AmaHubo 57 - iBhayibhili Elingcwele 1978

Umkhuleko wokucela ukukhululwa

¹ Ngihawukela, Nkulunkulu, ngihawukela, ngoba umphefumulo wami uphephela kuwe; ngifuna ukuphephela emthunzini wamaphiko akho, zize zidlule inhlupheko.

² Ngiyakhala kuNkulunkulu oPhezukonke, kuNkulunkulu ophelelisa icebo lakhe ngami.

³ UNkulunkulu uzakuthumela uthando lwakhe olungapheliyo lobuqotho bakhe. Uzakuthuma esezulwini, angisize; uzakubayangisa labo abangifihlizayo.

⁴ Ngihlala phakathi kwezilwane eziphanga abantu; amazinyo azo ayimikhonto lemitshoko, lenlimi zazo ziyimihedla ebukhali.

⁵ Phakama, Nkulunkulu, ngaphezu kwamazulu; ubukhosi bakho bube phezu komhlaba wonke.

⁶ Abantu bangilungisele umthiya; ngehlelwe yikwesaba; bangimbele umgodi endleleni, kodwa bawele bona kuwo.

⁷ Inhliziyo yami iqinisiwe, Nkulunkulu, inhliziyo yami iqinisiwe. Ngizakuhlabelela ngihube.

⁸ Vuka, mphefumulo wami! Vukani, mhubhe lechacho! Ngizakuvusa ukusa.

⁹ Ngizakukubonga, Nkosi, phakathi kwabantu, ngikudumise phakathi kwezizwe.

¹⁰ Ngoba uthando lwakho olungapheliyo lukhulu, lufinyelela ezulwini, lobuqotho bakho buthinta emayezini.

¹¹ Phakama, Nkulunkulu, ngaphezu kwamazulu; ubukhosi bakho bube phezu komhlaba wonke.