AmaHubo 55 - iBhayibhili Elingcwele 1978

Umkhuleko womuntu okhohliswayo

¹ Nkulunkulu, lalela ukukhuleka kwami, ungazifihli ekunxuseni kwami.

² Zwana, ungiphendule; ngiyasindwa yikuhlupheka kwami.

³ Ngitshaywa luvalo ngomsindo wezitha ngenxa yokubandezela kwababi; ngoba bangilethela izinkathazo, bangizingela ngokuthukuthela.

⁴ Inhliziyo yami iyathuthumela phakathi kwami, ukwesaba ukufa kuphezu kwami.

⁵ Ngifikelwa luvalo lokuthuthumela, ngehlelwe yikwesaba okukhulu,

⁶ ngize ngithi: Kungathi ngabe ngilamaphiko njengejuba! Ngabe ngiphaphela khatshana, ngiphumule khona.

⁷ Yebo, bengingabalekela khatshana ngihlale enkangala.

⁸ Bengingaphuthuma indawo yokucatsha, ngicatshele umoya ovunguzayo lesiphepha.

⁹ Achithe amacebo abo, Nkosi, uphambanise ukukhuluma kwabo. Ngibona ububi lokuxabana phakathi komuzi.

¹⁰ Emini lasebusuku babhoda imithangala yawo; ububi lenkathazo kuphakathi kwawo,

¹¹ ukuchitheka kuphakathi kwawo; imbandezelo lenkohliso kakupheli emidangeni yawo.

¹² Uba bekuyisitha esingiklolodelayo, bengizakukumela; uba bekungongizondayo ongiphethe kubi, bengizakumcatshela.

¹³ Kodwa kunguwe, ntanga yami, mnakwethu lomngane wami.

¹⁴ Sasixoxa ngokumnandi sonke, saphelekezelana endlini kaNkulunkulu.

¹⁵ Ukufa kakubafikele, bawiselwe endaweni yabafileyo besaphila, ngoba ububi busemizini yabo lasenhliziyweni yabo.

¹⁶ Mina ngikhuleka kuNkulunkulu, iNkosi izakungisiza.

¹⁷ Kusihlwa lasekuseni lasemini ngiyakhala ngibubule, izakulizwa ilizwi lami;

¹⁸ izakukhulula umphefumulo wami ngokuthula empini engiyilwayo, ngoba banengi abamelana lami.

¹⁹ UNkulunkulu uzakungizwa, abathobise, yena okhona kusukela endulo, ngoba bengaphenduki, bengamesabi uNkulunkulu.

²⁰ Umnakwethu walwa labangane bakhe, wasaphula isivumelwano sakhe.

²¹ Ukukhuluma kwakhe kubutshelezi kulolaza, kanti inhliziyo yakhe ithanda ukulwa; amazwi akhe abuthakathaka kulamagcobo, kanti anjengomkhonto obukhali.

²² Wethulele phezu kweNkosi umthwalo wakho, yona izakukusekela; kayiyikuvuma lanini ukuba olungileyo anyikinywe.

²³ Kodwa wena, Nkulunkulu, uzakubawisela phansi, uzakubawisela emgodini otshonayo; abantu begazi lenkohliso kabayikufinyelela lasengxenyeni yensuku zabo zokuphila. Kodwa mina ngizakuthemba kuwe.