AmaHubo 52 - iBhayibhili Elingcwele 1978

Ubuze bokuzincoma ngokwenza okubi

¹ Uzincomelani ngokubi okwenziwa phezu kolungileyo, wena qhawe na?

² Usuku lonke wenza amacebo okubhubhisa, ulimi lwakho lunjengensingo, wena owenza inkohliso.

³ Uthanda okubi kulokuhle, lokuqamba amanga kulokukhuluma iqiniso;

⁴ uthanda amazwi achithayo, wena olenkohliso.

⁵ Kodwa uNkulunkulu uzakukubhidliza kokuphela, uzakukuhluthuna akukhuphe ethenteni lakho, akususe elizweni labaphilayo.

⁶ Abalungileyo bazakubona besabe, bazakumhleka besithi:

⁷ Khangelani, nangu umuntu ongamenzanga uNkulunkulu abe yisiphephelo sakhe, kodwa wathemba inotho yakhe enkulu, wathembela ekwenzeni okubi.

⁸ Kodwa mina nginjengesihlahla esiluhlaza esithiwa ioliva esisendlini kaNkulunkulu. Ngiyathemba othandweni olungapheliyo lukaNkulunkulu kuze kube nininini.

⁹ Ngizakukudumisa kuze kube nini lanini ngokwenza kwakho, Nkulunkulu. Ngizakulitshumayela ibizo lakho phambi kwabangcwele, ngoba lihle.