AmaHubo 73 - iBhayibhili Elingcwele 1978

UGWALO LWESITHATHU Ukuphela kwababi

¹ Impela uNkulunkulu ulungile kuIsrayeli, kulabo abahlambulukileyo enhliziyweni.

² Kodwa mina inyawo zami zaphose zakhubeka, lezinyathelo zami zaphose zatshelela.

³ Ngoba ngaba lomona ngabazigqajayo lapho ngibona ukuphumelela kwababi.

⁴ Ngoba kabalabuhlungu, imizimba yabo iphilile iqinile.

⁵ Kabahlupheki njengabanye abantu, kabahlutshwa njengabanye abantu.

⁶ Ngakhoke bagqiza ukuzigqaja njengamangqongqo, bambathe isihluku njengengubo.

⁷ Ububi buyaphihlika emiphefumulweni yabo, lenhliziyo zabo ziphuphuma ubuthutha.

⁸ Bayakloloda bakhulume ngobubi, bayazikhukhumeza benze amacebo okucindezela.

⁹ Bakhuluma okubi ngaye osezulwini, ngokuzigqaja balaya abantu.

¹⁰ Ngakhoke abantu bayaphenduka babalandele, bavume konke abakutshoyo;

¹¹ bathi: UNkulunkulu wazi kanjani na? Kukhona ukwazi kuye oPhezukonke na?

¹² Khangela, labo yibo ababi, bahlala bechelesile, yande inotho yabo.

¹³ Impela ngihlambulule inhliziyo yami ngeze, ngagezela izandla zami ize.

¹⁴ Ngoba ngihlutshiwe usuku lonke, ngatshaywa ekuseni.

¹⁵ Uba bengithe ngizakukhuluma ngokunje, ngabe ngibakhohlisile abantu bakho.

¹⁶ Kwathi lapho ngizama ukuqedisisa lokhu, kwaba lukhuni kakhulu kimi,

¹⁷ ngaze ngangena endlini engcwele kaNkulunkulu; ngakubonisisa ukuphela kwabo.

¹⁸ Impela ubamisa endaweni ebutshelezi, ubawisela ekubhujisweni.

¹⁹ Yeka ukuchitheka kwabo masinyane! Bakhukhulwa baqedwa yikwesaba.

²⁰ Banjengephupho ekuphaphameni komuntu, okhohlwa umfanikiso walo ekuvukeni kwakhe.

²¹ Lapho umphefumulo wami usubuhlungu, lapho inhliziyo yami isidabukile,

²² ngaba yisiphukuphuku esingaziyo, ngaba njengenyamazana kuwe.

²³ Kodwake mina ngihlala lawe njalo; ungibambile ngesandla sami sokunene.

²⁴ Uzakungihola ngeseluleko sakho, emva kwalokho ungamukele ebukhosini.

²⁵ Ngilobani ezulwini ngaphandle kwakho na? Kakukho engikufisayo emhlabeni ngaphandle kwakho.

²⁶ Inyama yami lenhliziyo yami kuyaphela, kodwa uNkulunkulu ungamandla enhliziyo yami lesabelo sami kuze kube nininini.

²⁷ Ngoba labo abakhatshana lawe bazakubhubha; uzakubachitha bonke abangathembekanga kuwe.

²⁸ Kodwa mina kungilungele ukuba seduze loNkulunkulu; ngiyenzile iNkosi uNkulunkulu wami yaba yisiphephelo sami, ukuze ngitshumayele zonke izenzo zakhe.