AmaHubo 48 - iBhayibhili Elingcwele 1978

IZiyone ingumuzi kaNkulunkulu

¹ Yinkulu iNkosi, ifanele ukudunyiswa kakhulu emzini kaNkulunkulu wethu osentabeni yayo engcwele.

² Yinhle ngokuphakama intaba yaseZiyone; iyikuthokoza kuwo wonke umhlaba; umi ngasenyakatho umuzi weNkosi enkulu.

³ Ezigodlweni zawo uNkulunkulu uyaziwa ukuthi uyinqaba eqinileyo.

⁴ Ngoba, khangela, amakhosi abuthana, aqhubeke kanyekanye;

⁵ athi ukuba awubone, amangala, atshaywa luvalo, aphaphatheka,

⁶ ehlelwa lapho yikuthuthumela layibuhlungu, njengowesifazana ohelelwayo.

⁷ Ngoba ngomoya wasempumalanga wayiphahlaza imikolo emikhulu.

⁸ Esikuzwileyo sikubonile emzini weNkosi yamabandla, emzini kaNkulunkulu wethu, uNkulunkulu awumise kuze kube nininini.

⁹ Sikhumbula uthando lwakho olungapheliyo, Nkulunkulu, siphakathi kwethempeli lakho.

¹⁰ Njengalo ibizo lakho, Nkulunkulu, ukudunyiswa kwakho kufinyelela emikhawulweni yomhlaba; isandla sakho sokunene sigcwele ukulunga.

¹¹ Kayithokoze intaba yaseZiyone, lemizi yakoJuda ithabe ngenxa yezahlulelo zakho.

¹² Ibhodeni iZiyone, libale imiphotshongo yayo,

¹³ liqaphelise imithangala yayo, lidabule ezigodlweni zayo, ukuze lixoxele isizukulwana esizayo,

¹⁴ ukuthi lo nguNkulunkulu, unguNkulunkulu wethu kuze kube nininini; yena uzakusihola kuze kube nini lanini.