AmaHubo 46 - iBhayibhili Elingcwele 1978

UNkulunkulu uyisiphephelo sethu

¹ UNkulunkulu uyisiphephelo sethu lamandla ethu, uyafunyaniswa elusizo kakhulu ekuhluphekeni.

² Ngakhoke kasiyikwesaba lanxa umhlaba unyikinyeka, lanxa izintaba ziphoselwa olwandle,

³ lanxa amanzi alo ehlokoma, ekhaphazela, lezintaba zizamazama ngokukhukhumala kwalo.

⁴ Kukhona umfula omanzi awo athokozisa umuzi kaNkulunkulu, indawo engcwele yoPhezukonke.

⁵ UNkulunkulu uphakathi kwawo, kawuyikunyikinywa; uNkulunkulu uzakuwusiza ngovivi lokusa.

⁶ Izizwe ziyaxokozela, lemibuso izamazame; ukhupha ilizwi lakhe, umhlaba uncibilike.

⁷ INkosi yamabandla ilathi, uNkulunkulu kaJakobe uyisiphephelo sethu.

⁸ Wozani libone izenzo zeNkosi, incithakalo ayenzileyo emhlabeni.

⁹ Iyaqeda ukulwa endaweni zonke; iqamula idandili, yaphule umkhonto, lezihlangu izitshisa ngomlilo.

¹⁰ Thulani, lazi ukuba mina nginguNkulunkulu, ngiphakanyiswa phakathi kwezizwe, ngiphakanyiswa emhlabeni.

¹¹ INkosi yamabandla ilathi, uNkulunkulu kaJakobe uyisiphephelo sethu.