhe eGibithe, lezimangaliso zakhe endaweni yaseZowani.

⁴⁴ Waphendula imifula yabo abaseGibithe yaba ligazi, ukuze banganathi amanzi ayo.

⁴⁵ Wathumela phakathi kwabo izibawu ezabalumayo, lamaxoxo achitha ilizwe labo.

⁴⁶ Wanika imihogoyi amabele abo, lesithelo semisebenzi yabo isikhongwane.

⁴⁷ Wabulala amavini abo ngesiqhotho, lezihlahla zabo ngongqoqwane.

⁴⁸ Wanikela inkomo zabo esiqhothweni, lemihlambi yabo kuyo imibane.

⁴⁹ Wehlisela phezu kwabo ukuvutha kolaka lwakhe, lokuthukuthela, lokuconuka, lokuhlupheka, ixuku lezithunywa ezibulalayo.

⁵⁰ Waqhubeka ekubathukutheleleni, kabaphephisanga ekufeni, kodwa wabanikela emikhuhlaneni.

⁵¹ Wawabulala wonke amazibulo aseGibithe, okokuqala kwamandla abo emathenteni kaHamu.

⁵² Wasebakhupha abantu bakhe njengezimvu, wabahola enkangala njengomhlambi.

⁵³ Wabahola kuhle ukuze bangesabi; kodwa ulwandle lwasibekela izitha zabo.

⁵⁴ Wabafikisa elizweni lakhe elingcwele, ezintabeni ayezinqobile.

⁵⁵ Wazixotsha izizwe phambi kwabo; wabahlukanisela ilizwe lazo laba yilifa labo, wahlalisa izizwe zakoIsrayeli emathenteni azo.

⁵⁶ Kanti bamlinga, bamvukela oPhezukonke, kabazigcinanga izimiso zakhe,

⁵⁷ babuyela emuva, bakhohlisa njengabokhoko babo, baba njengedandili elitshilekileyo elikhohlisayo.

⁵⁸ Bamthukuthelisa ngezindawo zabo eziphakemeyo zokukhonzela, bavusa umona wakhe ngezithombe zabo.

⁵⁹ Lapho uNkulunkulu ekuzwa lokhu wathukuthela, wamlahla impela uIsrayeli.

⁶⁰ Wayitshiya indlu yakhe eShilo, ithente ayehlala kulo phakathi kwabantu.

⁶¹ Wanikela umtshokotsho wakhe ekuthunjweni, isibonakaliso senkazimulo yakhe ezandleni zezitha.

⁶² Wanikela abantu bakhe ekubulaweni, wakhuphela intukuthelo yakhe phezu kwelifa lakhe.

⁶³ Umlilo waqeda insizwa zabo, lezintombi zabo kazendanga.

⁶⁴ Abapristi babo babulawa ngomkhonto, labafelwakazi babo kabaze babalilela.

⁶⁵ Yasivuka iNkosi njengokade elele, njengomuntu olamandla oklabalaliswa liwayini.

⁶⁶ Yazixotsha izitha zayo, yazithela ihlazo elingapheliyo.

⁶⁷ Yayilahla inzalo kaJosefa, kayisikhethanga isizwe sakoEfrayimi,

⁶⁸ kodwa yakhetha isizwe sakoJuda, lentaba yaseZiyone eyithandayo.

⁶⁹ Yayakha indlu yayo engcwele njengamazulu aphakemeyo, yayiqinisa njengomhlaba ewusekeleyo kuze kube nininini.

⁷⁰ Yakhetha uDavida inceku yayo, yamthatha ezibayeni zezimvu;

⁷¹ ekwaluseni izimvukazi ezenyisayo yamthatha, ukuba ngumalusi wabantu bayo uJakobe, lelifa layo uIsrayeli.

⁷² Yena wabelusa ngobuqotho benhliziyo, wabahola ngenhlakanipho yesandla sakhe.