AmaHubo 59 - iBhayibhili Elingcwele 1978

Umkhuleko wokucela ukukhululwa ezitheni

¹ Nkulunkulu wami, ngikhulula ezitheni zami, ungivikele kwabangivukelayo;

² ngikhulula kulabo abenza okubi, ungisize ebantwini abachitha igazi.

³ Ngoba, khangela, bayangicathamela; abantu abesabekayo bayangihlanganyela, kungekho siphambeko lesono kimi, Nkosi;

⁴ bayagijima bahlome, kungekho cala kimi. Vuka! ungisize, ubabone,

⁵ wena, Nkosi Nkulunkulu wamabandla, onguNkulunkulu kaIsrayeli; vuka, uphindisele zonke izizwe, ungayekeli lamunye walabo abenza okubi.

⁶ Bayabuya kusihlwa behlaba umkhulungwane njengezinja, bezula phakathi komuzi.

⁷ Nampo bempompoloza ngemilomo yabo, bengqathuza ngamazinyo abo, ngoba bathi: Ngubani osizwayo na?

⁸ Kodwa wena, Nkosi, uyabahleka, uyaziklolodela zonke izizwe.

⁹ Wena, mandla ami, ngizakuhlabelela amahubo okubonga, ngoba wena, Nkulunkulu, uyinqaba yami.

¹⁰ UNkulunkulu wami uzakungihlangabeza ngothando lwakhe olungapheliyo, angitshengise engikufisayo phezu kwezitha zami.

¹¹ Ungazibulali, funa abantu bakithi bakhohlwe; uzichithachithe ngamandla akho, uzahlule, wena Nkosi, sihlangu sethu.

¹² Ngesono semilomo yazo langamazwi emilomo yazo kazibanjwe ekuzigqajeni kwazo, langenxa yokuhlambaza lokuqamba amanga ezikwenzayo.

¹³ Uziqede ngokuthukuthela, uziqede zingabe zisaba khona, ukuze abantu bazi ukuthi uNkulunkulu uyabusa koJakobe, kuze kube sekupheleni komhlaba.

¹⁴ Bayabuya kusihlwa behlaba umkhulungwane njengezinja, bezula phakathi komuzi.

¹⁵ Bayazulazula befuna ukudla, bahwabhe nxa bengasuthanga.

¹⁶ Kodwa mina ngizakuhlabelela ngamandla akho; ngizakuhlabelela ekuseni ngothando lwakho olungapheliyo; ngoba wena ube yinqaba yami lesiphephelo sami ngosuku lokuhlupheka.

¹⁷ Wena, mandla ami, ngizakukuhlabelela amahubo okubonga, ngoba wena, Nkulunkulu, uyinqaba yami, uNkulunkulu ongithanda ngothando olungapheliyo.