AmaHubo 5 - iBhayibhili Elingcwele 1978

Umkhuleko wokucela ukuvikelwa ezitheni

¹ Zwana amazwi ami, Nkosi; ulalele ukububula kwami.

² Zwana ilizwi lokukhala kwami, Nkosi yami, Nkulunkulu wami; ngikhuleka kuwe, Nkosi,

³ ekuseni uyalizwa ilizwi lami; ekuseni ngiyalungisa umnikelo wami, ngilindele wena.

⁴ Ngoba wena kawusuye uNkulunkulu othanda okubi; omubi kayikuhlala lawe.

⁵ Abazikhukhumezayo kabazukuma phambi kwakho; uyabazonda bonke abenza okubi.

⁶ Uyababhubhisa abaqamba amanga. INkosi iyabenyanya abachitha igazi labalenkohliso.

⁷ Kodwa mina ngizakungena endlini yakho ngobukhulu besihawu sakho, ngikhothame ngokuhlonipha, ngikhangele ethempelini lakho elingcwele.

⁸ Nkosi, ngikhokhela ngokulunga kwakho ngenxa yezitha zami, uyenze indlela yakho iqonde phambi kwami.

⁹ Ngoba kalikho iqiniso emilonyeni yazo, inhliziyo zazo ziyibubi impela; imiphimbo yazo ililiba elivulekileyo, ziyakhohlisa ngenlimi zazo.

¹⁰ Kazithwale icala lazo, Nkulunkulu, kaziwe ngenxa yamacebo azo; uzilahle ngenxa yeziphambeko zazo ezinengi, ngoba zikuvukele.

¹¹ Kodwa kabajabule bonke abaphephela kuwe, bahlabelele kokuphela ngokuthokoza; ubavikele labo abathanda ibizo lakho ukuba bathokoze kuwe.

¹² Ngoba wena Nkosi, uyambusisa olungileyo, uyamvikela ngomusa njengesihlangu.