AmaHubo 50 - iBhayibhili Elingcwele 1978

Ukudumisa okuqotho

¹ USomandla, uNkulunkulu, iNkosi, uyakhuluma, ubiza umhlaba kusukela ekuphumeni kwelanga kuze kube sekutshoneni kwalo.

² EZiyone elipheleleyo ngobuhle uNkulunkulu uyakhanya.

³ UNkulunkulu wethu uyeza, kayikuthula, phambi kwakhe kulomlilo oqothulayo, emaceleni akhe kulesiphepho esikhulu.

⁴ Uyabiza izulu ngaphezulu kanye lomhlaba, ukuze ahlulele abantu bakhe;

⁵ uthi: Buthelani kimi abangcwele bami, abenza isivumelwano lami ngomhlatshelo.

⁶ Amazulu ayatshumayela ukulunga kwakhe, ngoba uNkulunkulu ngokwakhe ungumahluleli.

⁷ Uthi: Zwanini bantu bami, ngizakhuluma; Israyeli, ngizafakaza ngawe ukuthi: NginguNkulunkulu, uNkulunkulu wakho.

⁸ Kangikusoli ngenxa yemihlatshelo yakho; iminikelo yakho yokutshiswa ihlala iphambi kwami.

⁹ Kangiyikwamukela inkunzi evela emzini wakho lentondolo evela esibayeni sakho.

¹⁰ Ngoba ngezami zonke inyamazana zehlathi lenkomo ezisentabeni eziyizinkulungwane.

¹¹ Ngiyazazi inyoni zonke zaphezulu, konke okuhamba egangeni ngokwami.

¹² Uba bengilambile, bengingayikutshela wena, ngoba umhlaba lakho konke okukuwo ngokwami.

¹³ Ngiyayidla yini inyama yezinkunzi, nginathe igazi lembuzi na?

¹⁴ Nikela kuNkulunkulu umnikelo wokubonga, ugcwalise izithembiso zakho koPhezukonke;

¹⁵ ukhuleke kimi osukwini lokuhlupheka, ngizakukukhulula, wena uzakungidumisa.

¹⁶ Kodwa komubi uNkulunkulu uthi: Yini ukuba utshumayele izimiso zami, ukhulume isivumelwano sami ngomlomo wakho na?

¹⁷ Ngoba uyakuzonda ukuqondiswa, lamazwi ami uyawadelela.

¹⁸ Lapho ubona isela uvumelana lalo, uhlangana kanye lezifebe.

¹⁹ Umlomo wakho uyawuvumela ebubini, lolimi lwakho ukuba luqambe inkohliso.

²⁰ Uhlala unyeya umfowenu, uhlebe indodana kanyoko.

²¹ Lokhu ukwenzile, ngathula; wacabanga ukuthi nginjengawe. Kodwa khathesi ngiyakukhuza, ngikutshengise amacala akho.

²² Kuqaphele lokhu, wena okhohlwa uNkulunkulu, funa ngikudabule, kungabi khona okukhululayo.

²³ Onikela umnikelo wokubonga uyangidumisa; oqaphela indlela yakhe ngizakumbonisa ukukhulula kwami.