AmaHubo 77 - iBhayibhili Elingcwele 1978

Ukukhumbula izenzo zikaNkulunkulu kuyathokozisa

¹ Ngiyamemeza kuNkulunkulu, ngimemeza kuNkulunkulu ongizwayo.

² Osukwini lokuhlupheka kwami ngiyayidinga iNkosi; ebusuku ngiyelula isandla sami ngikhuleka, umphefumulo wami uyala ukududuzwa.

³ Ngiyamkhumbula uNkulunkulu, ngibubule; ngiyacabanga, lomoya wami uphele amandla.

⁴ Ungenzile ukuba ngingalali; ngikhathazekile, kangisakwazi ukukhuluma.

⁵ Ngiyazikhumbula insuku zasendulo leminyaka yasendulo.

⁶ Ngiyakhumbula enhliziyweni yami ebusuku, ngiyacabanga, ngizibuze ngithi:

⁷ INkosi izakungilahla kokuphela, ingabe izaphinda ibe lomusa na?

⁸ Uthando lwayo olungapheliyo seluphelile kokuphela na? Lezithembiso zayo seziphelile kokuphela na?

⁹ UNkulunkulu usekhohliwe ukuba lomusa na? Usevalele isihawu sakhe ngolaka na?

¹⁰ Ngasengisithi: Kuyikuhlupheka kwami ukuthi isandla sokunene soPhezukonke siphendukile.

¹¹ Ngizakhumbula izenzo zakho, Nkosi. Yebo, ngizakhumbula izimangaliso zakho ezindala.

¹² Ngizacabanga ngawo wonke umsebenzi wakho, nginakane ngezenzo zakho.

¹³ Indlela yakho, Nkulunkulu, ingcwele. Ngubani unkulunkulu omkhulu njengoNkulunkulu wethu na?

¹⁴ Wena unguNkulunkulu owenza izimangaliso, owabonakalisa amandla akho phakathi kwezizwe.

¹⁵ Ngamandla akho wabakhulula abantu bakho, amadodana kaJakobe loJosefa.

¹⁶ Lapho amanzi ekubona, Nkulunkulu, lapho amanzi ekubona ethuka; yebo, lamanzi atshonayo athuthumela.

¹⁷ Amayezi athulula amanzi, lezulu laduma; imitshoko yakho yaphazima inxa zonke.

¹⁸ Ilizwi lokuduma kwakho lalisesivunguvungwini; imibane yakho yakhanyisa umhlaba, lomhlaba wagedezela wazamazama.

¹⁹ Indlela yakho yadabula olwandle, lomkhondo wakho wadabula amanzi amanengi, kanti izinyathelo zakho zazingabonakali.

²⁰ Wabahola abantu bakho njengezimvu ngezandla zikaMose loAroni.