AmaHubo 49 - iBhayibhili Elingcwele 1978

Ubuthutha balabo abathemba inotho

¹ Zwanini lokhu lonke lina bantu. Lalelani lonke lina elakhileyo emhlabeni,

² abantukazana lezikhulu, abanothileyo labayanga.

³ Umlomo wami uzakukhuluma ukuhlakanipha, inhliziyo yami izacabanga ngokuqedisisa.

⁴ Ngizakubeka indlebe yami kuso isaga, ngizakuveza imfumba yami ngechacho.

⁵ Ngizakwesabelani ezikhathini ezimbi, lapho ububi babangizingelayo bungihanqa,

⁶ abantu abathemba inotho yabo, bezincoma ngobunengi benotho yabo na?

⁷ Impela umuntu angeke azihlenge, angeke amnike uNkulunkulu inhlawulo yokuphila kwakhe,

⁸ — ngoba ukuhlengwa kokuphila kwakhe kuyabiza intengo enkulu, engeke yakhutshwa muntu —

⁹ ukuba aphile angafi.

¹⁰ Uzakubona ukuthi labahlakaniphileyo bayafa, lokuthi isithutha kanye lesiphukuphuku ziyakufa, inotho yabo bayitshiyele abanye.

¹¹ Amaliba abo ayimizi yabo kuze kube nininini, izindawo zabo zokuhlala kokuphela, lanxa babesithi amazwe ngawabo.

¹² Umuntu kalakuhlala kokuphela lanxa elodumo, uyafana lezinyamazana ezibhubhayo.

¹³ Injalo indlela yabo abazithembayo, ukuphela kwalabo abazithokozisa ngokukhuluma kwabo,

¹⁴ bamiselwe indawo yabafileyo njengezimvu, ukufa kuzabelusa; abaqotho bazababusa kusasa, imizimba yabo iphelele endaweni yabafileyo ezakuba likhaya labo.

¹⁵ Kodwa uNkulunkulu uzakuhlenga umphefumulo wami emandleni endawo yabafileyo, ngoba uzakungamukela.

¹⁶ Ungamhawukeli nxa umuntu enotha, nxa inotho yendlu yakhe isanda;

¹⁷ ngoba ekufeni kwakhe kayikusuka lalutho, inotho yakhe kayiyikuhamba laye.

¹⁸ Lapho esaphila uthi uyabusa, labantu bayamdumisa nxa ephumelela.

¹⁹ Kanti uzakuya kuboyisemkhulu abangasayikubona ukukhanya kuze kube nininini.

²⁰ Umuntu kalakuhlala kokuphela lanxa elodumo, uzakufa njengezinyamazana ezibhubhayo.