AmaHubo 69 - iBhayibhili Elingcwele 1978

Ukukhala kohluphekayo

¹ Ngikhulula, Nkulunkulu, ngoba amanzi asefike entanyeni yami.

² Ngiyatshona odakeni, lapho kungelandawo yokuma; ngingene emanzini atshonayo, lempophoma iyangicwilisa.

³ Sengidiniwe yikukhala, lomphimbo wami womile; amehlo ayafiphala ekudingeni uNkulunkulu wami.

⁴ Abangizondayo ngeze banengi ukwedlula inwele zekhanda lami; balamandla abafuna ukungibulala, bengihlasela ngaphandle kwecala. Lokho engingakuntshontshanga kumele ngikubuyisele na?

⁵ Nkulunkulu, wena uyabazi ubuthutha bami, lezono zami kazifihlakalanga kuwe.

⁶ Kabangayangeki ngami labo abathemba kuwe, Nkosi Nkulunkulu wamabandla, bangadunyazwa ngami abakudingayo, Nkulunkulu kaIsrayeli.

⁷ Ngoba ngithelwe lihlazo ngenxa yakho, ihlazo lisibekele ubuso bami.

⁸ Sengaba ngowasemzini kubafowethu, lowezizweni kubantwana bakamama.

⁹ Ngoba ukutshisekela indlu yakho kungidlile, lenhlamba yabakuthukayo yehlele phezu kwami.

¹⁰ Ngakhathaza umphefumulo wami ngokuzila ukudla, ngadunyazwa ngalokho.

¹¹ Lapho ngisambatha ingubo yokulila ngaba yisiga kibo.

¹² Abahlezi enkundleni bakhuluma ngami, lezidakwa ziyangihaya.

¹³ Kodwa mina ngikhuleka kuwe, Nkosi. Ngesibanga esifaneleyo, Nkulunkulu, ngobunengi bothando lwakho olungapheliyo ngiphendula, ngeqiniso lokusiza kwakho.

¹⁴ Ungophule, ngingatshoni exhaphozini, ngikhululwe ezitheni zami lasemanzini atshonayo.

¹⁵ Izimpophoma kazingangicwilisi, lenziki ingangiginyi, lomgodi ungavali umlomo wawo phezu kwami.

¹⁶ Ngiphendula, Nkosi, ngoba uthando lwakho olungapheliyo lulungile; ngobunengi besihawu sakho uphendukele kimi.

¹⁷ Ungayifihleli ubuso bakho inceku yakho; ngoba ngiyahlupheka, phangisa ungiphendule.

¹⁸ Sondela kimi, ungihlenge, ungikhulule ngenxa yezitha zami.

¹⁹ Wena uyakwazi ukuthukwa kwami, lehlazo lami lokudunyazwa kwami; lezitha zami zonke uyazazi.

²⁰ Ukuthukwa kuyidabule inhliziyo yami, ngakho ngiyagula kakhulu. Bengilindele ukuhawukelwa, kodwa kangikuzuzanga, labaduduzayo, kodwa kangibafumananga.

²¹ Bangipha itshefu ibe yikudla kwami, ekomeni kwami banginathisa iwayini elimunyu.

²² Ukudla kwabo kakube ngumjibila kibo, leminikelo yabo ibabambe.

²³ Amehlo abo kawafiphale ukuze bangaboni, inkalo zabo zithuthumele.

²⁴ Thela intukuthelo yakho phezu kwabo, lolaka lwakho oluvuthayo lubafice.

²⁵ Umuzi wabo kawube lunxiwa, kungabi khona ohlala emathenteni abo.

²⁶ Ngoba otshaywe nguwe bayamzingela, laye olinyazwe nguwe bayamengeza amanxeba.

²⁷ Yengezelela ukona ekoneni kwabo, ukuze bangangeni ekulungeni kwakho.

²⁸ Kabesulwe encwadini yabaphilayo, bangabalwa kanye labalungileyo.

²⁹ Kodwa mina ngihluphekile, ngiyafuthelwa; ukukhulula kwakho, Nkulunkulu, kakungiphakamise.

³⁰ Ngizakulibonga ibizo likaNkulunkulu ngehubo, ngimdumise ngokubonga.

³¹ Lokhu kuzakuyithokozisa iNkosi ukwedlula umnikelo wenkabi, lomnikelo wenkunzi elempondo lamangqina.

³² Abacindezelweyo kabakubone lokhu, bathokoze; lina elidinga uNkulunkulu kazivuseleleke inhliziyo zenu.

³³ Ngoba iNkosi iyabalalela abahluphekayo, kayizideleli izibotshwa zayo.

³⁴ Izulu lomhlaba kakuyibonge, izinlwandle lakho konke okuphakathi kwazo.

³⁵ Ngoba uNkulunkulu uzakukhulula iZiyone, akhe futhi imizi yakoJuda; lezinceku zakhe zizakuhlala khona ibe yilifa lazo.

³⁶ Abantwana bezinceku zakhe bazakudla ilifa, labalithandayo ibizo lakhe bazakuhlala khona.