AmaHubo 74 - iBhayibhili Elingcwele 1978

Ukucela kuNkulunkulu ukuba asize abantu bakhe

¹ Nkulunkulu, usilahleleni kokuphela na? Ulaka lwakho luvuthelani ngakuzo izimvu zedlelo lakho na?

² Khumbula ibandla lakho owalikhetha endulo, abantu owabahlenga baba ngabakho, lentaba yaseZiyone ohlala kuyo.

³ Ngena ezindongeni ezingalungisekiyo; izitha zibhidlize konke endaweni engcwele.

⁴ Izitha zakho zibhongile phakathi kwendawo engcwele, zamisa ezazo impawu ukuba zibe yizimpawu zokunqoba.

⁵ Izitha zazinjengabantu abagamula izihlahla zesandle ngamahloka.

⁶ Konke okubaziweyo kwayo zakuphohloza ngamahloka langezando.

⁷ Zayitshisa indlu yakho engcwele, zayidilizela phansi indlu yebizo lakho, zayidumaza.

⁸ Zakhulumisana zisithi: Sizakubachitha impela. Zatshisa zonke indawo zokubuthanela zikaNkulunkulu elizweni.

⁹ Izimpawu zethu kazisekho; kakusekho mprofethi; kakho kithi owaziyo ukuthi koze kube nini.

¹⁰ Koze kube nini, Nkulunkulu, izitha zikloloda na? Izitha zizahlambaza ibizo lakho kokuphela na?

¹¹ Usifinyezeleni isandla sakho na? Ugodleleni isandla sakho sokunene ohlangothini lwakho na?

¹² Kanti uNkulunkulu uyiNkosi yami kusukela endulo, eyenza inkululeko emhlabeni.

¹³ Nguwe owahlukanisa ulwandle ngamandla akho; wafohloza amakhanda ezilo ezesabekayo zasemanzini.

¹⁴ Nguwe owafohloza amakhanda kaLeviyathani, wamenza waba yikudla kwezidalwa zasenkangala.

¹⁵ Nguwe owavulela amanzi emithombo lezifudlana, womisa imifula egobhozayo.

¹⁶ Usuku ngolwakho, lobusuku ngobakho; nguwe owamisa inyanga lelanga.

¹⁷ Wamisa yonke imikhawulo yomhlaba; wenza ihlobo lobusika.

¹⁸ Khumbula lokhu, Nkosi, ukuthi izitha ziyakloloda, labantu ababi bayalithuka ibizo lakho.

¹⁹ Ungawunikeli umphefumulo wejuba lakho ezinyamazaneni; ungakukhohlwa ukuphila kwezihlupheki zakho kokuphela.

²⁰ Khumbula isivumelwano sakho; ngoba zonke indawo ezimnyama zomhlaba zigcwele ububi.

²¹ Ungavumi bayangeke abacindezelweyo; abahluphekayo labaswelayo kabalidumise ibizo lakho.

²² Vuka, Nkulunkulu! uyimele indaba yakho, ukhumbule ukuthi ababi bayakuklolodela insuku zonke.

²³ Ungakhohlwa ukuvungama kwezitha zakho, ukuxokozela kwabakuvukelayo okwenyukela kuwe kokuphela.