AmaHubo 68 - iBhayibhili Elingcwele 1978

Ukunqoba kukaNkulunkulu kaIsrayeli

¹ UNkulunkulu kavuke, zihlakazeke izitha zakhe, abamzondayo babaleke phambi kwakhe.

² Baphephethe njengentuthu; njengokuncibilika kwengcino phambi komlilo, ababi kabachithwe phambi komlilo, ababi kabachithwe phambi kukaNkulunkulu.

³ Kodwa abalungileyo kabajabule, bathabe phambi kukaNkulunkulu, bathokoze lokuthokoza.

⁴ Hlabelelani kuNkulunkulu, hlabelani lidumise ibizo lakhe, lihlabele ingoma kuye ohlezi phezu kwamayezi; ibizo lakhe nguNkosi, thokozani phambi kwakhe.

⁵ UYise wezintandane lomvikeli wabafelwakazi nguNkulunkulu endlini yakhe engcwele.

⁶ UNkulunkulu unika abahluphekayo indawo yokuhlala, ukhuphela izibotshwa ekukhululekeni, kodwa abalenkani ubayekela elizweni elomileyo.

⁷ Nkulunkulu, ekuholeni kwakho abantu bakho, ekudabuleni kwakho enkangala,

⁸ umhlaba wazamazama, amazulu avuza amanzi, phambi kukaNkulunkulu weSinayi, phambi kukaNkulunkulu, uNkulunkulu kaIsrayeli.

⁹ Walinisa izulu elikhulu, Nkulunkulu, walivuselela ilizwe lakho selichitheka;

¹⁰ abantu bakho bazuza indawo yokuhlala kulo; ngobuhle bakho, Nkulunkulu, wabalungisela abaswelayo.

¹¹ INkosi iyakhupha ilizwi; ixuku elikhulu labesifazana liyabika izindaba,

¹² lithi: Amakhosi ezimpi ayabaleka, ayabaleka. Bona abesifazana abasekhaya bayabelana impango.

¹³ — Lanxa lilala phakathi kwezibaya zezimvu, amaphiko ejuba asitshekelwe yisiliva, lezimpaphe zalo zisitshekelwe ligolide —

¹⁴ Lapho uSomandla echitha amakhosi kulo, ungqoqwane wawela eZalimoni.

¹⁵ Ntaba enkulu, ntaba yaseBashani, ntaba elezingqonga, ntaba yaseBashani;

¹⁶ wena ntaba elengqonga ezinengi, uyikhangelelani ngomona intaba uNkulunkulu athanda ukuhlala kuyo na? Yebo, iNkosi izakuhlala kuyo kuze kube nininini.

¹⁷ Ngezinqola zokulwa eziyizinkulungwane ezingamatshumi amabili, izinkulungwane ngezinkulungwane, iNkosi yehla endaweni engcwele ivela eSinayi.

¹⁸ Wena wakhwela phezulu entabeni, ulandelwa ngabathunjiweyo; wamukela iziphiwo ebantwini, yebo, lakwabalenkani; iNkosi uNkulunkulu izahlala khona.

¹⁹ Kayibongwe iNkosi esithwalela imithwalo yethu insuku ngensuku; uNkulunkulu ungumkhululi wethu.

²⁰ UNkulunkulu wethu unguNkulunkulu wokukhulula; uNkulunkulu iNkosi ungasisiza ekufeni.

²¹ Kodwa uNkulunkulu uzakuphohloza amakhanda ezitha zakhe, ukhakhayi olulenwele lwalowo ohamba ezonweni zakhe.

²² INkosi yathi: Ngizakubabuyisa eBashani, ngibabuyise enzikini yolwandle,

²³ ukuba inyawo zakho uzigezise egazini labo, inlimi zezinja zakho zibe lesabelo sazo ezitheni.

²⁴ Ziyabonakala izindwendwe zakho, Nkulunkulu; izindwendwe zikaNkulunkulu wami leNkosi yami zingena endaweni engcwele.

²⁵ Ngaphambili kuhamba abahlabelayo, ngemuva kulandela abatshayi bamachacho, phakathi kwabo kuhamba izintombi zitshaya izigubhu.

²⁶ Bongani uNkulunkulu ebandleni elikhulu, bongani iNkosi, lina eliyinzalo kaIsrayeli.

²⁷ Nango uBenjamini ongomncinyane wabo ebahola, lezikhulu zikaJuda zibuthene, lezikhulu zikaZebuluni, lezikhulu zikaNafitali.

²⁸ Veza amandla akho, Nkulunkulu; bonakalisa amandla akho, Nkulunkulu, osenzele wona

²⁹ usethempelini lakho eliseJerusalema lapho amakhosi akulethela khona izipho.

³⁰ Sikhuze isilo esihlala emihlangeni, ukhuze umhlambi wezinkunzi kanye lamankonyane azo, ngitsho izizwe, zithobeke zikulethele isiliva; ubachithe abantu abathanda ukulwa.

³¹ Izikhulu zizakuza zivela eGibithe; iEtiyopiya lizakuphakamisela izandla zalo kuNkulunkulu ngokuphangisa.

³² Lina mibuso yomhlaba hlabelelani kuNkulunkulu, lihlabelele ukubonga eNkosini,

³³ kuyo ekhwele phezu kwamazulu ayekhona kusukela endulo; khangelani, iyazwakalisa ilizwi layo, ilizwi layo elilamandla.

³⁴ Nikani udumo kuNkulunkulu, obukhosi bakhe buphezu kukaIsrayeli, lamandla akhe asemayezini.

³⁵ UNkulunkulu uyesabeka endaweni yakhe engcwele; UNkulunkulu kaIsrayeli, nguye onika abantu bakhe amandla. Kabongwe uNkulunkulu.