AmaHubo 72 - iBhayibhili Elingcwele 1978

Ukukhulekela inkosi

¹ Nkulunkulu, nika inkosi izahlulelo zakho lendodana yenkosi ukulunga kwakho.

² Kayahlulele abantu bakho ngokulunga, lezihlupheki zakho ngemfanelo.

³ Izintaba kazilethele abantu ukuthula, lamaqaqa ukulunga.

⁴ Ibavikele abahluphekayo babantu, ikhulule abaswelayo, ifohloze abacindezelayo.

⁵ Kayihlale njalo lisekhona ilanga, kusekhona lenyanga, kuzo zonke izizukulwana.

⁶ Kayibe njengezulu elehlela otshanini, njengezihlambo ezithambisa umhlaba.

⁷ Ensukwini zayo ukulunga kakuphumelele, lokuthula kwande, ize iphele inyanga.

⁸ Izabusa kusukela kolunye ulwandle kuze kufike kolunye, kusukela emfuleni iYufrathi kuze kufike emikhawulweni yomhlaba.

⁹ Abahlala enkangala bazakhothama phansi kwayo; izitha zayo zizakhotha uthuli.

¹⁰ Amakhosi aseTarshishi lawasezihlengeni azaletha izipho, amakhosi aseSheba laseSeba alethe izipho.

¹¹ Amakhosi wonke azakuwa phansi phambi kwayo, izizwe zonke ziyikhonze.

¹² Ngoba iyamkhulula ohluphekayo lapho ekhala, longumyanga ongelamsizi.

¹³ Ilesihawu kobuthakathaka lakoswelayo, iyabakhulula abaswelayo.

¹⁴ Iyabakhulula ekucindezelweni lasebubini; baligugu emehlweni ayo.

¹⁵ Kayiphile njalo, kayinikwe igolide laseSheba, ikhulekelwe njalonjalo, ibusiswe insuku zonke.

¹⁶ Kakube khona inala yamabele elizweni lasezingqongeni zezintaba; izithelo zakhona zihatshazele njengeLebanoni; imizi kayigcwale abantu njengomhlaba ogcwele utshani.

¹⁷ Ibizo layo kalime kuze kube nini lanini, lodumo lwayo luqhubeke njalo lisekhona ilanga. Abantu kababusiswe ngayo, lezizwe zonke zithi: Ibusisiwe.

¹⁸ Kayibongwe iNkosi uNkulunkulu kaIsrayeli, onguye yedwa owenza izinto ezimangalisayo.

¹⁹ Kalibongwe ibizo lakhe elilodumo kuze kube nininini; umhlaba wonke ugcwale ubukhosi bakhe. Ameni, Ameni!

²⁰ Imikhuleko kaDavida indodana kaJese isiphelile.