AmaHubo 45 - iBhayibhili Elingcwele 1978

Ihubo elihayelwe inkosi lomlobokazi wayo

¹ Inhliziyo yami iyaphuphuma ngendaba enhle; ngikhuluma ngehubo engilihayele inkosi; ulimi lwami lulungele ukuhaya njengombhali ophangisayo.

² Umuhle wena kulabantu bonke; mahle amazwi akho; ngakho uNkulunkulu ukubusisile insuku zonke.

³ Hloma ngomkhonto wakho wena qhawe, ulobukhosi lobukhulu.

⁴ Ebukhosini bakho unqobe ekuphumeni kwakho, usiyakulwela iqiniso lokuvikela ukulunga; isandla sakho sokunene sikufundise izinto ezesabekayo.

⁵ Imitshoko yakho ibukhali, ihlaba inhliziyo zezitha zakho; izizwe ziyawa phambi kwakho.

⁶ Isihlalo sakho sobukhosi osinikwe nguNkulunkulu simi kuze kube nininini, lentonga yakho yobukhosi iyintonga yokulunga.

⁷ Uthanda ukulunga, uyazonda okubi; ngakhoke uNkulunkulu, uNkulunkulu wakho, ukwenze waba mkhulu kulabanakwenu ngokukugcoba ngamagcobo entokozo.

⁸ Izambatho zakho zonke ziqholiwe ngemure langenhlaba langekasiya; ezigodlweni eziceciswe ngempondo zendlovu ukukhala kwamachacho kuyakuthokozisa.

⁹ Amadodakazi amakhosi aphakathi kwabesifazana bakho abadumileyo; ngasesandleni sokunene kumi inkosikazi ececiswe ngegolide laseOfiri.

¹⁰ Zwanake, ntombi, uqaphele, ubeke indlebe yakho; ukhohlwe abantu bakini lendlu kayihlo;

¹¹ ng’khona inkosi izakubuthanda ubuhle bakho; ngoba yona iyinkosi yakho, khothama kuyo.

¹² Abantu baseTire bazakuncenga umusa wakho ngeziphiwo, labanothileyo ebantwini bawuncenge ngenhlobo zonke zenotho.

¹³ Indodakazi yenkosi icecisiwe endlini yayo ngezambatho ezilegolide;

¹⁴ yambethe izambatho ezilemibala eminengi iyasiwa enkosini, lezintombi ezingabangane bayo ziyayilandela.

¹⁵ Ngokuthaba langokujabula ziyahamba, zingena esigodlweni senkosi.

¹⁶ Amadodana akho nkosi, azakuthatha isikhundla sabokhokho bakho, uzakuwabeka abe yizikhulu emhlabeni wonke.

¹⁷ Ibizo lakho ngizakulenza likhunjulwe ezizukulwaneni zonke; ngakhoke izizwe zizakukubonga kuze kube nini lanini.