AmaHubo 7 - iBhayibhili Elingcwele 1978

Umkhuleko wokucela iNkosi ukuba yahlulele

¹ Nkosi, Nkulunkulu wami, ngiyaphephela kuwe; ngisiza kubo bonke abangizingelayo, ungikhulule,

² funa bangidabule njengesilwane, bangiklebhule, kungekho osizayo.

³ Nkosi, Nkulunkulu wami, uba ngikwenzile lokho, uba kukhona okubi ezandleni zami,

⁴ uba ngiphindisele okubi kohlalisene lami ngokuhle, ngayekela isitha sami esangihlasela ngaphandle kwecala,

⁵ isitha sami kasingizingele singibambe, sikunyathele phansi ukuphila kwami, siwulahle phansi umphefumulo wami.

⁶ Vuka, Nkosi, ngolaka lwakho, uvuke ngenxa yentukuthelo yezitha zami. Vuka, Nkulunkulu wami, wena umisile ukwahlulelwa.

⁷ Umhlangano wezizwe kawukuhanqe, wena uhlale esihlalweni sakho esiphakamileyo.

⁸ INkosi iyahlulela izizwe. Nkosi, ngahlulela ngokulunga kwami langobuqotho obukimi.

⁹ Kabuphele ububi bababi, kodwa olungileyo umqinise, wena ohlola ingqondo lenhliziyo, onguNkulunkulu olungileyo.

¹⁰ Isihlangu sami nguNkulunkulu osiza abaqotho enhliziyweni.

¹¹ UNkulunkulu ungumahluleli olungileyo, unguNkulunkulu othukuthela insuku zonke.

¹² Uba umuntu engaphenduki, uNkulunkulu uzalola umkhonto wakhe; useligobile walibopha idandili lakhe,

¹³ usezilungisile izikhali zakhe zokubulala, wayenza imitshoko yakhe itshise njengomlilo.

¹⁴ Khangela, omubi uyomula okubi, akhulelwe yikona, azale amanga.

¹⁵ Umba umgodi awutshonise, abuye awele kuwo umhome awenzileyo.

¹⁶ Ububi bakhe behlele phezu kwekhanda lakhe, lesihluku sakhe sehlele enkanda yakhe.

¹⁷ Ngizakuyibonga iNkosi ngokulunga kwayo, ngihlabelele ibizo leNkosi ePhezukonke.